平安夜交易日幸保平安

今晚係平安夜，維京人冇出街玩，因為仲未攪掂公司 D 嘢。不過冇所謂啦，做埋 D 嘢再玩過仲會冇牽掛。

睇番港股，得嗰半日市。今朝港股一開市就一 D 都唔平靜，恆指低開過 300點左右，好彩收市只係跌 36點，收報 14184點，萬四點幸保不失。成交得嗰百零萬。

呢兩日花旗國嗰便其實都幾多消息，而且偏壞居多：美國第３季經濟負增長 0.5%，係７年嚟最大跌幅、新屋銷售17年以嚟最差、二手樓跌 8.6%、國際貨幣基金甚至話有第二次嘅大蕭條嘅可能性、啱啱公布新領失業金人數增３萬人，總人數26年新高、個人支出減少 0.6%，連跌五個月 ...... 真係單單都好似好大鑊咁。

睇番阿爺呢便，其實都有好消息嘅。傳咗好耐嘅人民幣結算，阿爺今日卒之拍板嘞。不過就唔係淨得香港有得做。睇消息，佢係咁講嘅：對廣東和長三角地區與港澳地區、廣西和雲南與東盟的貨物進行人民幣結算試點。咁即係點？未解讀得好清楚，睇吓跟住落嚟呢幾日傳媒有冇再跟進先。

家下假期氣氛咁濃厚，都係唔好掛住講市咯。股市係點都過埋個聖誕節同新年先算啦。維京人喺度祝大家有個愉快嘅假期！

參加咗 Blogger 大鐵鎚嘅聖誕交叉 blog，聽日會登簡單田嘅 blog 文，大家留意。