早走早著

維京人其實都好牆頭草，一時一樣玩無定向風。尋日先講完恆指有機會會去到二萬三千點，自己仲身體力行於七月頭約 $0.16 買咗牛證 #30289 (曾經跌到去差唔多 $0.11 !!) ，懶係實牙實齒咁。點知小弟今日見個市急升咁多，結果喺 $0.216 就放咗隻牛證，利潤為 35%。

放既原因好簡單，就係因為今期係熊市！喺熊市應該逢高做淡同埋買佢跌。買升有咁既利潤，都係早走早著著數。雖然小弟仍然相信恆指有機會去到二萬三千點，但值博率感覺上有限，加上熊市大起大落時時有，為免食驚風散，所以都冇乜所謂囉。

連升咗四日，今日香港個市仲嚟個大升，有貨的散戶應該都幾高興。恆指收報 22,532 點，升咗 658 點，或 3%。升得咁勁的原因為美國上星期油價跌番落去 130 美元，攪到大家心理上都好過 D。而今早外圍又做得幾好咁，台灣同埋南韓都升超過 4%，再加上下午傳出中投可能會入股 HSBC (#00005)，大笨象即刻變飛象，升咗 $4.9，超過 4%！大藍籌有咁既升幅，淡友今日冇啖好食。放工返嚟睇番新聞話 HSBC 已否認有集資需要，真係唔知呢單嘢會唔會炒一日就炒完。

內地個市亦做得好好呀。上證指數升接近 3%。主要為 "大小非" 解禁將會定期喺網站上披露。咁大家就會有個預期幾時市場會多咗咩貨。資訊清晰即不明朗因素減少，難怪股市會造好。離奧運越近，內地個市睇嚟有番 D 氣息。小弟手持既 A50 基金 (#02823) 雖然俾買入價跌咗接近 20%，但由於係長揸，所以唔會放。反而前排留意到 A50 好似比 A 股的指數走得慢咗 D，有可能會追番有關的升幅。明天會留意 #14120 等 call 輪。

呢排內地既治安俾人感覺好始麻麻地，唔知係咪臨近京奧有人想攪攪震。雲南昆明今日無啦啦發生巴士大爆炸，仲炸咗兩嘢，都幾得人驚！

另外，香港通帳繼續超勁，攪到繼維他奶後屈臣氏的員工都嚟擺工，唔知下次會唔會輪到可口 XX 或者 XX 可樂呢？至於今日亦有單新聞話油價高企，連巴士公司都話要發盈利預警報定案先。睇嚟高油會高通帳對大家的影響越嚟越明顯。

呢 D 新聞其實對市場氣氛亦有所影響。大家要留意，留意。

******

今日另外一單大新聞當然係偉仔同埋嘉玲結婚啦。小弟一向對嘉玲冇乜特別好感 (除咗佢喺大內密探入面的演技外)，只係覺得偉仔演技越嚟越精湛！不過小弟諗嚟諗去都諗唔明點解佢哋要去不丹結婚，要一大班朋友長途跋涉去到泰國又要再轉機先去到，認真奇怪。大明星的思維果然唔係我地會諗到。