匯控向下挫、道指向下瀉、歐羅向下滑

維京人一早已經講過，恆指跌穿 13800，沽得。尋日跌穿咗，今日個市玩六連陰後嘅反彈，可惜反彈無力。午後一度抽上至萬四點樓上嘅，但跌穿 13800，短期不得好死，最後收市咪又係守唔住 13800，恆指收報 13704點，升 36點或唔夠 0.3%。成交 662億元。

今日港股走勢咁肉酸，其中一個元兇非匯控 (#00005) 莫屬。摩笛一出，邊個走得甩？大拿拿將大象目標價由 $75 削至 $52，即 3 成咁多喎。結果 HSBC 收市創七年新低，下挫 4% 險守 $70。

美國公布咗 12月零售銷售額達 3432億美元，按月下跌 2.7%，遠遠超過市場預期嘅 1.2%，而且仲係連續第六個月下跌。 寫呢篇 post 嘅時候，DOW 已經受消息刺激所影響，跌超過 200點。

如果美股跌勢唔能夠扭轉，聽日港股一定大插。淨係睇匯控 (#00005) 嘅 ADR，今晚喺美國嗰便已經比香港收市價跌超過 7%，其餘中移動(#00941) 等亦跌超次過 4%。嘩！聽日匯控咪即係已經去到 $65 左右？

聽日港股，肯定可以插水。尋日維京人話恆指第一個目標先睇 13300，家下拉低 D，睇先跌破 13000點。理由係大戶似係借匯控造淡。

市場今日另一焦點係歐羅。星期四晚歐行會議息，預期減 25 至 50點子。歐洲今日公布生產數據差過預期，預期歐行會減息減得比較狠，歐羅兌美元今日己由 1.33 急挫至家下1.316 左右。呢排維京人睇嘅關鍵位都好準，今次睇歐羅嘅關鍵位係 1.3。 應該守得住，或起碼先嚟個像樣嘅反彈。否則， 又係可以放心沽歐元，目標價 1.26 至 1.27。

Good luck！