維京人今日忙到抽筋，基本上都冇乜時間睇住個市，不過心情就非常非常非常愉快。呵呵呵．．．何解？之唔係小弟一向睇淡嘅匯控（#00005）一如所料，跌返去沙士價！今日暴跌，紅衫魚真係守唔住，仲同預期一樣樣跌破 $90。收市＄88，返番去沙士時嘅價位，一日瀉咗＄12.6 或 12.52﹪！
個市淡到咁，維京人卻贏了近期難得嘅一役！原因係喺今個月１３日個市大反彈，恆指一度升咗1500點時，小弟買咗匯控嘅 put 輪 #14312，今日大升 30%。如果以小弟嘅買入價 $0.188計，帳面已經賺咗約72﹪！
匯控暴跌嘅原因，其實都同維京人較早前所講嘅一樣：佢持有太多新興市場嘅投資喇，今期金融海嘯已經由美國殺到歐洲再撲落亞洲同埋其他新興市場度，預計佢嘅業績應該唔會好得去邊。匯控個價喺呢次海嘯中算係跑贏大市，照計佢冇理由會跑贏同業，個 PB 值仲鬼死咁高。今日大摩終於亦將佢嘅目標價調低到 $75，仲話佢可能會削減一半股息。
連匯控都失守，市場陷入極度恐慌，好友信心儘失。港股午後跌穿 13000點，恆指收市報12618點，跌1142點。原來恆指已返番去04年8月以嚟嘅最低位！塵歸塵土歸土，還原基本步，一切又好似由頭嚟過咁。之不過，呢嘢還原基本步係咪淨係返去４年多前就夠皮呢？定係話要返去沙士時？今日已經有唔少人牙斬斬，講話恆指今次起碼要跌至 8000點先至會見低！係真係假，真係天曉得。
日圓升至十三年新高，美元日圓曾報約 91。一日跌咁多，日股亦順勢跌接近一成，收報7649點，已經唔知係幾多年以嚟嘅低位。咁樣嘅還原基本步，問你死未！
維京人其實都好相信價值投資法，相信買優質股長遠應有可觀嘅回報。只不過小弟亦唔會買股作長線投資，理由有幾個：
1) 長遠投資要睇下幾長。好似日股咁都可以返番去十幾廿年前個位都唔奇。
2) 經濟蕭條可以蕭條好幾年，優質股亦可以有排都唔升，唔駛急住買啫。
3) 原本係優質股都可以因為經濟因素而變成劣質股。如果長揸，到你發覺佢係劣質股時相信已俾人質低。
4) 最重要係，我唔係巴菲特，適合佢嘅投資方法未必適合自己。假設佢有幾億，蝕一半雖然肉痛但唔會死人。我身家冇咗一半就就已經好憂柴憂米。
歐美股市今晚都出現恐慌，全線下瀉，真係好一個血腥嘅星期五。美股杜指期貨喺開市前段，急挫５５０點，跌到停板。杜指一開市已跌超過500點，寫呢篇 post 嘅時候就好番少少，跌二百零點左右。
無論今晚美股表現如何，小弟都可能會喺星期一平咗隻 HSBC put 輪 take 咗 profit 先。股市直插咁多日，今日已經有人睇匯控會去到 $60 甚至 $40。喺市場一遍睇淡氣氛中，大圍嘅諗法好有可能都係錯嘅。相反理論下個市下個星期可能會反彈。另外，喺北京開嘅歐亞峰會，可能各國會有 D 你做唔到嘅救市措施出現。所以有得食就食，唔係就罪大惡極。
今個周末開始轉涼，大家著多件衫。經濟唔好，無謂冷親唗錢睇醫生嘛。
祝各位有個愉快嘅周末。
沒有留言:
發佈留言