人在中環灑淚時

今日環球股市又一遍腥風血雨。冇計啦，鬼叫美國嗰便唔爭氣咩？尋晚（星期一）晚公布咗 ISM 制造業指數，差到無倫，係26年新低，結果杜指巨跌 679點，或 7.7%。五日嘅升勢一日冇晒。感恩節假期後美國佬無可避免地又要面對現實，而現實又係何其嘅殘酷。

睇番港股，恆指又一次告別二十天線，萬四點企得一日咁大把又跌返落嚟。恆指收報13405點，跌 702點或 4.98%。慶幸成交唔算多，得385億元。國企指數則跌389點或5.27%，收報 7002點。港股結束連續四日嘅升市，期指低水約二百點。

恆指由 10月27日恆指最低位 10676點升上嚟，睇圖其實恆指亦做緊一個短期上升軌。今日嘅跌市似係反彈嘅回吐。小弟暫時仲揸緊 put，未到止蝕價。原因係大家都睇今個月基金會粉飾廚窗做好，而小弟就睇番今年三月、六月、九月應該要粉飾嘅月份都係報跌嘅，所以繼續唔睇好。

睇番內地個市，今個月係大小非解禁嘅高峰，股票有得跌冇得升。雖然阿爺救市救開有條癮唔想俾佢停，但以出口主導嘅經濟，唔係話你用救市方法就馬上可以變為一個內需型經濟。難怪連人仔亦要開始玩貶值，以幫補下出口嗰便。

維京人讀書嗰陣其實都好天真好儍咁，以為喺中環返工好似好卿香好似好巴閉，其實都係虛榮心作遂。結果都好神奇咁第一份工真係喺中環返工！細個阿媽話做銀行好嘛，薪高糧準又可以低息買樓。咁當然，喺 97年亞洲金融風暴後已經冇呢支歌仔唱啦。

香港話晒係金融中心，大部份銀行金融機構嘅總部亦喺中環，所以喺中環返工俾人嘅感覺亦係搵到錢。不過今時唔同往日，金融海嘯受當其衝嘅就係金融機構，真係世界輪流轉。家下租樓住都千祈唔好話俾人知你做 bank，玩下手個業主租俾做看更嘅都未必租俾你。

銀行業係今期嘅裁員重點。繼 HSBC (#00005) 後，前排啱啱玩完供股後嘅渣打 (#02888) ，香港呢便就裁員約200人。諗下諗下都覺得自己好好彩家下唔係做銀行，唔係嘅話呢舖就真係人在中環灑淚時。

最後同場加送 youtube 搵到嘅「人在旅途灑淚時」，請各位俾人炒嘅、就嚟俾人炒嘅、暫時仲唔駛俾人炒嘅、想炒人嘅、就嚟想炒人嘅、公司就嚟執笠嘅、公司唔執笠都蝕錢嘅、公司唔蝕錢都唔慌賺錢嘅、還好一切都順境嘅，一路聽歌一路自我詮釋一路自行對號入座，一路要走好哦。



Good Luck！