2008年4月29日星期二

期指結算後,should we sell in May?

香港恆生指數升248點,收報25914 點,而反映 H 股走勢的國企指數上升101點,收報14298點。小弟響 4月3日的 post 已經話今次個市反彈好有機會補返由 1月15日跌落來的裂口 25837,結果又貼中咗!今次都好滿意自己的眼光 ...... 嘻嘻 .....

至於後市點睇?吾 ...... 先睇睇今日既期指表現先,話晒今日期指結算嘛,或多或少可以睇到少少玄機。近呢兩個月的期指轉倉,成交好似比較多咗,五月期指未平倉合約仲去到 95523 張。而五月期指今日收報 25760,低水約 154 點。我都留意咗五月期指好幾日,發現幾乎大部份時間都係低水,而今日低水的幅度略為大咗,加上成交大,睇來大戶好似唔係好睇好五月份的恆指表現。

唔通又係時候 sell in May, fly away?

基本上我比較認同五月向淡的機會比較多。一來公司業績已經公佈晒,而美國次按嗰面攪到咁上下應該又會有新的衰退壞消息走出來。

不過由於阿爺開始咗救市,內地 A 市信心回番 D 來,而今個月又有聖火到,可能會攪到大家又心郁郁想再炒番奧運效應。睇來國企股可能會比較隠陣 D。

今日隻青島啤 (00168) 己經發神經升咗上來,報 $22.1,都升咗成 5.7% 架!

另外,前兩日講話煤炭股後市好似比較好。啱啱冇耐公佈業績的兗州煤 (01171) 果然真係唔錯,07年實現淨利潤增 46.2%。今日升咗多過 4%,報 $14.42。

Anyway, 由於星期五奧運聖火遊香港,我買有心人會因為咁而做好個市,所以今日入咗隻中移動輪 (# 13245)。咁當然啦,博奧運聖火來個市升本身就係個估字,咁唔科學的買賣係比較高風險 D,所以我星期五好有可能會沽咗佢。今次想博下大霧咁啦。

手頭的貨:
# 02823 A50 基金 - 暫賺 6%
# 13073 A50 基金 call 輪 - 暫蝕 5%
# 13245 中移動 call 輪 - 暫蝕 1%

美股今晚略為徧軟,大家都睇緊聽晚聯儲局議息的結果。加上後日勞動節假期,估計聽日港股交投可能會比較淡靜。

2008年4月28日星期一

來自業績以外的另一種壓力

今日個市其實都比較悶:向上又冇乜力,跌落去又唔捨得,攪到唔上唔落咁。塊牛皮好鬼徧軟。恆指收市報 25666 點 (666 - 魔鬼信號!?),升 149 點。國企指數則下跌 24 點,收報 14196 點。

睇來恆指喺聽日結算前都可能冇乜方向,而呢個禮拜三晚又遇正聯儲局議息,星期四又勞動節假期休市,大家都抱觀望態度。呢個星期同時亦好多家公司公佈業績。估計星期五奧運聖火到可能會升一浸。目標暫定會穿 26000。四叔比較睇好,話可能會去到 27000。其實而家離 27000 都係爭嗰千零點,即係話有上升空間但唔算多。

呢排發現好多細價股亦開始反彈,好似同事買咗的山東墨龍 (00568) 咁樣,都由近期低位 $0.8 反彈到今日的 $1.04,都算唔錯。(可惜我同事喺差唔多兩蚊入貨 !!)

連細價股都開始反彈,如果恆指要再彈的話,相信只會彈番 D 大價股而已,例如 HSBC (00005) 或者中移動等 (00941) 等。我亦可能會於明天買入中移動窩輪 #04944 或 #13245,不過 preminum 徧高。或可以考慮牛證 #06302。作短炒,以迎接周五奧運聖火! 哈哈! 一於繼續貫徹維京人一向以小搏大的作風!

講下業績。保險股龍頭中國人壽 (02628) 由於投資 A 股失利,首季業績倒退遜預期。今日跌超過 1%。

至於銀行股業績又點呢?都唔錯架。例如中國銀行 (03988) 首季純利升 85%、建設銀行 (00939) 首季純利 321 億元人民幣,已達去年全年的 46%。股價今朝仲曾升越 3%。聽日好似仲會出交通銀行 (03328) 的業績,留意留意。

個人雖然亦睇好內地的銀行股,不過對同時喺內地有上市的公司有 D concern。因為今期 A 股個市雖然得阿爺打救,略為止瀉。但呢兩日大家仲好擔心大小非解禁。(唔知乜野係大小非解禁?睇番呢篇 post 啦!) 話晒據數據顯示,從2006年到2009年, 大小非解禁將呈逐年上升的形勢, 其中2008年將迎來解禁浪潮第一波。2008年全年大小非解禁為7,963,338 萬股、市值約1.7萬億元左右; 2009年解禁的規模達6,637億股。

嘩! D 解禁排山倒海咁來,雖則話阿爺出咗第一招來規犯啫,呢個點樣都係國企股來自業績以外的另一種壓力。大家不可不注意。

持貨方面,家下持有 A50 基金以及其相關窩輪。估計 A 股會喺風高浪急下喺 3000 - 4000 點陪迴一段時間。暫時仍作持有。

今日外圍仲有兩單要留意的新聞,就係美國政府再注資落市場,同埋股神巴菲特唔出手買跌到殘的銀行走去買香口膠公司箭牌。請請。

2008年4月26日星期六

疑似阿爺救市第三招

繼阿爺今個星期連出兩招後,今日內地的股民出奇地非常理性。今日已經再冇昨天的歷史性暴脹情況出現。上證指數仲反覆沖向高位 3658 點後收市倒跌,報收 3557 點,微跌唔超過 1%。

不過 A 市的 IPO 就有另一個奇景,又係歷史性的第一次新股發神經紀錄。今日喺滬市新上市的紫金礦業 (601899),招股價 7.13 (RMB)。仲諗住招股嗰時個市咁差,呢隻嘢又會成為另一隻「破發」對象。點知遭逢呢個禮拜阿爺救市,形勢大好,今日一開市已經升到去 9.98。下午一開市仲俾一眾大小莊家散戶砌到上去 22.00,攪到上海證券交易所要嗌停版 .... 臨收市 5 分鐘復版後,竟然落番去 13.92 !!!!! 真係一來一回都有成 double 的波幅!

今日個市冇預期中咁再撲上去,估計有以下原因:

1) 蟹貨太多,沽壓太重。話晒 A 貨指數已由 6000 點跌到 2990 點,來個反彈唔通仲唔鬆咁 D 綁咩?

2) 大家擔心若 A 貨又一支箭咁衝上去,即係話擺到明阿爺呢次係出面救市。雖然家下大家都明白呢點,但咁樣有違阿爺希望股市市場化的政策,所以各位唯有俾下面唔好一次過升咁多啦。

3) 今日出現疑似阿爺出手救市的第三招。原來國務院昨日已正式頒佈,容許「融資融券」業務被正式列入券商業務中。(好似會於 6 月正式實行)

所謂「融資」,即係話可以借錢買股票,做法等同於借「孖展」。理論上咁樣對個市應係好消息來既,因為會有投機客借錢買貨,又或者以少少錢買多多貨。不過話分兩頭,「融券」的意思係可以借貨借股票先行沽出,遲下再補番貨都可以。做法等同於我哋平時叫開的「沽空」,一般係睇淡的投機者覺得個市太高,就算冇貨都沽定先咁解。

So, 呢個阿爺的政策點解我會叫做「疑似救市措施」,係因為對個市的走勢可以係正面又可以係負面。而我覺得呢個措施絶對係好事來的。內地的股民唔會淨係可以買上去,仲可以沽番落來,咁樣會係邁向成熟的市場的正面的一步。

行埋呢步,睇來內地好快就會有股指期貨可以炒。不過據聞起碼要過咗奧運先會考慮,怕會影響市場太多。

睇番香港個市,恆指今日反反覆覆咁跌咗 164 點。算係升咗咁多日來番個回吐啦。都好合理。

手頭的貨:

# 02823 A50 基金 - 暫賺 7%
# 13073 A50 基金 call 輪 - 暫蝕 5%

如果星期一 A 股走勢未轉好,隻 A50 call 輪可能會考慮止蝕。要睇番定市場的氣氛先。個人仍然認為上證指數今期應該可以升上去 4000 點或以上。

由於下星期奧運聖火會運到嚟香港,可能個市會升番浸賀一賀佢都未定?

Cheers !

2008年4月24日星期四

散戶復仇記

自從阿爺喺呢個禮拜初開始出招後,內地股民的撈底欲望再度被激發!由上星期講話「個市一升上去就放埋 D 貨佢」,家下己變為「個市咁升,要快 D 追貨先得!」。市場心態,轉變之快,真係唔可以話唔變態。

滬深 300 指數今日升咗 320 點,上證綜合指數升咗 304 點。兩個指數均升咗多過 9%,即係差唔多到咗脹停價的 10%!此亦為兩市有紀錄以來最大單日升幅!散戶大報復己經發生,全力殺空。

國內的資源股亦已經連升幾日,其中尤以煤炭股為甚。睇個衰樣頭也不回咁升上去,應該係大戶搶緊貨。後市嘛 ...... 緊係睇好啦!其中兗州煤 (#01171) 好有機會破 $15,而中煤能源 (#01898) 好有機會 touch 到 $20!

咁又難怪的,內地的煤炭業都唔係今期宏調的打壓對象嘛 ......

睇來個市形勢會係大好。

不過我講緊的係大陸 A 股個市咋 ...... 香港呢面恆指已由低位回升差唔多成 5000 點。家下去到所謂蟹貨區。可能會有所反覆。

So, 今期的策略係:買 A50 好過買盈富、買國企好過買恆指。

尋晚小弟推介的幾隻 A50 (#02328) 的窩輪同埋國企牛證,即 #13073、#13074 以及 #04203,升幅由 19% 至 28%不等。不過係咪代表你可以賺錢呢?又唔一定。因為呢幾隻野今日一開市已經扯高咗上去,今日買咗都唔代表可以馬上賺到錢。

小弟下午都忍唔住買咗 #13073 @ $0.305。家下喺手的貨如下:

# 02823 A50 基金 - 暫賺 9%
# 13073 A50 基金 call 輪 - 暫賺 3%

上證指數由星期二跌到最低 2990 點後開始衝上去,一路冇任何阻擋。如果由高位到低位以神奇數字來計算,反彈 38.2% 可見 4180 點;50% 會見 4506 點;如 61.8%,則為 4833 點。即係話保守估計一定會過 4000 點,所以其實 A50 的窩輪有好高的值博率!

祝各位旗開得勝,喺呢一浪中可以賺大錢!

Good luck!

2008年4月23日星期三

政策 vs 市場

尋日話口未完話博內地個市會減印花稅,點知真係開口中!黃昏時候國務院公佈由明天起,證券印花稅由百分之零點三減到百分之零點一。

個人對於內地政府減印花稅覺得係好事,因為某程度上放寬咗入市的限制,即市場更自由。

我就喺中午食飯前沽咗中移動輪 #05022 @ $0.153 (今日收 $0.161 呀陰功) 同埋恆指牛證 #07223 @ $0.6,分別賺咗約 40% 同埋 23%。點知收市後就傳出阿爺又再救市的呢個消息。激死!沽出的理由係恆指已經達到自己的第一個目標 25000,所以先沽貨套利。以免犯了「有食唔食,罪大惡極」的錯誤。不過可能我又犯咗另一個錯誤,就係冇做到止蝕唔止賺。

Hey, 不過我又唔係買來投資只係要來短炒,所以一定要止賺!

今日恆指收報 25289,升咗 350 點。國企指數收報 13838 (好意頭!),升咗 130 點。滬深 300 指數唔知係咪有春江鴨收到風,一開市係跌既,點知之後長升長有,收報 3453 點,升 157 點。超過 4% !!滬深兩市加埋的成交仲係近期的新高,有成 1200 億。

雖然頭先講話減印花稅係令到市場更自由,亦即股市可以相對更加市場化。但始終內地個市都好睇政府的政策,有可能到時又見個市升咁多就一個唔該又改為加番印花稅都未定。

以前我成日都唔相信任何的政策係可以影響市場的走勢。不過自從回歸後,我亦不得不信阿爺的威力。既然天要下雨、爺要股脹,我哋冇理由唔趁勢架嘛 ......

So, 係唔可以唔順勢而行。中線睇好 A 股有個幾可觀的反彈。

由於手頭已經有 A50 基金 (#02823) 可以長渣,但我又想博佢短期的升幅,我決定聽日可能會買入其相關的窩輪。

短線睇好既可以留意 warrant #13073,博正股 #02823 升破 $20 嗰嘢爆炸力,又或者 #13074,博正股升破 $22.5。不過 premium 就成廿幾三十幾倍,算係幾貴。

或者留意下國企指數牛證 #04203,槓桿 4.4 倍。收回價 11600。

補番一句,窩輪同牛熊證不可長渣同大大注,睇錯方向記得馬上止蝕,no more question can be asked!

不過美股今晚寫呢篇 post 的時候大升咗成 92 點。加埋內地減印花稅呢個消息要消化,聽日港股睇來一開市就會裂口高開,玩下手升到個價位已經可以俾大戶派貨。

小心,小心。

果然!

果然上證綜合指數 3000 點真係有個好強力的支持!

今日一開市,A 市就已經俾淡友佔領咗半壁的江山,向住目標 3000 點直插落去。結果皇天不負有心人,淡友終於政破 3000 點心理同技術上的關口。只係好友不甘受襲,馬上展開還擊,結果淡友同時轉呔做埋好友,多頭上演絶地大反攻。結果上證綜合指數收報 3147 點,倒升約 30 點。恆指午市大幅反彈至 24939,升 217 點。

小弟有貨的中移動輪,今日就麻麻地。由於中移啱啱公佈咗業績,有低位入貨者趁好消息出貨,所以跌咗 $2.8,仍然守得住 $131。

手頭的貨:

# 02823 A50 基金 - 暫蝕 1%
# 05022 中移動 call 輪 - 暫賺 33%
# 07223 恆指牛證 - 暫賺 20%

今晚美國嗰面開得好差,寫呢篇 post 的時候跌咗差唔多有 160 點。聽日香港個市如無意外亦會借勢一跌,但係結果係點都係要睇 A 股。

所以家下要分析大市,一定要估到 A 股的走勢。A 股為政策市,所以我哋要估阿爺下一步點走。不過亦要留意,市場的力量亦不可低估,所以我哋亦要估埋市場對阿爺政策做的反應先至掂。

你話難唔難玩?

難架,其實。

不過咁先好玩嘛 .......

我自已就估 A 股會博阿爺減印花稅救市,仲可以升多陣。

其實長遠來講,而家的 A 股亦可以入市。A50 基金 (02823) 為必選。而家入第一注,如果佢真係跌,去到 $12 (家下約$17) 可以再買入。 要知道家下 A 股個市就如香港 73 / 74 年的港股,嗰陣港股亦發生股災, HSI 由千零點跌到落去成百零點,而家睇番轉頭, 就算嗰陣千零點高位入市,唔駛 10 年都已經攞返番來。

So, 就睇下你信唔信,中國會很牛?

Good luck!

2008年4月21日星期一

曇花一現

美股上周五發神經勁升 228 點後,同時星期日失驚無神整單被視為阿爺救市的消息,港股今日一開市就大幅高開約六百點。

只不過,好花不常開,好景不常在。內地 A 股蟹貨實在實在係太重喇,大家個信心都仲未返得切來。A 股一開市雖則高升約 7%,但都只係曇花一現。滬深 300 指數仲上演一幕高台跳水,一開市先爬上高台升咗 244 點。但點知開市盤即係全日的最高盤,之後個市無返過呢個位,慢慢慢慢咁跳水跳番落去倒跌約 4 點,收報 3267 點。

好明顯阿爺呢次救市,係最心痛是,救得太遲。國內同胞經已傷心欲絶,就算係好消息都只會視為出貨信號而唔係買貨時機。

不過又咁睇,話晒今次大家都視為係阿爺救市第一招,有好友話阿爺一定唔會俾滬深跌穿 3000,所以認為好消息應該仲未出盡。今日陰燭報收,只不過顯示咗股民信心一時仲未恢復而已。

今次的救市措施,為內地政府規範大小非解禁。所謂「大小非解禁」,裡面的「非」可以解讀為非流通。「小非」係小部份非流通的股票,佔總股本 5% 以內;而「大非」係指大規模的限售流通股票,佔總股本 5% 以上。「大小非解禁」即係指放寬措施,俾原本唔係流通的股票可以流通。今次阿爺就係要呢 D 可以解禁的股份唔好通過主版沽貨賣俾散戶,而係要有人接貨先可以喺交易所的大宗交易系統處理。

如果有心人仍然想將解禁股份賣貨俾散戶,其實亦一樣可以。因為今次的措施係針對解除股份數量佔總股本的 1% 或以上才需要在大宗交易系統處理,若少過 1%,仍可以賣俾散戶。即係話今次的措施唔係乜嘢強硬措施,屬心理因素多 D。

恆指今日收市報 24721,升 524 點但陰燭。

我手頭的貨當然就係升啦!尤其係隻中移動。如下:

# 02823 A50 基金 - 暫蝕 3%
# 05022 中移動 call 輪 - 暫賺 46%
# 07223 恆指牛證 - 暫賺 15%

今日我都有考慮過賣唔賣咗手頭的 call 輪同牛證,因為正所謂有食唔食,罪大惡極!而且恆指離我的第一個目標價 25000 都係爭 200 點。不過結果都係冇賣過貨。因為都係睇好中移動,覺得家下仲有本錢可以守。

不過睇番今晚美國個市都做得好差,可能聽日我就沽貨再部署都未定。

聽日再 update 大家。請請。

2008年4月19日星期六

美股發神經‧我要愛世界

今晚美股超級發神經,寫呢篇 post 的時候大約係香港時間零晨一點,即係美國嗰便食緊 lunch。DOW 由一開市到而家已經升咗成 260 點!睇番自己個 blog 的 post,原來上個禮拜的同一日,即係禮拜五,美股係大跌既,最後仲跌咗成二百幾點 tim ...

所以話呢,世事認真無絶對,花旗國喺壞消息充斥下大升,又應驗咗一次波係圓的道理 ..... (念伍晃榮)

財金界巨人花旗集團 Citigroup (C) 公佈業績,宣佈由盈轉虧。而我最鐘意用的 Google (GOOG), 半日升咗 90 蚊 ─ 仲要係美元! 即係大大話話升咗超過兩成!超勁!只係半日的時間!

唔知大家對下個星期的 Microsoft 又有 D 乜嘢期待呢?

睇番香港呢面,老實講,走勢就真係麻麻地喇 ...... 點解呢?今朝朝早香港個市原來曾經升咗大約二百點,但受制於內地 A 貨的超級疲弱走勢,結果反而倒跌 61 點。

至於小弟的貨嘛 ..... 除咗隻 A50 等死外 (即係等緊止蝕呀),其他都 of course OK,等別係隻 05022 中移動 call 輪,正股 941 破咗隻輪的行駛價,暫時都唔錯。

# 02823 A50 基金 - 暫蝕 6%
# 05022 中移動 call 輪 - 暫賺 34%
# 07223 恆指牛證 - 暫賺 3%

如果美股今晚 keep 到個勢,睇來中移動星期一都會有一個唔錯既升幅!哈哈!

另外,要留意美元會否開始來個大反彈!睇番日本紙,都去番成 103 / 104 咁上下。睇來美元升番轉頭的話,人民幣都唔一定會喺大家的預期咁升。小心小心。

******

顆顆紅心挺中華!近排好多朋友喺 MSN 度都掛上 "紅心 China"。原來 MSN 喺網名個位加入「(L)」後,會出現一個心形符號。內地好多 MSN 用戶收到信息,呼籲佢地喺網名前如此加上紅心,以表示支持北京奧運。

今朝一打開 MSN, 個個都整個 "(L) China",感覺怪怪的。

話說四月七日喺 France Paris 攪的傳聖火的活動,由於喺巴黎一站的火炬手金晶遭到遇襲,內地網民開始聲討在巴黎傳聖火的有關破壞及阻撓。有 D 人仲反智到話要其人之道還以其人之身,提議全球華人都不喝法國酒,不買 LV 等。甚至有網友話不買法國貨,不去法國旅遊,甚至不去 "家樂福" 購物等。

後來呢件事加埋 CNN 較早前主持人辱罵中國人事件,演變到國民為了表達不滿,決定顯示網民的威力!

其實對我來講,我真係好驚呢味民粹主義。

我好認同案內人隨筆個 blog 所講,中國人實在太脆弱了。人哋 CNN 就算真係唔公正咁報新聞,但試問你自己又好公正咩? Actually, we cannot judge what it is as we do not 100% understand what the fact is ...... 大家會否覺得,呢次連阿爺都要出動外交部去交涉一間外國的電視台,其實,yes,其實,其實真係好鬼小題大做呢?

So, 我自己將 MSN 的網名 display 改成 "(L) the world!" 而不是 "(L) China"。試問既然我哋的阿爺用得 "同一個世界,同一個夢想" 來做口號,我哋又點可以攪嗰 D 咁民粹 / 民族性既 slogan 呢?

話晒呢個係和階社會嚟嘛 ......

2008年4月17日星期四

A 股仲未捨得反彈!不過,波係圓既 ......

尋晚華爾街急升後,恆指今日亦高收。恆指今日升咗成 381 點,收市報 24259 點。國企指數上升 294 點,收報 12888 點。12888,一易發發發,認真好意頭!

個市呢期反彈其實仲未似樣,冇乜力水。成交今日好過尋日少少,有 726 億。

估計成交少的原因,除咗係大家怕咗次按餘波未了外,內地 A 貨仲未捨得反彈亦有很大關係。

睇番今期美國嗰面,就算經濟公認係衰退,股市就未衰未退。冇咁壞的消息仲可以當好消息炒。睇來大選年果然有「無形之手」托住個市。花旗國頂得住,香港可以冇咁傷。

但睇番內地個市,醜樣到不得了。滬深兩市今日又創近期新低,人心超級虛怯,滬指今期仲失守 3200 點,家下大家都話要穿 3000 點。市場信心崩潰,散戶絶望離場。

內地股民喺呢 D 咁絶望的情況下,其實海外的投資者 (或投機者?) 係比較睇好者。君不見 A50 基金近期已有大戶入市?不過大戶今次暫時都要做蟹,大家都唯有做長線投資者。

滙市方面,美元可以話大上大落。歐元啱啱創完新高,就即刻急跌。英磅跌破圖表上的扇形後反而彈番上去。古靈精怪。睇來除非可以長時間鴿住個市,如果唔係都幾難食呢期個浪。

******

傍晚聽到新聞,話陪住我地長大的著名資深體育記者伍晃榮突然逝世,享年六十七歲 (亦有說是六十八歲)。很是突然。仍然好記得伍晃榮的金句:「波係圓既!」。伍先生的獨持報導體育新聞的方式已經成為我地呢代既集體回憶。希望佢的屋企人保重。

讓我們懷念一下 ......

TVBN 伍晃榮逝世消息


伍晃榮最後一次任體育主播


精彩講波


伍晃榮攪笑報導 - 綿羊大賽

2008年4月16日星期三

冇咁壞的消息 = 好消息

市場預期壞消息不斷,個個都以為美國企業陸續來緊的業績會衰到貼地。

就係因為開咗幾單壞消息,個個都冇晒期待。突然間,今晚就整幾單「好消息」過你睇下!

JPMorgan Chase (摩根大通, JPM) 盈利雖然倒退五成,但係於預期的上限,冇咁壞的消息即係好消息。可口可樂 (KO) 盈利有所上升,所以更加肯定係好消息!

好消息之下美國個市今晚又做成點?喺寫呢篇 post 既呢個 moment,做得唔錯,升咗差唔多 180 點。加埋尋日 DOW 升咗 60點咁上下,上個星期五跌咗的二百幾點已經收復番大部份失地。

美國三月份的 CPI 符合市場預期,升咗 4%。反觀內地三月份的 CPI 就漲咗 8.3%,雖然有所回落,但離溫總的全年目標 4.8% 爭好遠,大家都估從緊的宏調措施會繼續,短期內睇來都唔會點變。

結果今日內地 A 股跌升跌升跌,收市都係要跌約 2%。

香港個市嘛 ...... 家下都係冇乜個性架喇。朝早睇美國,下午開市睇內地個市。當內地個市收市後,又睇下歐洲嗰便個市點開。今日恆指結果都係上升無力,微跌 23點。

呢排香港個市都幾悶。成交又少,今日仲得番 646 億左右。

睇來港交所 (00388) 現價 $143.1, PE 約 24 倍左右其實都算係貴。今年一來成交少,二來又冇乜新股上市。

我手頭的貨:
# 02823 A50 基金 - 暫蝕 3%
# 05022 中移動 call 輪 - 暫賺 10%
# 07223 恆指牛證 - 暫蝕 6%

今晚香港時間零晨 2:00,美國嗰便聯儲局會公佈一 D 關於經濟的數據。又睇下美股係咪可以 keep 到個升勢?

個人睇番個市,美股若今晚可以 keep 到個勢,港股都有可能會衝番上去高 D,再一次挑戰 25000。個人對個市都係睇淡,不過都係覺得會升穿 25000 夾一夾 D 淡友先跌。

反觀滙市,美元開始反彈。睇下今次反彈的力度又有幾大先?

小弟所有外滙已平倉。

******

真係估唔到有線財經台的 Money Cafe 話咁快就做咗一年。晚晚睇唔同的 professional 同菁姐同有線主持喺度吹水,有啟發性得來又唔會悶。希望呢個節目長做長有。

******

呢排流感真係好勁,我都患咗感冒。各位保重身體,健康搵錢。

Cheers!

2008年4月15日星期二

回暖吧

今晚 DOW 開市終於唔駛點跌。因為美國生產物價指數 (PPI) 合符預期。4 月份紐約聯儲製造業指數 (Empire Manufacturing) 比市場預期好,預期 -17.5,開出來 +0.6。而大企業 Johnson & Johnson 出咗業績都唔錯,喺預期的上限。仲預期來緊的下季業績會有所增加。美股喺我寫呢篇 post 的呢一個 moment 升咗約 30 點。

睇來投資者的信心開始慢慢恢復。後市可以亦步亦趨咁睇好。

今日香港個市其實今日一開市都謊失失咁跌到去 23613 ,同時間中午前內地股市亦創年中新低。好友其後開始於此位置即 23600 左右建立防線,兼夾內地股市抽升,恆指收市倒升 90 點,報收 23901,成交繼續縮小,得 714 億。

內地個市傳有六大暧風:

1) 證監會再批股票型新基金
2) 專戶資金本周起蜂擁入市
3) 傳紅籌股回歸 A 股進程暫停
4) 國有資產監督委員會主任李榮融對國有股減持有承諾,叫股民不用擔心
5) 銀行共未收到緊縮房企信貸新通知
6) 明日公佈 CPI 提前泄漏,再加息可能性不大

So, 睇來內地股市亦開始回暖吧。

正所謂內地好,香港好。香港股市短期應該可以審慎看升。

外滙方面,昨日買入的歐羅已止蝕。反而小弟持續睇淡的英磅超級腳軟,去到 7 周低位,家下報 1.9633。小弟會小注做淡,但慎防佢會反彈,止蝕設於 1.9655。

2008年4月14日星期一

呢個禮拜港股要受考驗

今期個市真係似隻披住牛皮的熊,港股上星期五仲升成差唔多 500 點,但借勢美股周五大跌,同埋內地地產股集體崩潰,今日恆指就一插冇咗 856 點,收市報 23811 點。成交奀 chi chi,得嗰 749 億。

跌市成交減,表示大部份有貨的人都唔捨得去沽貨,或表示買家想睇定 D 先買貨。

睇番美股呢個 moment 的表現,牛皮到不得了,DOW 上落唔夠 20 點。今晚好壞消息夾雜,美國第四大銀行 Wachovia Bank (WB) 由盈轉虧,甚至息都唔派;而美國零售數據卻上升。市場經過上星期大跌後,都唔知做淡定做好會比較有著數。

呢個禮拜美國方面有大把數據出爐,包括星期三公佈的美國消費者物價指數、星期四公佈申請失業救濟金人數、同埋唔少美國的金融機構及其他大企業如 Coca Cola, Microsoft 同埋 Google等等會即將公佈業績,睇來外圍亦會持續風起雲湧,呢個禮拜港股需要接受考驗。

個人堅持香港個市底唔弱,反彈應該仲未完。大家都覺得恆指過唔到 25000 點,但我徧要看好,吹咩?仍然覺得大戶會夾淡倉,反彈冇理由彈咁少。

除非手上牛熊證或窩輪持貨跌超過 30%,否則未想止蝕住:

# 02823 A50 基金 - 暫蝕 1%
# 05022 中移動 call 輪 - 暫賺 7%
# 07223 恆指牛證 - 暫蝕 5%

反觀小弟上星期五話要沽的英磅,陰功,終於來個反彈,仲去到我的止蝕位 1.9850。睇來呢舖都有 D set 錯止蝕位。其實外滙的止蝕應設為 30 個點子就算,但自己衰心紅,set 個 stop lost 成百幾二百個點子,真係搵自己來攪。

Anyway, 呢個 moment 英磅反彈果然無力,仲跌番去 1.9844 左右。不過我剛剛開咗 EUR/USD 好倉 @ 1.5834,都係唔開英磅新倉住。呢次 EUR/USD 以 30 點子作止蝕。

******

尋日六合彩頭獎 5000 萬就咁俾人一注獨得,攪到成日恨中六合彩的同事今日由朝呻到晚,話點解何必徧徧不選中佢?唉,我夠係咁諗啦!但做人唔可以話下下要運氣關照既,自己的分析同埋方法都好緊要。Mark Six 始終都係睇運氣,我都係花多 D 精神同時間繼續做番股市同埋滙市好過。

2008年4月12日星期六

美國醜樣業績陸續有嚟

喂喂喂!又出業績喇!

繼美國鋁業 (AA) 喺星期二出咗個樣衰 Q1 業績後,今晚輪到反映美國經濟寒暑表的大企業通用電氣 (GE) 喇!第一季的 net income 比起 2007 年同期跌咗 6%,而一年盈利跌成 12%。

其實我覺得唔算多,不過公司的管理層於三月的時候,曾經強調第一季生意應該冇問題。家下出嚟的 result 却 much lower than expectation,咁即係點先?而美國另一個公佈的數據,係密歇根消費者情緒指數。今晚公佈仲跌到二十六年新低!

So,今晚美國個市場一於唔俾面,一於跌到你唔死都要一身潺。GE 開市已經跌成 10%!DOW 一開市就跌成 160 點,反反復復後寫呢篇 post 的 moment 仲跌到去低位報 12343,即係跌咗 238 點!

嘩!咁攪法,除非美國今晚可以反彈,否則星期一香港個市點都要插一插。

就算小弟買的貨仲有少少 profit,但睇來星期一插都應該難逃一刧:

# 02823 A50 基金 - 暫賺 5%
# 05022 中移動 call 輪 - 暫賺 28%
# 07223 恆指牛證 - 暫賺 11%

估計好有機會呢次會由賺變蝕。問題係,星期一開市需唔需要止蝕。

未諗到。個人覺得香港個市其實唔弱,市底幾強,應該可以去到 25000 夾一夾班淡友。恆指今日收報 24667,都升成接近 500 點架。

但受美國拖累,今次可能都係爭少少先到 25000。

睇來,都係睇下聽朝美股收市點先算啦!

講番我最愛拋售的英磅。尋日下午曾經去到 1.9845,我於 1.974 落的盤於 1.9830 自動做咗止咗蝕。小弟於 1.9815 再沽過,非常好彩,己經收復全部失地。呢個 moment 磅仲去到 1.9698,應該話係有賺先啱。不過滙市波動超級大,乜都有可能發生,都係小心 D 好。

Cheers!

2008年4月10日星期四

人仔破七望六‧同你唔係好熟

睇來恆指家下亦步亦趨咁要誓要沖破 25000。個市跌咗兩日,結果又反彈番!恆指今日收報 24187,升咗 202 點。國企指數就升咗 134 點,收報 12998,俾 13000 頂住。

大起大落已經成為 A 股市場的特色。尋日滬深兩市跌近二百點後,今日內地指數普遍都升超過 1%。

小弟睇的目標仍然維持喺恆指會升穿 25000,可能起到 25700。到時會點就到時先算。

手頭的貨:

# 02823 A50 基金 - 暫賺 4%
# 05022 中移動 call 輪 - 暫賺 16%
# 07223 恆指牛證 - 暫賺 2%

今期要講 sure win 的投資,相信非人民幣莫屬。美元兌人民幣今日終於跌破 7 算,破 7 望 6,下個目標會係 6.8。 然後 6.5,再繼而向 6 算邁進!

簡直好似做 project 咁 phase by phase,今日人仔又步入一個重要的 milestone。人仔係十幾年來第一次去到 7 算!

家下好多人話 HK Dollar 應該要 unpeg with US Dollar,而且應該 peg 落人民幣度。老實講,我就唔係好認同。如果港元同美元脫勾,一定唔會同人仔掛勾,因為如果咁樣的話,咁不如唔好要港元淨係要人仔算數,何苦又要 keep 港元?

所以人民幣同港元都唔係好熟,保持距離繼續。

由於美元轉弱,連新加坡政府紙都話允許坡紙升值。

任總話美元轉弱,只係會影響通脹好少。我都唔係咁認同。美元轉弱,乜嘢進口入香港既嘢都會相對升值。

家下百物騰貴,尋日去超級市場轉咗個圈,有個阿婆喺度破口大駡,話做乜六盒裝紙包菊花茶今個星期可以比上個星期又貴咗幾蚊!

Anyway, 講番尋日落咗盤的英磅。由於今早市場傳言在利率決議前英磅空頭平倉,英磅反彈到 1.9840,激死,touch 到我的止蝕位 1.9830。不過今晚返來睇到 1.9845 沖咗幾次都沖唔到上去,於 1.9815 我又忍唔住落咗盤沽,寫呢篇 post 的時候磅又跌番落去 1.9775,暫時收復部份失地。啱啱英國公佈咗減息 25 個基點,同市場預期一致。市場正注視下星期二的通脹數據。

Good luck !!

2008年4月9日星期三

英磅 ─ 逢高必沽

今日股票個市好悶。買佢升又升唔到。本來今朝早都升過百零點,但受內地個市轉差所影響,香港恆生指數都守唔住 24000,收報 23984,跌 327 點。內地就更人心虛怯,滬深兩市食完 lunch 後瀉近 200 點,兵臨城下。

香港個市於 73 年經歷股災時,最高都跌過成 80% 架。家下上指 A 貨由 6000 點跌到 3300 點左近,都係跌咗差唔多一半啫 ...... 唔通仲未見底?都唔奇。雖則話家下 A 股 PE 都係接近廿倍,發展中國家來講唔算貴。但如果遇著大大大大大跌市,玩下手可以去番 8 倍都唔係未見過。即係話今日的平,可能係聽日的貴。

手頭的貨暫時都守得住,as so far 都覺得會夾一夾淡倉,決定再坐一會。

# 02823 A50 基金 - 暫賺 2%
# 05022 中移動 call 輪 - 暫賺 8%
# 07223 恆指牛證 - 暫蝕 3%

股市咁悶,不如睇吓滙市。其實英國個樓市唔好得美國有幾多,而且有數據顯示英國人的負債比率其實都唔細。所以呢嘢美國次按,風眼可能已悄悄由美國橫渡咗大西洋,過咗大不列巔。

UK 前晚公布乜鬼 Halifax 房價指數,麻麻地,下跌 2.5%。大家都擔心英國可能會再次減息。磅呢幾日又再跌過。小弟前兩日都沽咗 GBP/USD,都執到少少錢。

今日下午英國出個好過預期的工業生產數據,引致磅有個小小的反彈。英國月度貨幣政策會議亦剛剛開始咗,為期兩日。小弟啱啱於 1.974 左右再次落咗沽盤,博佢又再減息。呢期目標睇遠少少去到 1.94!止蝕放於 1.983。如果升破 1.983,15 分鐘圖顯示似營造一個圓底,可能會回升 1.998。

不過就算短線回升,2 算仍係一個好有阻力的阻力。美元跌,佢升得唔多;美元升,英磅一定跌。睇來英磅果然係今年逢高必沽的佳品。

2008年4月8日星期二

Q1 業績第一擊,美國鋁業冇出息

美國鋁業 (AA) 為美國首季業績公佈的第一間公司。不過開出來的結果唔多老嚟,第一季獲利驟降 54%。原因為能源成本提高、美元走軟以及金屬價格下跌所拖累。昨晚美國鋁業喺美國收市報跌 4% 左右。今日隻中國鋁業 (02600) 亦順便借勢又學人跌超過 4%。認真冇性格。

受住市場氣氛所影響,大家驚住美國來緊的樣衰業績會陸續有嚟,兼且個市都連續升咗幾日,獲利盤擁現。恆指今日收市報 24311 點,下降 267 點。國企指數收市報 13196,跌 224 點。

內地方面,滬深兩市今日總計成交近 1400 億元 (人民幣),創二季新高。滬深 300 發神經又升超過 1%,而上證就只係微升 12 點,險收 3612 點。

如果信成交走喺股價之前,睇來內地 A 股真係好有機會會有個似樣的反彈。另外,中國鋁業 (601600) A 股就有型到脾,話知你 H 股跌咁多,都一樣照升多過 1%。咦?睇來隻 #02823 A50 基金未必只係得幾日貨仔喎 ......

其實個市自 3月18日反彈到而家都升咗差唔多成 4000,原因為大家都預期壞消息應該出盡。家下美鋁出 D 咁核突的業績,如果接住落來的美股業績公佈繼續係咁差的話,都咪話唔係一盤冷水照頭淋。到時個市又會再插落去,開始邁進熊市三期的人間地獄。

我個人暫時仲未轉呔,仍然睇升,目標為 25000 以上。我估好多淡友會開始累積淡倉,尤其係 25000 會紮重兵。經驗話俾我知,好有可能會有班大戶來夾一夾呢班淡友掠掠水先,再玩反手放貨沽返落去。

當然,呢個只係我個人的估計。準唔準就真係 I don't know 喇 ......

今日個市咁靜,正所謂生意淡薄,不如賭博。今晚三千幾萬的六合彩又冇人中。禮拜日的六合彩一注獨得估計派彩有成五千萬!!!嘩,即係話就算來緊呢期有五個人中,每注都有成一千萬喎 ...... 呵呵,發財埋便呀唔該!

2008年4月7日星期一

唔理牛熊線,最緊要賺錢

今日清明節後復市,仙人庇佑,恆指又開升,收市報 24578,升 314 點。國企指數收市報 13419,升 282 點。內地滬深 300 指數收市報 3845,升咗成差唔多 200 點,超過百份之五。

個市持續反彈,財經台話恆指收市己經上番條牛熊線。

所謂的牛熊線,就係指嗰條 250 天平均線。

唔明點解 D 人係都要用呢條 250 天線來做牛熊分界線,而唔用 100 天線、200天線,又或者 365 天線、甚至係 1000 天線?好似呢個零兩個月咁,恆指成日都會成日跌破 250 天線後又升穿,又或者係升穿後又跌過。有時就係咁咦 high 下條線。反反覆覆。

咁你話家下係牛市定熊市呢?

睇你點睇。我就比較信杜氏理論,覺得家下係熊二,即熊市二期。

其實唔好理佢乜野線,有錢賺就得。喺熊市,一樣有賺錢的機會,就睇你識唔識把握。尤其係熊市二期,絶對會有一個極地報復性反彈的機會。

小弟 98 年第一次買股票,嗰陣啱啱就係熊市二期,97 回歸憧憬炒完後,又遇上亞洲金融風暴,嗰 D 中資股跌到面無血色,慘無人道。嗰陣時喺銀行做的同事個個都話咪買股票。結果我呢?就聽咗老豆講話個市跌得咁勁,可能有反彈,就膽粗粗買咗隻儀征化纖。結果第一次買股票就賺個 double! 放完貨後點知中資股繼續插,如果嗰陣冇放咁就好快倒蝕一半有突。

So, 買股票就好似維京人做世界咁,需要有策略,對突襲目標全面了解。另外,亦要隨時跳車 (或跳船會比較啱維京人個造型多 D)。

要知道經過一場大費周章的計畫後,維京人向來聞名的作風就是臨時在海上叫停,全盤推翻計畫。

******

Anyway, 癈話完一輪後,不如講下自己呢個 moment 點睇個市。我估家下個市的漲勢應該仲有幾日貨仔玩下,第一目標仍然維持喺 25700 左近。尤其係大陸個市可能會有個幾好的反彈。話晒而家 A 股平均 PE 都係二十倍左右,喺發展勢頭咁好的內地市場簡直係超值!

手上持貨:
# 05022 中移動 call 輪 - 暫賺 21%
# 07223 恆指牛證 - 暫賺 7%
# 02823 A50 基金 - 暫賺 8%

尤其睇好 A50 基金,賺 A 股升勢之餘仲賺埋人民幣升值!正!

******

今日除咗上市的股票 number 變咗 5 個位外,仲有單新聞係關於港交所的,就係其股票由原來一手 500 股變到一手 100 股,散戶可以用更少的錢去買貨喇 .....

Good luck !

笑爆咀 ─ 熊日

喺呢個咁爽的清明節假期,收到朋友送來李克勤首 "紅日" 的改編歌詞,笑爆咀。特別登錄如下。

******

摩根、Goldman、Citi、德銀那個信得過?
徬徨時我有蟹貨獨坐一角像是沒協助

在某年 那四叔講過
記得要 追call 追call 落力在春天買貨

一生之中高峰股災 我也要走過
從何時跌市有你四叔跟我地獄內唱和

像熊日之歌 老散都知錯
結伴行 股災也定能踏過

讓晚風 吹雞蛋殼
伴送著清香一束 站在IFC祭我
望佢升 偏偏估錯
個股市每到高處回落...Fall
快要輸死我 woo woo

末日就似即將來臨
末日令我輸光頭痕
絕望大市使我面對未來沒信任
別流淚 心酸 四叔輸得甘過你
佢定能 一生蟹著陪伴你

******

如果原改篇者咁啱睇到呢篇 post,請通知我可否喺度同人分享, 我個 email: marketviking@gmail.com 同 web site: http://marketviking.blogspot.com/

謝謝你的創意,帶俾我一個笑到碌地的假期。哈哈!

2008年4月3日星期四

咪執輸!

果然跟成交額買貨唔會買錯!

我講緊乜?心水清既你可能已經估到。我講既咪之唔係今日佔據活躍榜 number 1 的 A50 基金囉 (#2823) ......

呢隻野過去三個月平均的成交都係得千幾萬股,但今日成交就有二憶八千萬股!尋日成交已經突然暴升,成交額有成四十幾憶元,今日嘛 ...... 真係嚇人一跳,有成接近五十憶的成交金額!

點解呢兩日突然間咁大成交?你可以話有好多人或者有大戶睇好,所以買貨。但你亦可以解讀為好多人唔睇好,所以賣貨。

奇就奇在佢呢兩日股價都唔係點大升大跌。

可能有朋友唔知 A50 係乜野公司來?其實 A50 係個基金來既,專門買大陸 A 貨。理論上內地 A 股升,佢都會升!

家上大家都估內地個市開始見底,又傳內地會減印花稅。睇來大家都入定貨先。

我都唔執輸,喺今日朝早 $17.42 入咗貨。呢個算係 lunch 前既高位。點知下午一開市返來見過 $17.94,收市報 $17.86,開心!

另外,尋日講過話今早會做野,所以都買咗中移動 call 輪 #5022 @ 0.109,同埋恆指牛證 #7223 @ 0.485。希望經過聽日清明呢個氣節後,下個星期個市會開始好轉。

恆指今日收報 24264,意頭就唔係幾好架喇 - 「易死」,「易碌死」。不過百無禁忌,我估個市好有機會反彈番去 1月16日跌落來個裂口,即 25837 咁上下。查番紀錄,1月15日嗰日就係收 25837,而1月16日係跌成千點,收市報 24450。

******

五位數字證券代號將於2008年4月7日即下星期一開始實施。要查閱更詳盡既資料,可以瀏覽香港交易所網站 http://www.hkex.com.hk/infra/5digit/5digit_c.htm

******

內地亦開始第一次將清明節列為法定假期,制造了一個小黃金週。祝假期愉快!

2008年4月2日星期三

確認反彈,候高再做淡

尋晚美國大升,港股又連升幾日後今日再借美股之力又再升,收市報 23872。

其實今朝恆指都升過千點,最高去過 24195,但後來俾內地個市由升變跌超級醜樣走勢嚇親,臨尾就報升 734 點。

睇來港股短期向上的 momentum 應該好過向下的 momentum。不過我估就算係升,都會俾大陸嗰邊個 mood 影響而升得唔夠勁。

呢期的升市,正如我較早前所講,係熊市的正常反彈。而呢個反彈,應該都會幾勁。唔排除去到 27000。

雖然我係睇淡,但都不敢貿然做淡。話晒趨勢係你的好朋友。更何況 "上升的趨勢" 己經做咗成個禮拜:朋友都入咗你屋 lor,唔通仲唔招呼下人咩?

So, 本身做淡的我,今日都做咗止蝕。於低位 $0.23 放咗熊證 #7269。收市收 $0.26。蝕咗錢。

巴菲特的有名兩大炒股規則:

1) 唔好輸錢;
2) 切記第一條規則。

所以止蝕都係唔想 potentially 輸更多的錢。

家下炒 swing 都要轉身快先至掂。買咗,得就得,唔得快 D 走就唔駛慌失失,遲咗一日走都會隨時有所損失。

My prediction: 先睇恆指去到 25000 左近再試一試做淡。如果衰咗,就到時再睇下點先。

明天可能會心思思想入市。暫時考慮入番 #2888 作長線坐鎮,同埋考慮 #941 的 call 輪 #5022 或恆指的牛證 #7223。當然,明天市場好有可能會追番 D 內地基建股炒落後。

如果睇好內地有強勁反彈,要買 A50 中國指數基金 #2823。留意番呢隻野今日有大額成交,應該係機構投資者 (或投機者?) 卦。不過我覺得其實炒內地 A 股的風險比炒香港的窩輪 / 牛熊證還要大。

******

最心痛是,買得太遲。

呢個禮拜人民幣又升到阿爺都唔認得。上水的藥房價去到 884 !! 即 1000 蚊港紙只可以換到 884 蚊人民幣咁大把。

尋日候任世銀副行長林毅夫仲 predict 年底人仔會去到 1 美元兌 6.5,嘩!咁攪法,港元離人民幣 8折計數亦指日可待。

係咪阿爺同硃仔傾掂數?睇來都係早 D 唱咁 D 人民幣先得 lor ......

******

今日收到讀 U 的同學仔的一個 message,話有位同系的另一位同學因為 cancer 於昨日離開咗大家。我初頭仲以為係愚人節的玩笑,後證實唔係。雖然我同嗰位同學仔唔係好熟,但知道咁的消息都有 D 神傷同感慨。希望大家賺錢之餘都要注意身體健康。保重。

2008年4月1日星期二

唔係講笑,美股第二季開市大升

真係唔講得笑,寫呢篇 post 的時候 DOW 急升差唔多成 300 點!

睇來今日香港個市都有 D 春江鴨收到風。

今朝香港個市都係升,但當中午過後,大家睇到大陸個市插到面無血色,個市即刻整個倒跌百零點俾你睇下,乘機又夾下好倉。但估佢唔到的係收市時又升番上來,又輪到淡友中伏。恆指收報 23000 樓上。

睇來反彈持續。可能要短期看好。(但我仍長期看淡)

我手頭隻熊證今日又升到 $0.4 左右後又唔上,結果收市得番 $0.35 左右。如果今晚美國收市持續咁升,睇來呢隻熊證聽日都難免一插。聽日應該要止蝕。所以買親牛熊證或認股證我都唔敢買好多,仲次次都要有預咗輸晒的心態先得。

不過女友話咁既心態唔要得,話晒一分錢都係一分錢嘛 ...... 可能男人相對女人都係比較有 all or nothing 的賭仔性格?

******

果然老鼠愛大米。一踏入鼠年,就即刻掀起一片搶購大米熱潮。頭先八八卦卦走咗落去超級市場轉咗個圈,果然乜米都冇!場面悲壯!


<圖為今日李生旗下某屋苑內的超級市場的食米貨架>

睇來商品市場近日大跌都係 pull back 而已。我都幾信 Jim Rogers 所講商品市場會有多五年起碼的大牛市。不過我唔識炒商品期貨,得閒留意下先。

家下百物騰貴,連朝早幫襯開的美心個通粉都加咗價 $0.5!中午喺大陸食飯雖然無加價,但人民幣升值,即變相加價一成!夜晚食飯間茶餐廳仲變態,話就加一蚊,但凍飲由原來唔駛俾錢變咗要加兩蚊,即係 total 加咗成三蚊一餐飯!生活迫人,慘絕人寰!

祝各位明天可以旗開得勝賺多 D,以對抗通脹!

Cheers!

******

P.S. 「要我記得既,我永遠都會記得。」-- 今日係哥哥去世五周年忌日,希望大家關注一下情緒病。懷念哥哥,風繼續吹。

打你個電郵地址,收維京人最新的網誌更新:

Delivered by FeedBurner

HSI, Warrant, Warrants, Hong Kong Stock Market, HK Warrants, Warrants com, Stock Blog, Hong Kong Warrant, Warrants Hong Kong, and Warrants, Stock Warrants, with Warrants, 股票, Index, 香港 股市, 恒生 指数, 香港 股市, Stock Market, 香港 股票, Warrants Trading, Options Warrants, Stock Purchase Warrants, Stock Warrant, Warrant Coverage, Bull Bear Warrants, 股票 技術 分析, Stock Technical Analysis, Technical Analysis, Technical Analysis Of, Stock Trends, Forex, Foreign Exchange