2008年3月31日星期一

買米好過買股票

港股今日結束咗上星期連續四日的強勁升市,財經台同埋財經報紙都話今次的升市係"披著牛皮的熊"。表面 tum 下你好似會升咁,但實際上就古古惑惑又再一次傷透萬千股民的心。

其實上個星期的升市,除咗大跌後點都要有的反彈外,其中一個好重要的因素係大家都以為阿爺會救市。話晒上個星期突然間殺一單中移動公佈可以攪生滋業務的新聞外,仲傳內地會減印花稅同埋又傳港股直通車就快會開通。點知傳言原來真係得個傳字,傳下傳下咪乜都冇發生過咁。

周末有記者問溫總直通車幾時開,溫總睬你都有味,完全冇表態。內地減印花稅又係一樣影都冇隻,攪到大家今日都好失望。

我個人覺得其實個市家下唔算淡,應該可以再淡 D。原因為美國個市經聯儲局一連串的行動後,雖然令部份投資者冇咁騰雞,但若果問題一日未解決,其實對個市都仲係有壓力。話晒大家都會擔心美國個市會陷入衰退。呵呵,如果真係咁,來緊既應該係第二輪放貨大行動!

繼樓市後,跟住係 credit card 同 car loan 冇力還,攪埋商業樓按同埋企業負債累累 ...... 諗起都驚 ......

以上的恐慌並唔係我諗出來,而係 now 財經台的黃 Sir 同埋信報的曹人超都有講過唔排除有咁既可能性。寫呢篇 post 的時候美股啱啱開市,跌咗幾十點後又升番廿零點咁大把。稍後美國財長好似話會宣佈攪一間超級無敵監管機構,唔知可唔可以幫到個市。收市時又睇下點。

上星期小弟買入的熊證 7269 (@ $0.385), 今日好好彩可以見番家鄉 (曾經升過 $0.4)。不過仲未放。我覺得除非阿爺又出招,否則應該可以睇多陣先。其實我覺得就算阿爺出招,家下都未必可以咁神勇救得番個市,話晒弱勢已成,唔係話救就救。

So, 繼續睇淡,但隨時 stop lost 跳車。

願跌市與我同在!

************

今日新聞話市民由於擔心通賬,個個喺超級市場搶購糧米。咁又難怪,美元持續貶值,人民幣又升到阿媽唔認得,家下入定貨費時到時買貴貨!睇來今期買米升幅應該好過買股票!

印象中上一次搶米係喺 2003年4月1日,哥哥離我吔而去嗰日。不過嗰次性質不同。由於喺 SARS 既極度恐慌中,大家擔心香港會成為疫埠,封咗港就乜糧食都冇得入口,所以買定米先。家下諗起嗰段日子都有 D 心悸。希望有生之年都唔會再見到。

Internet 可以做到的 350 件事

今日喺 SOGO 11 樓旭屋書店見到日文版既 Yahoo! Internet Guide,封面話喺 Internet 可以做到既 350 件事。好奇心驅使下就買咗本來睇。





超正!值得喺度講一講。

佢將 Internet 可以做到既野分為十三大項,包括搵料、搜索、玩樂、視聽、網誌發信等、相聚交談、買嘢預約、整嘢、搵著數慳錢、搵辦法搵錢、工作上的使用、學嘢同埋保障人身安全 (係呀,睇來日本人真係好怕死。呢部份都佔唔少既篇幅)。

點解要推介,因為佢既資料實在太詳細,佢列咗起碼超過 350 個 web site,而且好多都好實用同埋有創意。以下列舉幾個例子你就明我講乜:

去 Sony 同埋 Fujitsu 既 online outlet 買平嘢:
http://www.jp.sonystyle.com/Style-a/Outlet/
http://www.fujitsu-webmart.com/

超過 400 種類的辭書檢索:
http://www.weblio.jp

免費睇講談社的漫畫 (不過要登記先):
http://moura.jp/manga/

火車地鐵失物販賣
http://www.ecoza.com

買海外土產 (陰功,日本人的海外而家竟然冇香港份!香港唔係咁唔入流吓話):
http://www.gift-land.com/

網上制作兒童故仔書 (仲可以做本英文版):
http://www.ehon-koubo.com/

個人化 Nike:
http://nikeid.nike.com/nikeid

將自己寵物張相變成個人化冷衫:
http://www.amimono.co.jp/item-sweater.htm

網上購買日本地圖,奇就奇在唔只交通路綫圖,佢連江戶時期的地圖都有得賣:
http://www.mapshop.co.jp/

天氣:連幾點日出到邊日係花粉症高峰期都有:
http://tenki.jp

將自己的人生整成 board game:
http://www.takaratomy.co.jp/products/myjinsei/

嘩哈哈!係咪睇我咁講都好似好吸引呢 ..... 呢度都係 350 幾個 web site 既其中一部份,要睇全部,緊係買番本來睇啦。

雖然本雜誌係日文,但由於有大量圖片的關係,就算唔識日文既都應該覺得幾過癮。日後有時間會將多 D 呢期雜誌介紹的 web site 列出來同大家分享。

2008年3月28日星期五

期指結算夾淡倉 - 中移出生滋、阿爺打救你

尋晚美國個市跌咗百零點,但我都估到香港個市今朝早都會幾好。理由係期指今日結算,就算要個市跌,好友都唔爭在托埋今日啦 ......

於是小弟如尋晚所說,會於大市升時買淡貨。本身諗住買熊證 6235,但因為成交少,所以喺十一點左右轉咗買 7269 @ $0.385,博個市喺結算後會跌。

成個下午都比較忙,冇時間睇住個市 ......

點知一收市 ...... 噢!bull shit! 竟然升咗成六百點!大跌眼鏡!我隻熊證唔慌唔變熊!結果收市變成得番 $0.33!即係話即市輸咗十零個 %!

睇番 D news,先至知道阿爺托市:

1) 中移動可以喺內地八個城市出"生滋";(要留意佢好似係俾奧運人士用架咋 ...... 好似唔係人人都可以申請用 ...... 呢單新聞有待跟進 ......)
2) 傳如果 A 股再跌,內地政府會減印花稅;
3) 仲有傳港股直通車又有消息 ...... (唔係吓話,李居士真係咁準?邪!)

睇來阿爺雖然唔係好想個市升得咁多,但都唔想個市一跌跌到阿媽唔認得!要知道內地股民淨係可以買升唔可以買跌,個市跌即係話人人都輸錢,咁樣會嚴重影響社會和諧架嘛。

睇番 Yahoo China 的財經頭條:
金融股报复性反弹 沪指暴涨168点逼近3600

就知 A 股跌市得罪幾多股民!

好啦,既然係咁,我呢 D 蟻民又點樣可以唔跟紅頂白一下呢 ...... 雖然自己睇淡,但我估個市都好有可能升多陣。好!一於俾個市升多一個禮拜咁大把啦,然後再睇情況繼續做淡 (或轉呔做好)!

話晒個市弱勢已成,我就覺得乜人打救都唔救得去邊!唔知下個禮拜初又會唔會成為最後沽貨機會?

家下買咗的熊證 7269,買咗唔算多。待跌破買入價 20% 左右先考慮止蝕。甚至過埋禮拜一季結先至考慮止蝕。暫時持有。

下星期香港有新股陽光能源,睇下佢又會唔會“破發”!
註: 內地最潮新詞“破發”,即新股一出場“跌破發行價” (即招股價) 的意思。前排於內地上市的“中國太保”(601601) 成為破紀錄的“破發第一股”!

2008年3月27日星期四

國內同胞今期唔要 A 貨

今朝果然開跌,而且都跌得幾勁咁,有成三四百點 (雖然家吓個市升跌幾百點都好平常)。但係個市腰力驚人,拗拗腰咁就彈番上嚟,成個體操王子咁。好彩今日忙到成隻屐咁,唔係好有可能入咗市買 put 都唔定,家下唔駛即市輸錢咁冇癮。

而家個市普遍有兩個睇法:

1) 恆指於3月18日上星期二低見 20572 後反彈,睇來已經短期見底。可以短期重新看好。
2) 熊市已經殺到,恆指現時的反彈不過係短期性的反彈,恆指仍處下降軌。應該逢高沽而唔係逢低吸納。正所謂 every rebound is a chance to sell !!

我本身係第一個看法的支持者,睇恆指會有個大反彈,而且會去到 27000 左右。但近幾日大陸 A 股個市大出血,我覺得好唔對路囉 ......

連國壽 (2628) 都話減持 A 股唔要 A 貨!嘩!D 國內同胞見你中人壽都咁樣玩法,仲唔有樣學樣咩!?咁攪法,個市都好難好得去邊喎 .....

所以,我開始有少少轉軚。

今日成日香港個市成交都唔夠八百億,睇來都係期指好友力頂住個市啫。

今期預測: 估計聽日期指結算後,個市好有可能會跌。呢一浪我估又會跌低過 21000,不過會唔會跌低過上次低位 20572 就未知。如果跌破 20000左右,都幾大鑊,好有機會會去到 18000 (?!)。但我相信就算係都會好快反彈。

我唔夠膽睇得太淡。話晒李居明話今年四月五號到五月四號香港個市有可能會因為有港股直通車的消息而會有個小升市。雖然唔係太信,但有 D 野真係好邪既 ...... 所以都係睇定先 .....

So, 我的 Strategy 係聽日朝早可能會買入熊證 #6235,但會因應市況而決定幾時放。若果個市結算後跌唔落,好有機會會隨時跳車。如果跌得落,應該下周左右會考慮放。今期作短炒。

Good luck !!!

2008年3月26日星期三

今期應該要跌

好開心,寫呢篇 post 既呢一個 moment,DOW 跌多過一百多點。對我哋呢 D 冇貨喺手的散戶,點都係好事來既。

話晒美國經濟差到阿媽都唔認得,冇理由呢個時候覺得個股市會升得去邊。

雖然香港個市呢兩日反彈千多點,對我來講,只會係反彈。雖然一般熊市的反彈可以升成 30% - 40%,但因為而家我冇貨喺手,冇計啦,就算個市升我都係只可以寄望佢繼續跌 (買佢升又好似真係覺得冇乜值博率) ......

今日隻渣打 (2888) 真係發神經,升咗 $14!真係一隻好股。家吓都有 D 後悔咁早放咗佢。

不過冇計啦,唔做都做咗 lor .....

中國人壽 (2628) 我就持續看淡喇 ..... 見佢個業績記者會講話開始想投資海外市場,就唔知點解越睇越唔舒服、越睇越心寒 ...... 話晒對內地金融機構走出去都有 D 戒心,成日覺得佢哋會接人哋 D 蟹貨。

尤其係國壽靠既多數都係投資得來的收益 ......

咁即係話股市好佢就好,股市唔好佢都應該唔慌好得去邊個隻!

睇番 A 股個市,人心向淡。睇來都係易跌難升。

我會呢兩日開始留意一下有乜熊證可以買吓咁。不過呢排公司跟的 Project 做緊 UAT (User Acceptance Test) ,忙到顛咗,都唔知有冇時間買就真。

今期升定跌?

我上星期二撈底成功但星期三放咗的渣打 (2888),今日升咗成 $11 !!!

我同樣於上星期二撈底成功但亦是於上星期三放咗的交行 (3288),今日升咗超過 7% !!!!

雖然上星期四港股大跌,但由於美股喺復活節大升,今日恆指復市升咗成千三點!激死!

有冇人可以話俾我知上個星期四同昨日(星期二),美國個市點解會升到阿媽都唔認得?

美國房屋銷售,好似話有七個月以來最好嘛 ......
次按風暴看來進入尾聲 ......
睇來最壞的消息都出咗 lor,個市都應該唔會衰得去邊啩 ......
美國今年大選年,美國政府點樣都會托住個市既 ......
個市跌到咁,反彈都好應該啫 ......

除咗第一條 (美國房屋銷售超出預期) 外,其他的理由,我都覺得唔係理由。

美國衰退,就算伯南克唔認,大把人都百份之一百甚至百份之二百話美國肯定己經步入衰退!

Yes,係百份之二百的人覺得美國己經步入衰退!

既然係咁,睇來,今期可能只係基金想整靚番盤數而己。

有人話今次港股已經築完底,隨時可以準備反彈嗰隻。

亦有人話今次港股反彈唔會持久 ...... 因為美國經濟咁鬼衰 ......

好矛盾呀睇來今期 .....

So far 冇倉位喺手 ...... 不如咪繼續睇呢幾日個市點先 lor .......

今期冇乜方向 .... 我諗應該同萬千的散戶一樣 ........ OK ! 今期一於睇定 D 先算!

一於睇定 D 先算!乜都話知你!

Cheers!

2008年3月25日星期二

維京人宣言

點解呢個 blog 叫「市場維京人」?只因為咁啱手頭睇緊本書叫做《維京人宣言》 (天下文化出版),內裡描述維京人靠靈活的創意,打進五湖四海。他們的後代,從 IKEA、樂高、Volvo、到絶對伏特加,以同樣的精神,占領全球市場。

本書雖然是講行銷及企業文化,但正如書中所說,我們可以自行對號入座:隨意把行銷換成促銷、發起一個運動、促成其事、或其他任何東西都可以,只要更適合你的專業領域;企業文化也一樣,可以改為組織文化、激勵士氣、領導、社區或管理,只要你喜歡。

既然如此,我又何妨做個斷章取義,將其應用在投資、炒賣、睇市?

以下的維京人宣言摘自出版社的 Web Site

第一篇 行銷
第1條 如果你想做點別的事,就趕快行動
第2條 好點子闖天下
第3條 有遠見的人常回頭看
第4條 方向可改,心不可變
第5條 出航前的叮嚀:學會基本功
第6條 規畫你的攻擊行動
第7條 化弱點為優勢
第8條 在小太歲頭上動土
第9條 想得小,看得遠
第10條 想得大,找小空隙
第11條 做的比說的有力
第12條 靠苦難、絕望與貧困賺錢
第13條 靠人性尊嚴賺錢
第14條 要謙遜而粗魯(不要傲慢而客套)
第15條 選擇目標顧客:你喜歡的人或喜歡你的人
第16條 送人東西,有錢可賺
第17條 堅守原則、創新求變
第18條 想打成一片,先要鶴立雞群
第19條 學習新數學
第20條 產品力求完美
第21條 如果產品真正好,就把行銷的錢用在產品上
第22條 品牌的精華只有兩個,兩者都要兼備
第23條 競爭是次要考慮
第24條 工具一樣,用法不同
第25條 廣告不管用,是件好事
第26條 好故事比以前更值錢 
第27條 維京人的禪(零下30度的夏日最新流行)
第28條 和刻版印象唱反調
第29條 教育是種行銷手法

第二篇 企業文化
第30條 搶奪、掠取,以及其他道德觀
第31條 人人當家
第32條 不怕犯錯,只要是對的錯
第33條 問題是經理人的好朋友
第34條 把狂暴戰士放在船頭(但別讓他們開船)
第35條 發現暴力,排除粗暴作風
第36條 記好:奴工是管理夢魘
第37條 打女性牌
第38條 競爭太無聊
第39條 想要激勵士氣,千萬別靠獎懲
第40條 說話不花錢,但還是要少說廢話
第41條 重拾做決策的藝術
第42條 做人要誠實
第43條 仿冒仿冒者,一個值得仿效的創意
第44條 把律師放在最後一艘船
第45條 創意會計,世界更美好
第46條 有爭議,太好了,如果你是對的
第47條 重新認識錢
第48條 危機處理有兩招,主動出擊或當獅子狗
第49條 替市場調查加點味
第50條 成功別只靠運氣

我的第一個 blog post

終於的起心肝起咗呢個 blog。係呀,呢次真係的起心肝 ga ......

其實自己想寫 blog 好耐,真係好耐,而且係真係真係真係真係想寫好耐嗰隻 ...... 但正所謂萬事起頭難,要寫,總有無數個無厘頭的理由同藉口,叫自己唔好咁無聊同埋浪費時間去做埋 D 無謂嘢。

而且,一時間亦不知應該寫甚麼的題材會比較好,亦不知道應該如何寫會比較好。(都話自己好多個理由同藉口嘛)

只知道自己比較喜歡同人 share 吓一啲炒呢樣炒嗰樣既心得 (例如股票呀、窩輪呀等等一切可以輸錢的玩意) 。無論係輸係羸都好吖,都係想同人分享呀嘛。尤其係成日形住自己都有 D 睇市既智慧。而且,往往都幾好彩,算係睇得幾準吖咁呢。

雖然曾經炒外滙同期指衰咗,但話晒都係初哥,炒輸係正常既。(點知到而家都係未掌握到)

Yup,為了滿足自己的表演欲,寫咗呢個 blog 的第一個 post。


打你個電郵地址,收維京人最新的網誌更新:

Delivered by FeedBurner

HSI, Warrant, Warrants, Hong Kong Stock Market, HK Warrants, Warrants com, Stock Blog, Hong Kong Warrant, Warrants Hong Kong, and Warrants, Stock Warrants, with Warrants, 股票, Index, 香港 股市, 恒生 指数, 香港 股市, Stock Market, 香港 股票, Warrants Trading, Options Warrants, Stock Purchase Warrants, Stock Warrant, Warrant Coverage, Bull Bear Warrants, 股票 技術 分析, Stock Technical Analysis, Technical Analysis, Technical Analysis Of, Stock Trends, Forex, Foreign Exchange