設立最低工資是見樹不見林

今日維京人心情真係唔多好，點解？之唔係今日阿 Donald 宣佈施政報告，話要攪最低工資咁囉。雖然維京人都唔係做生意，但如果識維京人嘅朋友，都知道小弟一向都以市場為主導。如果唔係呢個 blog 就唔叫做「市場維京人」啦。既然係市場主導，一切阻礙市場自由度嘅行政措施基本上小弟都係唔係好認同。

我成日都唔係好明，設立最低工資係咪真係幫到香港比較工資低嘅一群。為咗整理自己嘅思維，試試整理一下以下嘅分析。以下所講嘅市場價係指若沒有最低工資，僱主願意付出而僱員願意打工嘅工資水平。

情境一：假設最低工資 = 市場價

僱主方面：既然呢個水平同市場價相差無幾，僱主覺得要請人就要付出同最低工資一樣嘅價錢。設立最低工資喺呢個水平對企業影響唔大。

僱員方面：如果一個人有能力，咁當然可以搵到份比最低工資高人工嘅工啦！相信大部份香港人亦屬於此類。如果一個人無咁好能力，咁但係佢又想搵工喎，佢唯一可以競爭嘅就係工資。除非佢壓低自己嘅工資，否則僱主唔會請佢。如果設立最低工資，呢類人只會失業。

情境二：假設最低工資 > 市場價

僱主方面：企業一定會為咗降低成本，以裁員節省開支，或改變營運模式以取代勞工，例如設立自動櫃員機，減少服務人員等。大企業問題一般影響也不大，但如果係中小企，工資一般都會佔營運成本一個比較高的百份比，頂唔住嘅唯有執笠。無論企業是否頂得住，如此一來，失業人口勢必提高。

僱員方面：當實施最低工資嘅初期，如果係大企業，僱主一般都會睇定 D 先，未必會咁快有咩人事上嘅改動。過咗一段時間，如果工資只佔企業營運成本一小部份，自身身價比最低工資低嘅僱員（即能力未達到僱主值得以最低工資俾人工佢嗰班人），都可能可以繼續混水摸魚喺大企業度混落去。如果喺中小企打工嘅員工，則好大機會當最低工資實施嘅時候，就已經俾人炒咗！！

情境三：假設最低工資 < 市場價

僱主方面：如果用最低工資請人，由於最低工資少過市場價，所以應該請唔到人。企業唯有提高至市場價先會有人 show 佢。不過唔排除有 D 能力冇咁好嘅人會降價以吸引僱主。咁樣對僱主點都係多咗選擇。

僱員方面：如果企業以最低工資請人，正常僱員都唔會去做嗰份工。唯獨是能力比較差嘅人，佢仲可以降低自身嘅身價，同 D 俾佢能力高嘅人競爭。

設立最低工資只會對那些想混水摸魚的人有利

睇過晒上面嘅分析，似乎設立最低工資，只係會對社會上最窮最沒經驗同埋最沒有生產力，而又想混水摸魚嘅人有利。即係話，有關人等嘅能力，未達到僱主值得以最低工資俾人工佢嗰班人而已。

咁當然，我哋又唔可以忽視弱勢社群。

如果有人嘅能力真係唔多掂，而且個人能力亦冇辦法達到付出最低工資僱主嘅要求，而僱主可以提供嘅又唔可以滿足一個人生活最基本最基本嘅需要，咁點收科？喺香港，其實呢點真係唔駛擔心，因為其實香港亦已經有綜援制度，如果能力未達標，請找政府，而不應該找企業。

小弟堅持若設立最低工資法，睇牌面，立法者嘅眼光實情根本就係超級短視，見樹不見林。