Obama 明日上任，Stock Market 今日靜局，HSBC 倫敦暴跌

今日係 George Bush 在任嘅港股最後一個交易日，喺美國同時亦係馬丁路德金日假期，成日都靜過鬼。加上就嚟過農暦新年，大家都係抱觀望態度算數。

恆指今日早上承接美股上星期五嘅升勢先高開，其後受「今期傷心股」匯控 (#00005) 弱勢所拖累，一度又倒跌超過 100點，其後尾市回穩，恆指收報 13339點，升 84點或 0.64%，成交又縮小，得嗰 379億元。

呢 D 咁靜局嘅時勢，好容易俾大戶舞高弄低。唔好以為過年前個市會靜靜咁過，大家小心。

今期焦點唔駛問緊係匯控啦。上星期係咁俾大行唱淡，又似被人迫佢去供股集資咁，點知匯控喺業績期前一個月又不便多說，令到佢變成被打無還手狀態。今日散戶卻以血肉長城頂住，真係血跡斑斑。

匯控今日最低曾做 $61.3，最後收報 $62.3，跌 3%。上個禮拜維京人先喺度講睇圖有機會見 $50。寫呢篇 post 嘅時候　...... 噢，sorry，又接近開口中，喺倫敦嗰便曾大跌 13%，折合約港幣 53蚊咁上下，同大摩嘅目標價 $52 爭少少呢。大家可以喺 Yahoo! Finance 以 Stock code "HSBA.L" 作搜尋。希望有貨喺手嘅朋友唔好暈低！

香港公布咗失業率，比市場預期差，為 4.1%。外圍經濟轉差，外向形經濟嘅香港點會走得甩？呢排行街見到人頭湧湧，消費意欲好似好旺盛咁，大家簡直係想儘情享受最後的歡愉。正所謂一旺淡三墟，過埋年後情況不敢想像。

喺逆境中，信心好緊要。阿 Obama 亦知道救市難，唯有先打定針話個市唔會咁快會好，要大家勒緊褲頭過緊日子。Obama 重叫美國人重新認識咩叫責任。幾好喎，講中 point，呢次金融海嘯某個程度上就係部份金融機構 / 政客唔負責任，係咁放貸或叫人放貸所做成。

好！等待明天嘅奧巴馬上台，睇下有乜符 fit 先！

Cheers！