短炒機會多的是

唔知點解，每逢假期前夕維京人都係特別忙嘅。雖然３１日都仲係要返工，但今日都好忙。好彩近排個市都好鬼靜，睇唔睇都冇乜所謂啫。聽日就係今年最後一日，終於可以道別呢個集多個百年一遇於一身嘅 2008 年。股民仲係放假心情。

今日期指結算，成交淡靜到不得了，得嗰 262億。恆指就先升後跌，可能下午結算後大家都放貨割禾青算數。恆指全日收報 14235點，跌 93點。１月期指則略略高水 8點咁大把，冇乜方向。

Obama 喺 1月20日上台，上台前好多人都話會有奧巴馬效應，可能可以做好。維京人就覺得麻麻地，因為奧巴馬上台已經係呢期最後一個好消息，後市應可如預期一樣徧淡。

今日都有兩單同股市有關嘅新聞，其一就係私有化 PCCW (#00008) 嘅表決，竟然突然話加價至 $4.5，加咗價後每手多收 $３00。買咗電盈好耐嘅老一輩股民，都應該唔想佢俾人私有化，因為自從「擇界」入股後，燒鵝變樜榨，一日仲掛牌一日都有希望變番隻燒鵝，私有化只可以得番 D 榨，更何況上市公司開茶會通常都仲有件餅食。結果小股東一致投票押後股東特別大會舉行日期。

另一單新聞就係尋日講過嘅延長董事禁止買賣股票期。結果港交所係 reject 延長嘅，但就押後３個月先實施。雖然各大股東強烈反對，但港交所為咗防止內幕交易，都係堅持要做。

日韓股市玩埋今日，已經收咗爐。日股全年大跌四成二，係有紀錄以嚟最大嘅跌幅。即使八十年代嘅泡沫爆破，都冇咁激。仲話今年 Q4 有機會經濟比上年跌多過 10%，加上日圓又高企，連 Toyota 都話蝕錢，真係陰功。南韓今年亦大跌多過四成，冇日本咁傷但係都好傷，係 97年以嚟最大跌幅。

恆指對比上年約兩萬七兩萬八千點，跌咗差唔多一半。

估唔到年底都仲有好多事發生，世界唔會因為大家想放假而冇波動。家下以巴單嘢仲未攪掂，油價呢排都似架過山車咁，大升大跌。金價亦同佢玩埋一份，今日反而跌。英國呢排數據好差，有 86%嘅英國人計劃 2009年削減開支，英磅又跌，仲大跌一百點子，尋日仲跌到 1.438，係 80個月以嚟嘅新低。波動市下其實都有好多搵食機 (或輸錢) 機會。

短炒搵到錢，家下真係唔會同你諗長線。最緊要係 set 止蝕，唔係咁大波幅真係有機會蝕到儍。

聽日半日市，又係睇唔睇都冇所謂。旅發局攪咗個 600萬嘅倒數活動，IFC 二期會有全港最高嘅煙火，連同 HSBC 同埋中環廣場等 9 幢大廈都會齊齊燒足四分幾鐘，倒數唔只玩 10秒！大家一於盡情玩樂，暫時忘記難忘嘅 2008年。

預祝各位新年快樂！

Cheers！

等候奧巴馬效應

啱啱放咗四日嘅聖誕節假期，市面一遍歌舞昇平。雖則話金融海嘯大家都預期冇啖好食，但原來香港人真係仲好有錢，出親街都係買嘢嘅人。只要價錢平同埋俾人感覺覺得超值，大家都不惜將僅餘嘅彈藥奉獻俾各大小零售商，一於享受最後的歡愉。

熱閙氣氛仲有多一個月俾大家感受下。過多兩日就係新年，各大小商場繼聖誕後已經部署緊增加人流辦法。據聞新地 (#00016) 旗下嘅商場除夕都有大型倒數活動，就算自己人唔去玩，自由客落得嚟玩點都會受刺熱氣氛所感染而忍唔住要消費。跟住今年嘅農暦新年又嚟得特別早，商家一定會儘最後努力將各位嘅消費力消耗怠盡，早日納 cash 走人。

平安嘅聖誕節一過，世界就開始唔平安。以色列前日對巴勒斯坦哈馬斯控制嘅加沙地帶發動空襲，據聞話係當地四十年嚟最血腥嘅，真係恐怖。油價同金價就係咁樣三爬兩撥俾佢推高咗，油價返上 40美元，金價差少少又返番去 890美元一盎斯，睇圖似係營造緊頭肩底？今次以色列攪事連阿爺都出聲，睇嚟祖國國力越嚟越強，所擔當嘅國際角色越嚟越重要。

今朝買報紙，報紙頭版係二百多間上市公司一齊聯署要求港交所 (#00388) ，取消原定09年1月１日生效嘅「延長董事買賣股票期」新規定。其實呢單嘢都幾謊謬，因為諮詢都唔係話突然嘅事，原來係今年年頭嘅時候已經開始做。但今日連各大藍籌、四大華資、大孖沙、英資企業、中資實業，包括長實 (#00001)、和黃 (#00013)、利豐 (#00494)、太古 (#00019) 等等，都係臨實行前四日先至話反對，都幾抵死。睇嚟金融海嘯攪到大家都好唔得閒，呢單嘢針唔咭到肉都唔知痛。

維京人個人則反對有關嘅規定，因為始終覺得管得越少對市場越好，市場會自動調節㗎嘛。雖則今年小政府大市場嘅信念令到好多人崩潰，連各大政府都要出手將臨危執笠嘅企業變為國企，但維京人對自由經濟嘅信念仍然未變。

睇番個市，今日港股成交只有 220億元，創兩年新低。無計啦，節日氣氛仲好濃厚，大家都未回魂，買賣兩閒，無心戀戰。恆指早段都跌過落 14000 點，但下午受祖國跌幅收窄所影響，收市倒升144點，收報 14332點。恆指期貨聽日結算，低水 10點，算係貼水。家下大家都預計 2009年會係極悽厲嘅一年，個市肯定仲有得跌。睇嚟最後嘅好消息就係 Obama 就職，但亦好難講話就職前開始跌定係話就職後先跌。小弟就睇可能過埋新暦新年就可以開始跌得，理由係奧巴馬上台已經係等於好消息出晒，係時候沽貨。加上以色列戰雲密佈，2009年 Q1 形勢唔多老嚟。各位，please tighten your seat belt 啦！

今年得番 1日半交易日，似乎聽日都係悶局居多。聽日開始冷鋒又到，各位著多件衫唔好冷親。

請請。

聖誕交叉 Blog 之《平安 24 小時》

24 可以是一套電視劇，24/12 可以是一個時事雜誌，但對獨(毒)男/女來說，可是一次又一次「寂寞的黑洞」......

我想很多人都有這個體會，因為沒有多少人可以由青春期開始每年都過兩個人的聖誕。在街上，幸福的伴侶走過，令你不期然心中抽搐悸動......

但請不要將這種心情掛在你的臉上，也請不要在 internet 不斷問一些平安夜仍 online 的朋友，為何你還在上網不出外。你應該想想，有甚麼方法可以將這個「寂寞的黑洞」埋藏起來，讓自己過得好過一點﹕

方法一﹕跟著報佳音的人
不論信主與否，不能否認一些天主教徒和基督教徒平安夜凌晨時份在街上報佳音是一件挺有意義的事。小弟有一年平安夜遇到他們，真的很感動，不是因為他們報的佳音，而是我終於找到有人在平安夜做一些比起約異性更有意義的事。不信主，也可跟著他們感受一下平安夜的本來意義。

方法二﹕中秋平安夜
你家是否還有一些在中秋用剩的蠟燭和鐵盒? 不如平安夜那晚在公園點起燭光吧。有人問你幹甚麼，不妨答一句﹕悼念給索馬里海盜捉了的人。相信沒有人會在這平安夜阻止你去給不平安的人平安的祝福。

方法三﹕將你的鬧鐘撥向 24/12 23:59 倒數
假如你討厭平安夜至不想外出，不妨將你的鬧鐘撥到我上述的時間，然後開始倒數平安夜即將結束，那種謀殺平安夜的精彩肅殺，真是非筆墨形容的殘忍。不過最殘忍的是你連這一分鐘也忍不到，將這提醒你平安夜未過的鬧鐘肝腦塗地。

或者你還有方法四、方法五和方法六......

過了平安夜的 24 小時，加上寂寞的你，一覺醒來，可能會見到今天的節日是「怪誕節」.......或許，簡體字的一個好處，便是令你知道，聖誕節伴隨而來的煩惱，可能令你的人生變得更加「怪誕」。

By 簡單田
聖誕交叉 Blog

平安夜交易日幸保平安

今晚係平安夜，維京人冇出街玩，因為仲未攪掂公司 D 嘢。不過冇所謂啦，做埋 D 嘢再玩過仲會冇牽掛。

睇番港股，得嗰半日市。今朝港股一開市就一 D 都唔平靜，恆指低開過 300點左右，好彩收市只係跌 36點，收報 14184點，萬四點幸保不失。成交得嗰百零萬。

呢兩日花旗國嗰便其實都幾多消息，而且偏壞居多：美國第３季經濟負增長 0.5%，係７年嚟最大跌幅、新屋銷售17年以嚟最差、二手樓跌 8.6%、國際貨幣基金甚至話有第二次嘅大蕭條嘅可能性、啱啱公布新領失業金人數增３萬人，總人數26年新高、個人支出減少 0.6%，連跌五個月 ...... 真係單單都好似好大鑊咁。

睇番阿爺呢便，其實都有好消息嘅。傳咗好耐嘅人民幣結算，阿爺今日卒之拍板嘞。不過就唔係淨得香港有得做。睇消息，佢係咁講嘅：對廣東和長三角地區與港澳地區、廣西和雲南與東盟的貨物進行人民幣結算試點。咁即係點？未解讀得好清楚，睇吓跟住落嚟呢幾日傳媒有冇再跟進先。

家下假期氣氛咁濃厚，都係唔好掛住講市咯。股市係點都過埋個聖誕節同新年先算啦。維京人喺度祝大家有個愉快嘅假期！

參加咗 Blogger 大鐵鎚嘅聖誕交叉 blog，聽日會登簡單田嘅 blog 文，大家留意。

小心匯控！

今日維京人忙到不可開交。主要係有個馬拉松會議，由朝早九點半開到下午四點鐘，仲要喺波士房一路食 lunch 一路開，真係攞命。好彩有 iPhone，等我可以查下股價。iPhone 真係好好好好用呀！（唔信？走去 iPhone 維京人望望啦！哈哈）

呢排假期氣氛超級濃厚，做唔做買賣都好似冇所謂咁。不過講係咁講，錢始終都係錢嚟㗎嘛，緊要睇緊 D 啦。

今日主要重點係，阿爺尋日終於實現市場嘅期望：減息。不過，市場真係好鬼麻煩，減慢 D 又失望，減少 D 佢又失望。今期減得 0.27厘，市場即刻唔肯過你，股票話跌就跌。今日阿爺嗰便 D 股票完全冇受減息消息所刺激而下升，相反係由頭跌到尾。上證指數連 1900點都跌破埋，收報 1897點，跌 90點或 4.55%。成交則唔多，滬深兩地嘅成交加埋只有 1060億。

維京人喺上個月底同今個月初，已經喺度同大家講話要留意內地 A 貨年底前都冇得升。理由係今個月係大小非解禁嘅高峰期，點會咁容易攪掂要放出市場嘅咁大批貨？

港股又唔可以獨善其身，繼續差。受 HSBC (#00005) 同埋中移動 (#00941) 所拖累，恆指又瀉幾百點，收市收報 14220點，跌 401點或 2.75%。成交唔夠四百億。

各位請留意匯控嘅走勢，今期唔知做乜真係一浪低於一浪，好樣衰。10月27日見底反彈後好快見番 ＄90，第二次再跌落去反彈只見 $80鬆 D。睇個衰樣似係做緊平底三角形，家下已接近上次低位 70左右，如果跌破，$65應可以見到，下一關係咩則要繼續觀察。留意下有關嘅 put 輪先。

好多分析員都唔睇好 2009年，話 2010 年經濟先會復甦。照現時數據睇，暫時根本完完全全冇可能有數據支時 2010 年會好。暫時仍然應該放心做淡友。小弟持有恆指 put 輪 #15292 ，暫賺 21%。

聽日平安夜，預祝各位有個快樂嘅聖誕節！

Cheers！

邊有脫勾嘅世界？

上星期五老美 Bush 不救不救還需救，結果都係要出招救三大車廠。Ford 比較有實力，唔借錢住，GM 同 Chrysler 就要借錢吊鹽水。

呢次金融風暴首當其衝嘅唔係窮人，而係 banker、Investment bank 裡面嘅叻仔叻女、同埋保險公司嘅 top sales 等，車唔係必需品（雖然喺外國某個程度係）, 但買車嗰班嘅消費力已差一截甚至消滅無存矣。連 Toyota 咁掂嘅車廠都一樣營運蝕錢，汽車業真係惡劣。

如果肯駛錢嗰班都冇錢，其餘行業嘅人就更加要慳住駛咯。呢個金融海嘯開始時好多人都話風眼喺美國啫，對亞洲各國嘅影響未必係咁大。有 D 人仲話家下中國國力強勁，應可以靠內需獨善其身云云。世界是平的，中國又點可以甩身呢？要知道中國仲係一個要靠出口嘅國家，人仔升值都已經影響唔細，家下連客仔亦冇錢或甚至冇埋條命，要開多幾瓣瓣數亦唔係一時三刻可以做到啩。

另外，阿爺較早前實施宏觀調控可能玩大咗，出手重得濟，家下要撥亂反正用嘅力度亦要比之前嘅大先至掂咯。睇嚟政策市都係走唔出一縮就死、一死就放、一放就亂、一亂就縮呢個 dead loop。家下仲係「一死就放」嘅階段，麻煩就係在於今次未必咁容易「一放就亂」，而係「放」極都整唔番醒個經濟。

睇返港股。恆指上一兩個禮拜開始挑戰 15500點嘅關口，但久攻不下，必會失守。今日恆指都一度升至 15200點左右，但尾市急插 400點，競價時段俾晒淡友機會展開殺戮戰場，政其不備想提早賀聖誕。恆指全日收報 14622點，瀉 505點或 3.34%。Day Low 收市，唔利後市。好彩成交好少，得嗰 365億元咁大把。

今日個市好明顯就俾恆指孖寶拖累。中移動 (#00941) 今日俾人移動，收報 $77 跌咗 $4.5 或5.52%。匯控 (#00005) 呢排俾人沽得好狠，今日都唔例外，收報74.05，跌 $2.5 或 3.27%。

後市點睇？今晚 HSBC 美國嗰面嘅 ADR 好似都跌緊，今個禮拜仲只得番一天半交易日，淡友要做嘢好容易啫。加上睇圖超級樣衰，由開市跌到收市，後市可以繼續睇淡。小弟持有恆指 put 輪 #15292，暫賺約 13%，睇嚟可以放心持有過聖誕咯。

呢兩日天氣轉涼，各位著多件衫喇。

Good luck！

萬五點的邊緣 . 三大車廠得救

煲呔北上面聖，有同事話睇到佢喺總理同主席面前交談，都要拎住本筆記簿喺度寫寫寫寫記下重點，俾人嘅感覺真係麻麻哋。見特首個 style 唯唯諾諾咁，又真係好似完全冇乜台型。

唔知係咪咁嘅原因，縱使阿爺喺七大領域俾香港 14 大 jetso，港股都係唔係好領情。升咗四日後終於斷咗纜，喺禮拜五嘅今日要跌。恆指今日高位 15444點，全日收報15127點，跌 370點。

今日個市 mainly 係俾 HSBC (#00005) 同埋中移動 (#00941) 所拖累。今日 HSBC 由頭跌到尾，睇即日圖真係好樣衰。冇計啦，有大行唱淡嘛。喺寫呢篇 post 嘅時候佢喺美國嘅 ADR 跌接近 70蚊港紙，比香港收市價仲要低多 7%，真係乜嘢十天二十天線都穿晒，慘不忍睹。

匯控帶頭又跌過，加上下個禮拜假期氣氛濃厚，睇嚟都係偏淡居多。呢期真係聖誕鐘，沽匯豐咯。就算阿爺愛香江，推出一連串措施幫幫忙，例如話加強內地同香港的金融合作、加快涉及香港的基礎建設、鞏固珠三角經濟合作等，對港股支持力度都唔係好大。最後沽貨機會或已出現，或聖誕前俾多次機會你，仍然對後市極唔看好。

家下 D 新聞真係好奇怪，原來好多人都會反口覆舌。繼倪生同埋亞視單嘢外，今期最反口覆舌嘅非美國 Bush 莫屬。今朝明明話唔救車廠，仲話要佢哋「有跌序破産」，點知話口未完今晚最新鮮滾熱辣嘅新聞就係三大車廠終於有救。美國政府斥 134億美元打救。呢筆咁大舊嘅錢係喺較早前嘅 7000億救市方案入面撥一部份出嚟，納稅人又要幫手收拾呢 D 有毒爛攤子。

車廠得救，股場信心立即返晒嚟，寫呢篇 post 嘅時候道指已經升咗超過一百點。美元仲勁，好似食咗偉哥咁好亢奮，歐羅即從昨日高位接近 1.43跌返落低過 1.40。雖然係咁，歐羅成個月埋單則仍升咗約一成，據聞話係有紀錄以嚟單月升幅。呢排嘅匯市波動超級巨大，維京人都係睇位唱定錢，諗住過年可以去歐洲玩，順便入番 D 貨去米蘭站賣都好。

下個禮拜一冷鋒又到，各位著多件衫。祝各位有個愉快嘅周末。

繼續沉悶

維京人發覺近排呢個 blog 多咗朋友睇。經小弟大膽假設小心求證後，估計應該係由於小弟買個市升個市就跌，買個市跌個市就升。咁「明燈」，絕對可以方便炒短線嘅朋友作為參考。

自從 10月27日黑色星期一股市大暴跌，嗰役小弟賺過超過 80%利潤外，呢排俾個市嘅反彈整到小弟唔湯唔水，真係多做多錯，少做少錯，唔做唔錯。但以維京人呢 D 成人玩攻其不備嘅性格又點會收手。唔計長揸股票同埋基金外，家下手持恆指 put 輪 #15292，買入價 $0.197。過埋聖誕假期直覺上覺得大戶會開始做嘢。大家睇戲記住睇多兩個月至半年，睇下恆指係咪真係可以見四位數。

今日恆指喺一片牛皮下報收15490點，微升37點。冇計啦，美國減息香港唔跟，市場反應就緊係冇癮。港股成交 523億左右，而期指去到 15500 都係衝唔上，樓上充滿阻力。

大家唔好以為美國接近零息，就代表銀根寬鬆。咪以為家下唔揸股票，揸銀紙就係笨蛋所為。今次阿伯 Bernanke 係兵行險著，如果個市都係救唔起，唔揸銀紙揸股票就真係笨！大家等著瞧。

******

個市咁悶，繼續八卦。倪震同埋周慧敏傍晚無啦啦話會玩結緍，真係突然。睇嚟倪震應該真係鐘意周慧敏，唔似係講笑，只不過係之前忍唔住偷食被斷正而已。真係好似部份網友話齍，玩下手聽日唔知會唔會王維基又返去亞視度做！

Cheers！

All or nothing !

尋晚苦等咗好耐嘅美國議息結果如預期一樣，重手到爆。比較特別嘅係今次減至嘅唔係 exactly 一個數，而係一個區間範圍 0 - 0.25%。明明想減到零又要留番條尾，真係唔知 Bernanke　有乜花臣。

呢次減息係美國歴來最低水平。咁平息，有錢嘅，真係將錢求其買樣嘢，都會保值過放喺銀行度。家下呢個世界，真係諗唔到會發生嘅都會發生。最後彈藥都用埋，如果花旗國想再出手都唔知搵咩出！阿伯呢次睇嚟都係玩 all or nothing，置之死地而後生矣。

如果救唔掂，睇嚟美國佬都會步日本嘅後塵，成 L形走勢。

今日港股就一開市已受減息消息所刺激，恆指高開約三百點左右，最高見 15557點。不過好友好快就作鳥獸散，有好友仲玩下手做埋淡友㖭，又買番落嚟。最後恆指收報 15460，升 330點，略為超過 2%。收市位高唔過個開市位，但今日成交都仲有 564億。

維京人點睇後市？嘻嘻，今日又手多多入咗隻恆指 put 輪 #15292。個市由低位升到上嚟，技術反彈已接近完成。如果覺得呢次係反彈，咁個市又會再跌過；如果覺得個市已轉勢，咁後市就算再跌都會買升。維京人係前者，就算恆指升到萬六點相信最後都係要跌。

前虛無後膠著

香港真係日日都有話題。倪震單嘢喺娛樂版做咗好幾日，估唔到 ATV 新高層嘅新聞仲好睇過真人 Show。維京人有時都喺度諗，其實妓女同埋魔童係咪真係玩唔啱瓦？其實會唔會係佢哋攪嘅 Gimmick ，表面就好似玩緊請辭羅生門，實際佢哋兩個有共同嘅目的，就係等大家開始留意 ATV！

咁當然，呢個都係維經人嘅推測啫。

咦？點解今期維京人唔講股票走去講新聞嘅？無他嘅，個市悶囉。市場正等待美國聯儲局是否議息，加上花旗國嘅大銀行又禮拜尾出業績，車廠仲傾緊有冇得救嘅希望等等，全世界都係觀望觀望同埋觀望。

今日港股一樣進入小弟自定嘅前虛無後膠著狀態。虛無係指個市前景虛無，膠著係指後市有排膠著。恆生指數今日都有憧憬下美國減息，係咁咦升 83點或 0.55% 咁大把，收市都企得住萬五點喎，報 15130點。成交又係少，得嗰 403億元。不看也罷。

今日維京人放咗隻 call 輪 #14261，略蝕 9%。雖然恆指後市可能有機會再上高 D，不過唔知點解睇走勢圖似係請君入甕格局。冇信心嘅嘢 keep 住都無謂，一於無貨一身輕。如果恆指三扒兩撥上到去 16000點，會小注做淡。否則年底前都會沽番注。

Good luck！

魔童名妓玩割席，三三又不盡

話咁快又到一個禮拜嘅開始。今個禮拜真係「多事之週」。上個禮拜尾海洋公園「無啦啦」死咗條中華鱘；星期六晨咁早「無啦啦」就聽到台灣嘅阿扁出獄，坐咗三十日鬆 D 就放返出嚟，真係估佢唔到；跟住下午却「無啦啦」發生一單旺角街頭淋漒水事件，唔通經濟差特別令人抓狂做 D 損人不利己嘅行為？另外遠在美國嘅布殊「無啦㕸」走咗去伊拉克俾人掟鞋！

咁多單「無啦啦」，估唔到連今日下午亦有單「無啦啦」。相信唔駛我多講各位亦知道我講緊魔童同名妓啦。一個撒亞人一個係喺青樓做，根本就九唔搭八，割席亦係遲早嘅事，不過估唔到係咁快啫。結果啱啱入咗 ATV 嘅王維基只係做咗 ATV 11 日嘅 CEO 咁大把。

王維基辭任亞視行政總裁嘅消息一出，網友嘅 blog 已經第一時間貼晒佢單新聞出嚟。市場人士會認為亞視盤數其實救無可救，王早走早著，亦同時話兩大高層其實好唔啱啞；政治界中人則會認為魔童較早前話鄙視阿爺 CCTV 10台，咁唔尊重阿爺俾人炒係遲早嘅事；娛樂圈人則傳話佢調戲亞洲小姐冠軍，問人哋個胸係咪真㗎。真係一單新聞，集齊財經、政治、娛樂於一身，報紙 A版 B版 C版今晚肯定爭餐死，要睇吓聽日呢段 news 放喺邊版好。 　

王維基上個禮拜仲同亞視領導層開會，等大家仲憧憬亞視呢隻死馬點當活馬醫，結果原來係冇得醫。各位如果想睇番佢上個禮拜點樣寸寸桿咁做「棟督笑」，可以喺 youtube 以「王維基」作搜尋即可。

講番港股。上個禮拜五三大車廠過唔到參議院嗰關失救，港股大插。但美股卻戲劇性咁冇事。結果今日港股就高開，恆指仲一度升到15386點。但下午三點過後，空軍又突襲，結果恆指全日收報 15046點，升288點，成交426億元。

今日除咗三點過後個市突變外，原來仲有好多單新聞同個「三」字有關嘅。例如兩岸大三通啦、美國救唔救三大車廠咁啦，另外，阿特首亦會於星期三北上面聖，話會對香港開放人民幣債券業務，如果係，理論上對保險股有著數。不過今日嘅保險股就高唱低走，唔對路。維京人仲持有中國人壽 (#02628) 嘅 call warrant #14261，家下蝕緊唔夠 10%，聽日一樣照出貨。

同「三」有關嘅仲有阿爺嗰便傳就嚟出 3G，吹咗咁耐今次睇應該係最堅。睇下中移動 (#00941) 個圖，家下做緊頭肩底而且喺頸線上上落落咁。突破當然要買升，但今期反彈始終係反彈，維京人呢期仍然係大淡友，只要玩埋今年呢期最後的歡愉，睇恆指會去到 4位數。各位好友小心，買升嘅要一路走好，安心上路！

唔救，吹咩！

尋晚維京人講話美國三大車廠雖然通過眾議院嗰關，但仲要睇參議院班共和黨議員神聖嘅一票。原本以為係今晚先有結果嘅，但因時間關係，今日食 lunch 時原來已經有咗結果。參議院一句「唔救，吹咩！？」，就係咁，亞太股市今日就咁冧咗。

美股做得差，港股今日今早低開三百零點。好少咁啫，仲諗住萬五點都守得住，OK 啩？點知否決救車廠方案後，大市即應聲大跌，最多仲跌超過成千點㗎。恆指最後收報 14758點，跌 856點或 5.48%。今個禮拜升咗咁多人原來係俾今日跌，一日攪掂。

維京人尋日亦講過如果唔救車廠，避險情緒一定會谷到美元上升。結果今日澳洲紙同埋紐紙就跌到嘭嘭聲。唯獨日本紙就升，美元兌日圓跌到去 89蚊，去日本玩嘅朋友今期預 budget 要預多 D 咯。歐羅兌日圓亦跌得好勁，但兌美元則仍守得住 1.33左右。不過 1.35　個位都幾大阻力，希望唔好再升啦。

三大車廠睇嚟都要申請破保護。少咗出車美國人又少咗買車，咁就自然少咗用綱，商品價格就雪雪聲滑番落嚟。原材料暴跌，鋼筋水泥有關嘅股份就一定唔好過啦。今日瀉到七彩。阿爺嗰便特別多呢類股份，加上 A貨金融股唔做好，今日上證指數就暴挫 77點或 3.81%，收報 1954點。

港股今日跌市成交減至 588億元，跌市成交亦縮，加上期指輕微高水2點，後市仍不宜睇得太淡。加上下個禮拜三 Bow Tie 會北上面聖，如果一個唔覺意阿爺又派糖，咁做淡友就大鑊。寫呢篇 post 嘅時候道指期貨曾跌接近三百點，一如預期之內。

******

維京人近排攪緊個學習日本語嘅 blog，仲未有 post。大家有興趣嘅不防 click 呢度睇一睇先。記住 bookmark 喎。

******

祝各位有個愉快嘅周末。

Cheers！

美元又跌過

禮拜三晚美國眾議院已通過斥 140億美元嚟挽救垂死嘅汽車業，好消息令美股道指升約 70點。今日港股就好反覆，曾經跌過，最後恆指收報 15614點，略升 36點咁大把。成交額則低過尋日，跌至 614億元。

阿爺今日公布通漲數據，CPI 比同期上漲只有 2.4%，低過預期嘅 3%，創出22個月以嚟嘅新低。隨住外圍經濟越嚟越惡化，似乎對內地嘅衝擊越嚟越大。不過眼見阿爺大力出手救市，股市又喺大家以為唔會再升時今日都係撐住撐住。睇嚟等一部份人以為個市跌極都跌唔落，整個陷阱俾人感覺牛市又返嚟，大戶就會開始做嘢。暫時睇恆指都可能有機會上去萬八點，不過升唔升到都好，有貨者都要留意聖誕前後有變數。

睇番花旗國，三大食油汽車廠睇嚟行咗好運嘅第一步，不過仲有參議院嗰關。今日共和黨已經吹緊話可能會投反對票，結果係點仲存有少少變數。預料星期五（香港時間應為星期六零晨）就會知結果。

如果救助方案通過，喜好高風險嘅國際投資者會敢於冒風險，理由係連唔掂當嘅企業都有人救，有咩好怕？D 人會唔係好 prefer stick to 美元，非美元嘅貨幣如歐羅等可能會上升。反之方案如果咁唔好彩將否決，美股應該又要跌過，但市場亦同時會認為美元係相對安全嘅貨幣，美元又有機會上升。

由於市場普遍認為救市方案應該會通過，所以美元一個唔覺意就跌咗落去。歐羅兌美元竟然由前兩日 1.26 左右升到去 1.32！陰功，維京人仲諗住歐羅跌咁多，過年去歐洲抖抖個噃。不過點都好過去日本嘅，因為日圓今晚曾經去到 91多少少。

離聖誕越嚟越近，假期氣氛濃厚。

救到升為止

尋晚美股又報跌，不過都無損香港股票市場散戶嘅熱情。今日恆指朝早因為阿爺出 D 核突數據，好友唔咁造次。唔知係咪下午食完 lunch 叉完電，好友發力，恆指一支箭，呀，唔係，係一支火箭咁上升，最後收報 15578點，咁又彈升咗 824點或 5.5%。期指亦高水約 42點。喺 15000點放咗貨嘅朋友得個睇字。

今日嘅成交有 618億，比起星期一巨升嘅 638億略為縮咗皮。似乎個市升得咁勁，仲係有人唔係好敢入貨。一向睇淡嘅維京人好彩亦知恥近乎勇，結果就好勇咁喺星期一大升市時平咗隻 put 輪入番隻 call 輪。基本因素先擺埋一便，今期要做阿趨勢嘅好朋友。

其實今朝阿爺嗰便出嚟嘅收據真係唔多好睇，11月份 PPI （工業品出廠價格）只增長 2% 咁大把，比起 8月份嘅 10.1%低好多。2% 呢個漲幅亦為 31個月新低，而且亦係今年以嚟連續第三個月回落。今日下午公布11月出口仲跌 2.2%，比預期嘅差好多喎。

市況越差，憧憬出嚟嘅政策就越針對經濟情況。家下阿爺救市真係瓣瓣救，而且全方位。阿爺咁有誠意，個市點都會俾面嘅。今日 A 貨本身睇住出嚟嘅差數據曾開跌，其後見港股升佢又跟住「放量」。上證指數上漲 41點收 2079點。

除咗阿爺花旗外，各國真係出晒所有飲奶之力無所不用其極去救市。壞消息多越救得狠，誓要救到個市升為止。咁攪法，錢從何來？睇嚟今期做印銀紙公司嘅工人可能會比較唔駛擔心裁員，因為各國一定開行部印鈔機印銀紙。以金做貯備嘅國家對金嘅需求肯定大升。金唔夠用，近日金價又彈返上嚟，800蚊係個好強勁嘅阻力，但好大機會會沖破。

Good Luck！

斷線的世界

尋日港股係威係勢，今日就一籌莫展。就算尋晚美國道指升咗超過二百點，攪到今朝港股都試過高開，不過始終家下港股同內地個市血濃於水，A 貨跌恆指亦唔會好過。最後恆指收報 14753點，跌 292點或 1.94%。國企指數就收報 8001點，跌 135點或 １.67%。

尋日恆指升咗 8.66%後，今日略略回番少少都無可厚非。暫時睇圖港股應似係大反彈後嘅後抽，可能係反反覆覆做緊個圓底。都係要走著石頭過河，見步行步，以各平均線作支持。

內地 A 貨，今個月仲係要行行重行行，升一格跌兩格又升番一兩格嘅格局。理由係內地 A 貨嘅大小非解禁將會達入高峰，另外前排阿爺出咗咁多招，係咪代表經濟面差到冇人有呢？呢個可能性都幾大，淨係睇阿爺減息嘅力度之大，就估到經濟情況嘅悲壯之烈。聽日會開始有一系列數據公布，包括11月份出口同埋 PPI 等，對股市可能有唔好嘅影響。另外，阿爺經濟會議今日召開第二日，市場大把憧憬。不過買樓退稅嘅憧憬已經落空咗。就睇下佢開埋聽日會有冇料到。再一次落空將又會成為大家沽貨嘅理由。

繼四叔唔識睇個市後，維京人都覺得家下個市唔係咁好玩。因為小弟不嬲都係淡友嚟㗎嘛，但個市又反智咁升，都有 D 啞咗。買股票睇長線冇所謂，炒短線家下轉身真係要快先至掂。睇嚟家下睇圖要睇密 D，同埋一有唔對路就隨時跳車可也。

壞消息陸續有嚟，特別係裁員。Sony 全球裁員 8000人，佔全公司一半人手咁濟！嘩！做乜咁激呀？唔通 Sony Notebook 唔夠 Apple MacBook 鬥、MP3 唔夠 iPod 玩，Sony Erisson 手機又唔夠 iPhone 砌？呢個都係熱愛蘋果熱愛 iPhone 嘅維京人嘅一霜情願咁啫。

要留意嘅事項：繼續睇住花旗國三大食油車車廠係咪救得番。香港方面則無啦啦殺出一單禽流感，攪到漁護署今日要走去做 chicken killer。睇嚟香港人今年又無活雞食咯。（不過維京人係唔食雞嘅，哈哈）

今晚部份網友上網可能有問題。 Netvigator　據聞斷咗條電纜，某 D 新界區嘅用戶會受到影響。維京人今晚都受影響，如果唔係呢篇 post 仲會早 D 可以 post 㖭。發覺原來冇得上網，真係得閒咗好鬼多，平時冇睇嘅書都攞番嚟睇睇。斷線嘅世界，感覺其實好安靜。

今晩六合彩有多寶，接近三千萬頭獎一注獨得，但唔係我買嘅 number，冇癮。

順勢而為

上星期五美股喺一片壞消息下，道指曾跌二百多點，其後好神奇咁憧憬救市措施見效，絕地反彈二百幾點收場。道指 8000點呢個強大支持真係好強大同埋真係好有支持。

港股今日開市，市場普遍嚟講都預咗會高開㗎喇。結果果然不負好友所託，恆指一開市已經高開約 400點，跟住高開高走越升越有，三爬兩撥連 15000點都升穿埋！恆指收市報 15044，升 1198點或　8.7%。國企指數就升得仲勁，收報 8137點，升708點或 9.5﹪。上星期買貨嘅朋友一日已經執唔少。

正所謂順勢者昌，逆勢者亡，維京人呢個淡友亦暫且要收兵，平咗隻 put 輪 #15500，無謂鬥氣。呢次蝕約 40%，計番上次執嘅 80%，呢次仲有得剩。今日仲反手做番好（順勢而為嘛），買咗國壽 Warrant #14261，理由係國壽 (#02628) 已經突破三角形，暫時睇目標會到 $26。今日國壽收報 $23.8。

今日成交亦高咗，有成 639億元。呢個成交真係好耐冇見過。市升成交配合，後市亦不宜看得太淡。港交所 (#00388) 今日發神經，傳直通車又就嚟會開車，即時升番近兩成俾你睇，市場反應真係快趣！HSBC (#00005) 同埋中移動 (#00941) 仲係今日高位收市。

好消息長嚟長有，包括啱啱過去嘅 weekend，HSBC 公布會用 50億美元為中小企提供信貸，算係經過環球政府叫銀行放水後嘅積極做法；香港經濟經遇委員會今日開會後，話會推出千億借貸保證；阿爺嗰便亦開始召開連續三日嘅經濟會議，重點係「保增長，促發展」，市場估計阿爺都會做番 D 嘢？

後市點睇？寫呢篇 post 嘅時候道指期資已經升超過 230點，暫時睇恆指 15500點應該冇走雞。加上連阿爺都幫你打氣，派咗三個太空人過嚟，恆指今年低位應已見。至於出年係點？過埋聖誕同新年先啦，費事影響心情嘛 ......

Good luck！

冇本事就唔好做香港人

張永霖同埋王維基加入亞視。日前嘅記者會上王維基就講咗以下一番豪情壯語激勵同事。唔知大家喺咁嘅經濟環境下聽完，會唔會都感受到感動同激勵？

我好憎靠人家嘅，我會覺得香港人係有尊嚴嘅。
香港人係應該靠自己香港人嘅，香港人唔應該成日問阿爺攞嘢嘅。
香港人成日問阿爺攞嘢其實係一件好丟面嘅事。
有本事就自己砌自己打，冇本事嘅唔好做香港人！

俾面派對

尋晚美股又做得好差，道指跌超過200點。港股無視美股下跌，自食其力。恆指高開209點後徘徊喺13600點至於13900點呢個範圍上上落落，最後收市報 13846點，升346點或2.5﹪。至於成交嘛，今日約 373.4億咁上下，連續四日唔夠四百億。整個禮拜恆指只係跌咗幾十點咁大把。

下個禮拜係中央經濟工作會議，內地亦憧憬嚟緊會有新政策出，今日都做得唔錯。上證指數基本上成日都係喺2000點樓上樓下爭持，最後尾市又發力，收市報 2018點，升17點或0.86﹪，連升咗三日。

中美兩國第五次經濟戰略對話今日閉幕。雙方喺各方面，包括宏觀經濟合作、金融服務業、能源同埋環境合作、貿易投資、食品安全、同埋國際合作等多個領域都達成多個成果。今次對話最英嘅都係人行行長，喺會上用阿媽教仔嘅口吻，向阿 Paulson 話美國因為儲蓄過低、消費過度而做成今次經濟結構性問題。至於副總亦唔輸蝕，準備咗份聲明要求美國要保障我哋阿爺嘅投資。

會後聲明出奇咁話美國歡迎中國主權基金，同埋中資銀行等嘅商業投資。話呢種投資對美國絕對唔係咩威脅。睇嚟呢兩年阿爺喺政策上其實都幫咗美國唔少，家下係時候大家幫大家。呢次對話變成一個俾面派對。

呢一個俾面派對就係中資股。阿爺係咁出手，咩積極財政同埋寬鬆嘅財政政策都出晒台；又話幫農民買家電又話要擴大內需等，市場亦好俾面，雖然美國歐洲個股市做得好差，但 D 中資股都唔係好敢跌，好多仲做得唔錯。

今晚美國勞工部公布上月嘅非農業職位。市場原本已經有晒心理準備會好差，預期減少 32萬個左右。點知一開出嚟 ...... 嘩嘩嘩！上月非農業職位大大大大大幅減少53.3萬個，係34年以嚟最大嘅跌幅。上月失業率則升 6.7﹪，係1993年以嚟最高水平，呢個就俾市場預期嘅 6.8%低。數據一出，道指期貨就即刻跌幅擴大至超過 150點。市場亦預計嚟緊嘅聯儲局議息，可能會減 75點子嘅機會率由 64﹪增加至 76﹪。

至於三大有為車廠，三大巨頭今次唔坐私人飛機而走去坐私家環保車去華府「行乞」，各總裁仲話建議只收1美元作酬勞。表面睇好有誠意，但求乞嘅錢就多過上次，真係好難睇得出佢哋係咪真係有會大刀闊斧去做改革，定還是係乞到錢就過海係神仙，番舊路。事件發展成點仲係未知數，不過花旗國失業咁勁，華府可能都會出手救一至兩間。死一兩間車廠可能都會減少咗國內嘅競爭，另外有得留低嘅就冇咁大競爭，容易 D 賺錢。一舉兩得。

睇番香港，啱啱克仔走咗，又有我哋祖國三位太空英雄嚟俾 D fans 望下。呢排香港真係熱鬧。另外周圍亦好多平嘢賣，電腦節７折執平貨，榮華臘腸賣臘鴨買二送一，HSBC 卡買 Crabtree 低至半價。香港人其實個袋仲有好多錢，做生意嘅唔搶晒佢哋就笨。唔納定 cash 點樣渡過嚟緊嘅緊日子？

祝各位有個愉快嘅周末！

當預期落空時

維京人今日忙到抽筋，下午一連開咗三個會，真係人都癲。夜晚仲走咗去上堂，真係好似好忙咁。呢種好忙嘅感覺令我覺得好舒服，好似好充實咁。真係犯賤。

忙都要睇住個市。今日內地 A 貨氣勢如虹，喺一浸又一浸嘅好消息刺激下，高開高走。上證指數仲一度高見久違了嘅 2050點，好勁。收盤前約一小時，晚節不保玩逆轉，獲利回吐盤係咁湧出嚟，結果上證指數埋單計數升咗 36點，升1.84﹪，收報 2001點。

港股嘛，繼續悶局。今朝都跟美股高開過嘅，恆指最高仲升近 13900點左右，但食完 lunch 後同 A 貨一樣無以為繼，最後收市倒跌 78點，收報 13509點。成交又縮，得嗰 399 億。國企指數亦跌，收報 7227點，微跌 5點。

寫呢篇 post 嘅時候美股都係膠著緊，各指數上落唔夠 1%。其實美國嗰便壞消息都係長嚟長有，今日就有工廠訂單下跌 5.1%。可能受救市影響，亦有少量好消息，例如上周申領失業金人數就意外地減少 2.1萬。一負一正，未分勝負。另外，都係睇下三大車廠仲有冇得救咁啦，維京人都係覺得救嚟都係唗錢啫。

今晚英國宣布減息一厘，基準利率減至兩厘，係 1951年後最後水平，減幅亦較減 0.5厘大。歐洲央行及丹麥央行亦減息 0.75厘。匯價方面，可能覺得佢哋再減空間有限啩，竟然倒升！

維京人仍然維持睇淡作風。暫時睇恆指 14000 - 15000 會係一個好強勁嘅阻力。不過亦不宜睇太淡，因為各國政府出晒飲奶之力去救市也。睇嚟都係要當預期落空時，股市暴跌之日才到。唔知會唔會喺 Obama 上台後一個月內發生？

今日嘅新聞緊係亞視啦。張永霖做咗執行主席，王維基就出任行政總裁。據聞亞視已經蝕咗 50億！究竟呢個咁特別嘅組合能唔能夠挽回劣勢呢？維京人不嬲都覺得 CTI　嘅廣告好頂癮，就算超級無厘頭都不能不配服佢嘅創意。尤其係喺香港，創意真係所剩無幾。

呢排太忙，睇下可唔可以 keep 住每個交易日一篇 post 先！

Cheers！

股市低迷熊三三三不盡，政府滾水淥腳六六無窮

家下股市成日都舞高弄低，後市真係好難估。星期一美股暴跌引發亞太區股市星期二大瀉，今日又隨尋晚美股走高而上漲。恆指收報13588點，升182點或1.36﹪；國企指數升230點或３.29﹪，收報 7232點。

呢兩日成交都奀到爆，每日都唔夠 400億。呢個亦係熊三嘅特徵，成交少買賣兩閒。睇嚟個悶局會有一段時間，再加上大家唔睇好經濟前景，呢個熊三，睇嚟都係三三不盡。

今期最紅嘅新聞唔駛問緊係泰國反對者嘅示威。估唔到他國嘅反政府示威，會變為影響香港政府威信嘅事件。呢個簡直係混沌理論嘅經典：美國一隻蝴蝶拍一拍翼，印度打大風。世界係一個非線性系統，一個決定可能產生隨機結果。初始條件十分微小嘅變化，經過不斷放大，對未來狀態造成極巨大嘅差別。

同事啱啱喺前兩日泰國出完差返嚟，據佢所講，其實泰國市面超級平靜，如果唔係去機場都唔覺得有 D 咩嘢。同事同幾個公司嘅高層由於趕住返香港，亦係自行搭車由曼谷搭去布吉，再坐飛機回港。

返到嚟後佢不斷鬧香港人冇鬼用，少少事都要政府幫手攪掂。佢話泰國機場被封大家都唔想，去得旅行緊係要帶多個錢，如果唔係就算帶信用卡都緊有辦法返屋企，唔一定要政府包機。今日報紙又賣港府包機空位太多。唉，呢舖政府都幾頭痕，做乜都俾人鬧，仲攪到滾水淥腳咁，希望唔係淥到六六無窮啦。

呢兩日外匯市場又略起風雲。日本紙繼續升，英磅繼續跌，歐羅又漲唔起。尋日澳洲減息一厘，略出市場預期。反觀香港，銀行仲話要加按息，樓價繼續低迷都似。

家下個市咁悶，不如睇下聖誕有邊度去好過。留港又想買平嘢嘅朋友，工展會下個禮拜又開鑼，可以 click 呢度睇睇。

Cheers！

人在中環灑淚時

今日環球股市又一遍腥風血雨。冇計啦，鬼叫美國嗰便唔爭氣咩？尋晚（星期一）晚公布咗 ISM 制造業指數，差到無倫，係26年新低，結果杜指巨跌 679點，或 7.7%。五日嘅升勢一日冇晒。感恩節假期後美國佬無可避免地又要面對現實，而現實又係何其嘅殘酷。

睇番港股，恆指又一次告別二十天線，萬四點企得一日咁大把又跌返落嚟。恆指收報13405點，跌 702點或 4.98%。慶幸成交唔算多，得385億元。國企指數則跌389點或5.27%，收報 7002點。港股結束連續四日嘅升市，期指低水約二百點。

恆指由 10月27日恆指最低位 10676點升上嚟，睇圖其實恆指亦做緊一個短期上升軌。今日嘅跌市似係反彈嘅回吐。小弟暫時仲揸緊 put，未到止蝕價。原因係大家都睇今個月基金會粉飾廚窗做好，而小弟就睇番今年三月、六月、九月應該要粉飾嘅月份都係報跌嘅，所以繼續唔睇好。

睇番內地個市，今個月係大小非解禁嘅高峰，股票有得跌冇得升。雖然阿爺救市救開有條癮唔想俾佢停，但以出口主導嘅經濟，唔係話你用救市方法就馬上可以變為一個內需型經濟。難怪連人仔亦要開始玩貶值，以幫補下出口嗰便。

維京人讀書嗰陣其實都好天真好儍咁，以為喺中環返工好似好卿香好似好巴閉，其實都係虛榮心作遂。結果都好神奇咁第一份工真係喺中環返工！細個阿媽話做銀行好嘛，薪高糧準又可以低息買樓。咁當然，喺 97年亞洲金融風暴後已經冇呢支歌仔唱啦。

香港話晒係金融中心，大部份銀行金融機構嘅總部亦喺中環，所以喺中環返工俾人嘅感覺亦係搵到錢。不過今時唔同往日，金融海嘯受當其衝嘅就係金融機構，真係世界輪流轉。家下租樓住都千祈唔好話俾人知你做 bank，玩下手個業主租俾做看更嘅都未必租俾你。

銀行業係今期嘅裁員重點。繼 HSBC (#00005) 後，前排啱啱玩完供股後嘅渣打 (#02888) ，香港呢便就裁員約200人。諗下諗下都覺得自己好好彩家下唔係做銀行，唔係嘅話呢舖就真係人在中環灑淚時。

最後同場加送 youtube 搵到嘅「人在旅途灑淚時」，請各位俾人炒嘅、就嚟俾人炒嘅、暫時仲唔駛俾人炒嘅、想炒人嘅、就嚟想炒人嘅、公司就嚟執笠嘅、公司唔執笠都蝕錢嘅、公司唔蝕錢都唔慌賺錢嘅、還好一切都順境嘅，一路聽歌一路自我詮釋一路自行對號入座，一路要走好哦。



Good Luck！

日圓又升了，人仔卻暴瀉

金融海嘯攪到信貸緊縮，銀行冇錢所以向政府求救。政府又因為 D 金融機構唔救就有經濟冇啖好食嘅預期連鎖反應，焗住要幫拖。如果當政府都冇錢，咁點算？

呢個亦係維京人呢兩個月思考嘅問題。

一般嘅講法話政府冇錢可以印銀紙。咁其實係咁印銀紙，D 錢咪唔卿香囉？D 紙唔經貴，匯價就會跌。咁如果當全世界都係咁印銀紙，各地匯價亦徧低，此消彼長下，邊度 D 錢仲會貴？

呢個真係一個好玄念嘅問題。

睇嚟，一早已經係零息嘅日本紙就係關鍵。日本紙一向都以低息出晒名。當全球各地貨幣都話減息，匯價趨跌，都冇晒 expectation 嘅日圓仲有咩息可以減？（除非負利率嘅唧）所以結果嘛，日本紙相對就會升。

維京人今晚做乜講匯市？冇嘅，因為今晚日圓又行車喇，寫呢篇 post 嘅時候美元兌日圓報 93.73，係呢兩個禮拜嘅低位。即係話日本紙係呢兩個禮拜嘅高位。

另一種大家預期會升嘅貨幣就係廣受大家歡迎嘅人仔﹣人民幣。之不過，預期佢升係因為希望內地經濟可以持續增長。但經過呢嘢金融海嘯，內地保唔保到八竟然成為一個議題。結果今日人民幣唔同你談情，自己卻跳舞，錄得自 2005年匯外以嚟嘅最大跌幅。美元兌人民幣中間價連續三個交易日上漲，今日報 6.8505，較上一個交易日上漲 156個基點，亦係八月以嚟最高嘅水平。

今日公布嘅內地 11月官方採購經理人指數同埋11月里昂採購經理人指數全面收縮，甚至錄得歴史新低，情況都唔可以話唔嚴峻。救市係咪可以對抗市場嘅力量？有待觀察。

股市同經濟短期其實未必有直接嘅關係，今日港股同內地 A 貨就好爭氣咁報升，算係咁咯。恆生指數收報 14108點，連升四日，升咗 220點或1.59﹪。上證指數則升 23點或1.25﹪，報1894點。

今晚美股食完火雞同屋企人感完恩，返嚟開跌。由於零售業旺丁唔旺財，大家 predict 嚟緊嘅經濟長衰長有，加上擔心下一輪嘅危機輪到信用卡危機，而且 ISM 制造業跌到26年嚟嘅新低。喺寫呢篇 post 嘅時候杜指暴跌超過 380點，跌幅超過 4%。如果直到聽朝收市都唔能夠抽返上嚟，睇嚟聽日亞太區股市都難逃一刧。

熊仔未走，大家唔好高與得咁早。

賤物鬥窮人的 Black Friday

尋晚美國休市，今日香港股票就連續第四日做好。恆指升咗336點或2.48﹪，收報 13888點，好好意頭！

有睇開呢個 blog 嘅朋友都知道維京人係大淡友，覺得恆指半年內會見四位數。成日講到咁差，亦唔代表短期個市會跟個人意願走。小弟覺得十二月頭幾日可能仲有得升，但睇番今年三月、六月、九月嘅季結都做得好差，直覺上恆指仲要試一次低位先見底。

Anyway，呢兩日要睇下美國 Black Friday 嘅零售市道好唔好。上去美國嘅零售網睇下，個市唔好零售商劈價劈到成劈肉醬意粉咁，一劈糊塗：50" Samsung 高清電視唔駛 800美元，香港買 46"都要兩萬幾港紙、HP Desktop 電腦唔駛400美元、GPS 100美元有找、700萬像素嘅相機可以賣唔駛 60美元、 微波爐 25美元亦可以有一個、大富翁 board game 10蚊美金攪掂、甚至一條牛仔褲可以平到賣 4 美元！真係平到有 D 匪夷所思！賤物鬥窮人，零售商要錢唔要貨，費事 D 貨賣唔去仲要蝕俾倉租。

唔怪得美國人咁瘋狂啦！ D 嘢賣到咁平，銷售額係唔係可以靠人氣谷得起，仲係有待觀察。





阿四叔今日出嚟講嘢，今次佢就學醒咗喇，唔會再實牙實齒話恆指會出到幾多點，而係好玄咁講話「盛極必衰，衰極必盛」。睇嚟佢真係哀莫大於心死。其實家下做人最緊要樂觀，睇下前排嚟香港嘅阿 Nick，真係覺得佢好犀利，周身都充滿正能量。



寫呢篇 post 嘅時候美股牛皮，杜指跌約 5點。美股得嗰半日市，假期氣氛濃厚，不看也吧。

祝各位有個愉快嘅周末。Cheers！

妖由人興

感恩節快樂！11月最後一個禮拜四係感恩節，今晚美國休市。有睇開美股嘅朋友今晚可以休息番一晚。其實美國人喺呢個傳統嘅大節日中，真係要感恩，因為美股呢幾晚都玩反彈，喺一遍灰暗中看似有一絲曙光，等大家可以過一個唔係咁悲嘅感恩節，食火雞都食得開心 D。不過要留意係「看似」有一絲曙光而唔係「真係」有曙光，曙光仲離大家好遠，開心埋呢兩日相信美國佬下個禮拜又要面對現實。

尋晚阿爺大幅減息落重藥，力度之猛前所未見，今日恆指亦順便趁期指結算彈起上嚟。恆指一開市已經逼近14000點關口，仲 touch 埋條 20天線，簡直俾晒位 D 股民走貨。過去嘅幾個交易日，個市都係撐住撐住咁。食完 lunch 返嚟，期指結算價亦差唔多大局已定，大戶又開始沽貨，恆指仲一度倒跌，最後收市好彩都彈返少少上嚟，報 13552點，升182點或1.37﹪。成交502億。恆指都係捉唔穩條 20天線。

阿爺嗰邊又點？照計減息咁多，個市點都要升嘅。不過好似港股咁，一樣有頭威冇尾陣，上證指數同埋滬深300指數都差唔多以全日最低位收市。上證指數2000點好似真係天花板咁，呢排穿咗幾次都係升唔穿。上證指數收報1917點，微升 19點或 1.05%。

正所謂妖由人興，一切異象皆由人行事怪異而生。今日嘅新聞特別令人不安：禽獸刑警強姦女報案人、無線前助導燒炭死、索馬里海盗當道攪到各國出軍艦、孟買恐怖襲擊、泰國局勢未穩、美國傳阿爾蓋達襲 New York 等等嘅新聞，加上世銀睇死阿爺保唔到八、發改委承認4萬億救市基金實情好多都係舊 project、啱啱上網盛傳 Big 4 同埋某兩間大銀行未來兩日將會大裁員、政府想回購雷曼又觸礁、傳電視台裁員 cut cost 15%，又真係好難叫維京人睇好後市。

That's why 維京人都係繼續做淡。睇嚟基金佬做埋呢幾日嘢應該開始散水走人。睇吓呢兩日美國佬消費有冇起息啦，如果美國人肯消費，都可能會帶俾人少少希望嘅。

其實我亦好怕自己睇到個市咁淡，因為會影響人心情嘛，仲搵鬼睇呢個 blog 咩？睇嚟都係唔好講咁多股票，講下八卦嘢好過。

******

尋日維京人手多多打咗「腐女子」呢個 term。其實呢個亦唔係乜嘢新鮮事物，好多網友亦可能已經知道。腐女子係指鐘意睇 BL (Boy's Love) 漫晝嘅女仔，後嚟漸漸有人用嚟形容唔鐘意 social 亦唔鐘意出街嘅女仔。日本經濟衰咗咁耐，越嚟越多畸型嘅社會現象。唔知過多幾年嘅美國會唔會又好似咁樣？

最後的歡愉

尋晚美國又出重手拋出個 8000億救市方案，誓要刺激已經垂死嘅經濟。市場可能知道經濟唔係垂死咁簡單，而係死晒！所以杜指經昨晚（星期二）受此好消息影響亦唔係好升。亞太區區內股市亦升跌不一，日本嗰便嘅日經平均指數跌 110點或 1.33%；阿爺嗰便成日膠著，最後上證指數微升 9點報 1897點。

港股一於好少理，話要升就升。高開 110點後長升長有。最後恆指收報 13369點，升 490點或 3.81%。成交416億。呢兩日嘅升市令人有股市「反底」嘅感覺，已經有人話睇嚟股市都係見底之時。

地產股大升，可能受久違了嘅新樓盤推出所影響。一號雲頂，個名真係好似好型咁。樓盤位於沙田銅鑼灣山，可以望到海，如果呢個樓盤係起喺六七十年前嘅沙田。點解海嘯下個價唔係「海嘯價」，而係整個「企硬價」？希望買咗佢單位嘅朋友唔好做咗「一號摸頂」就得喇。

股市永遠冇人可以估頂撈底。前兩日信報曹仁超大大隻字喺佢嘅投資者日記寫住話「強力反彈就在眼前」，結果好神勇咁呢兩日港股已經升咗近千點。問題係呢幾日一千點係咪已經係「強力反彈」？定係話個市咪反彈住，「眼前」可能係一個禮拜後又或者係一個月後，甚至係話半年之後？相信曹 Sir 自己亦未必會知道，估計佢都係覺得股價現在已進入合理價值而已。

無限風光在險峰，如果覺得個市夠低，而且好似維京人咁喺年頭左右基本上已清晒倉，又何妨家下入番少少貨？（少少好喇，Cash is King in bear market 嘛）

今日黃昏突然收到阿爺嘅消息：人民銀行宣布大大力咁減息 1.08個百分點！投資市場永遠都係只爭朝夕，呢嘢減息雖然大家都話係「望穿秋水」，實情都只係憧憬咗差唔多兩個禮拜咁大把啫。呢次阿爺出咁重鎚，真係有 D 嚇人，好少睇到咁重手嘅減息。睇嚟阿爺亦覺得今年「保八」唔係你話保就保到，經濟環境應該嚴峻到超乎你想像。

咁樣，聽日個市係咪會大升？Who knows？啱啱寫呢篇 post 嘅時候杜指仲未開市，但杜指期指就下跌超過 100點；日圓又升番近 95，小心拆倉潮又返嚟拆完又拆；聽日期指玩結算，而且晚黑美股又因為感恩節食火雞休市，睇嚟後市一定反覆。

既然各國政府咁重手救市，大家咪不防陪個市玩多陣。維京人仍然覺得唔係咁簡單。政府越多出手肯定越多「景轟」大家係唔知嘅。信報曹 Sir 雖然話後市有「反彈」，但今日亦話其實個市「可好可淡」，小弟都係唔睇好。個市由年頭跌到家下呢個時候，做淡都要抖抖氣。人紿終鐘意聽到好消息多過壞消息，大家一於好 happy 咁喺呢兩個月出力洗下錢，享受一下黑色聖誕下嘅最後的歡愉。

下個禮拜五又到電腦節，無論你係電車男定係腐女子，都可以留意下有冇咩平貨。維京人就比較想知道，唔知今次有冇 show girl 睇呢？

Cheers！

暫見歡顏

當年有 Donald 曾入市打大鱷，今日就有美國財長阿 Paulson 拯救花旗 (C)。受花旗有得俾人打救嘅消息所刺激，美股尋晚（星期一）暴漲 396點，杜指收市報 8443點，創 87年以嚟第２大升幅。亞太區亦受良好氣氛所影響，普遍上升。港股今日亦唔執輸，恆指全日收報 12878點，升 420點或 3.38%。股民歡顏再現。

今日港股成交有 412億港元。4:00 前只有 377億元成交，但一到「勁假」U 盤時段，可能受埋單計有成 412億元成交，即係話尾市嗰 15分鐘就有 35億元成交。嘩！發生咩事？今日係大摩指數換馬嘅大日子，唔通係咁嘅原因大戶喺尾市掟貨所致？

小弟暫時睇恆指 13200 仍然係重要阻力。短期升破嘅話可以先看好。長遠小弟仍抱住下年年中前恆指會見四位數。市場上永遠冇人可以摸頂撈底，只要自己覺得 okay 可以入市便是。

今晚美國又發神經出重手，出 6000億美元買 mortgage 有關的負債；另外亦 pump 多 200億去谷消費者信貸。杜指期貨今晚明明徧軟上落唔大，但呢條消息一出已急彈超過 170點。係咪可以 keep 住個升勢？聽朝就知。

呢個禮拜四係 Thanksgiving Day，原意係為咗感謝上天賜予好收成。今年遇正金融海嘯，睇嚟美國佬都係唔好食火雞咯，食麥記麥樂雞慳番 D 錢好過。過埋 Thanksgiving Day 嘅星期五係 Black Friday，傳統上係舉家出動消費嘅大日子。個市係咪真係見底？真係要睇住星期四同星期五呢兩日，留意下美國嘅消費者信心返嚟未。

啱啱睇新聞話泰國反政府示威開槍。政治市唔穩定，睇下又會唔會影響聽日嘅大市氣氛。

Ｇood luck！

日本休市、港股膠著、阿爺四面楚歌

維京人周末喺街轉咗個圈，嘩！人山人海，大家都好似 D 嘢唔駛錢咁，左一袋右一袋。冇理由吖，我又唔係去咗一田，做乜咁多人出嚟掃貨？似乎上星期港股同埋美股反彈，加上憧憬阿爺救市有新措施，阿 Obama 又敲定咗個財經班底等等都帶俾市民對未來仲有少少希望。又或者係期待會越嚟越差，趁住家下仲有個錢，一於及時行樂，玩咗先算？

今日日本休市，大市一時間失咗個舵手。睇阿爺嗰便，四面楚歌：減息願望落空、平準基金管理層周末仲話要加強監管、53億限售股呢個禮拜解禁，12月仲係解禁高峰、國美 (#00493) 老細黃光裕被公安帶走調查、溫總走去長三角打氣，似乎連龍頭上海亦有 D 氣餒、胡主席話要迅速採取有效措施遏制金融危機，似乎做慢 D 都會出事。上證指數全日收市報 1897點，跌 72點或 3.67%。睇嚟內地 A 貨一定要解決「大小非解禁」呢個計時炸彈先至可以睇好。

縱然美股上星期做好，受內地 A 股影響，加上 CitiGroup (C) 前景未明，港股唔會好過。收市恆生指數報 12457點，跌 201點或 1.59%，成交350億元。睇嚟港交所 (#00388) 個價會越嚟越賤而越賤又越唔想買嗰隻。維京人上星期五放咗嘅恆指 put 輪 #15500 今日又再入市買番，即市已略嘗甜頭。

今日銀行股又成為憂慮對象。一隻渣打 (#02888) 一隻花旗 CitiGroup。

渣打供股集資 200億港元，每三股供一股，似乎管理層 predict 到會手緊，資金將會短缺？定係話見到好嘢想執平貨？一開市渣打已經低開 $88.1，跌成 6%㗎。最後喺下午開市一分鐘後停牌，都係撐唔住，收報 $88，跌 $6 或6.38﹪。

市場擔心 Citigroup 繼雷曼兄弟後另一家出事嘅金融機構。今朝同事仲話花旗會執笠。我叫佢唔駛驚，佢同通用汽車 (GM) 一樣係 too big to fail，但汽車業係式微行業，老美一定救 Citi。結果喺開咗 11個鐘頭會議後，美國政府公布向花旗注資 200億美元，另外仲擔保多 3000億美元，35萬位員工飯碗暫且可以保住。

寫呢篇 post 嘅時候道指期貨報升約百零二百點，又睇下今晚美股做成點？要留意呢個禮拜四係感恩節，要留意過後美國佬嘅消費表現掂唔掂，唔掂嘅話大市會繼續插水！就算曹仁超話強力反彈在眼前都係咁話！

Good luck！

說好的幸福呢

尋晚美股做得好鬼差，主要係驚通用汽車 (GM) 不能獲救，經濟進一步惡化，杜指星期四晚收市暴挫 444點，收報 7552點。標準普爾指數更係１１年嚟嘅低位。

前幾日港股嘅悶市原來係呃人嘅，今日又嚟玩多嘢大起大落。今朝港股趁美國尋晚大插水，一於人插佢又插，自己又插埋一份，恆指今早再度失守１２000關口低開約500點，有唔少嘅股份創出新低。一到十二點，區內股市竟然齊齊拗腰，日本、韓國、台灣、新加坡同埋澳洲齊心就事升，港股一度仲高見13048點！最後恆指收報 12659點，升咗 360點或 2.93﹪。上下波幅成千二點。

維京人本身隻 put 輪都賺緊錢嘅，但食 lunch 時見勢色唔對，蝕少少平咗倉先。市場傳出唔少古靈精怪嘅消息，包括傳阿爺又推出新救市措施，又話會大大力減息，甚至有人話港股直通車正式宣布可以開車等。

信報曹仁超好神勇咁呢幾日叫人開始唔好睇咁淡，真係料事如神。不過小弟觀察個市，今日去到「勁假」U 盤時段即刻 U turn 調頭番落去。今日成交有504億，好咗少少，但都唔算多，容易俾大戶夾上夾落。

個市咁神經，維京人都係睇淡者，會考慮下星期再做淡。不過聽日係「小雪」，通常每逢氣節股市都好神奇會轉勢，而且下星期期指結算，一定會大起大落。或者可以參考 Bollinger's Bands, 中軸約13200 - 13400，亦為小弟覺得嘅阻力位附近做淡；又或者留意下次氣節 「大雪」12月7日左右決定。

淡友亦要留意今期係熊市三期，通常熊一同埋牛一嘅出現都係出人意表嘅，做淡亦要鴿實恆指上次低位 10676點，如果唔穿，要暫且收手。

金管局阿任總今日公布，外匯基金頭九個月嘅投資收益期內錄得 833億元虧損。咁又難怪嘅，淨係睇港交所 (#00388) 就知啦。上年9月外匯基金喺 155蚊左右入市增持，家下港交所得番 $53，唔見超過六成，你話外匯基金嘅表現又點會好呢？

喺 youtube 搵到周杰倫有首㚥好聽嘅歌叫「說好的幸福呢」，真係越聽越有 feel，感動到想喊：



怎麼了妳累了 - 鬼咩，日跌夜跌......
說好的幸福呢 - 冇晒 ......
我懂了不說了 - 知衰喇咩？等你仲成日學人撈底！
愛淡了 - 都係做淡有著數！
夢遠了 - 今日俾人夾淡倉 ......



就嚟係美國佬嘅感恩節，寫呢篇 post 嘅時候杜指期貨升咗超過 200點，睇下嚟緊會唔會有番 D 心情食火雞？

祝各位有個愉快嘅周末！

早起的蟲兒被鳥吃

維京人呢期真係烏鴉口，講乜中乜。尋晚美股開市前見杜指期貨跌超過百點，已經覺得唔對路，喺呢度話玩下手杜指以低過 8000點收市。要記住上次杜指跌破八千點好快會有買盤擁現而拗返上去。結果今朝一起身，杜指今次真係守唔住，係以 7997點收市，跌咗 427點，啱啱低過 8000點３點咁大把，邪爆。

既然美股收市失守八千關口，淡友仲唔即刻打蛇隨棍上咩！日本仔真係好識抄人，見人哋跌破八千自己一於又玩跌破八千，日經平均指數收報7703點，跌570點或6.89﹪。港股又跟隨外圍跌埋一份，恆指前日跌破萬三今日亦一度跌破萬二點關口，收市報 12298點，跌517點。今日成交有成446億元，略增。跌市成交升，利淡。期指繼續玩低水逾百點，又係利淡。

港股短期高位已見，維京人一早講話恆指 13200點為重要支持，跌破會好慘，又中。

除咗長實 (#00001) 略為微升外，其餘藍薵全部都係跌。九倉 (#00004) 最弱雞，大跌 12.8%。港交所 (#00388) 繼續向大摩價 $38 邁進，收報 $53。

上證指數跌超過百份一。當中金融股比較弱勢。港股嘅六行三保亦無一幸免保唔住。招商銀行 (#03968) 跌得最甘，收報 $11.14，跌 $0.86或 7.17%。

銀行落雨反而收遮，唔肯放水俾中小企。金管局則七度入市沽港元，朝早1次下午6次，平時睇醫生姑娘叫你食藥都係１日4次。港匯喺任總出晒飲奶之力入市後，仍屹立不倒。下周一結算嘅戶口結餘增至破紀錄超過 842億元。

香港今日公布咗通脹，10月份急降至 1.8%。睇嚟又會返番通縮嘅日子。

早起的鳥兒有蟲吃。今日沙田嘅一田百貨一連五日大減價，產品以低至二折發售，吸引咗數百人喺舖頭開門前排隊輪候。排頭位嘅人兄原來清晨 6點左右己經開始排隊，真係唔夠佢嚟。

Source: tvb.com

相反，早起的蟲兒被鳥吃。如果喺今次恆指低位 10676點反彈上嚟買貨嘅朋友，可能今期入貨入早咗咯。恆指跌破萬點已成為所有淡友甚至大部份好友嘅共識，如果玩 L 形走勢，有排先升番上嚟。何苦咁早入貨呢？留多個錢榜下身嘛。

寫呢篇 post 嘅時候杜指期貨又跌超過 150點，睇嚟杜指跌到六千點嘅目標越嚟越近。GM 救唔成亦唔值徥救，失業率將會持續「激烈」上升，經濟有排衰。Cash is king 嘅說法又再出現，唔好對未來存有任何幻想吧啦。

Good luck！

再向高位 say goodbye！

星期二晚 DOW 報升，收報 8424點，升151點或 1.83%。內地經過尋日急跌後，醜女大翻身，權重股撐住個市，食完 lunch 後升唔停。

上證指數大漲115點或6.05﹪，收報2017點，收復2000點關口。家下上證指數 2000點其實亦唔算咩心理關口，又唔係支持亦唔係阻力，只係一個數字而已。後市似乎睇好者眾，但係蟹貨亦眾，需時消化下應可回復動力？

港股斯人獨憔悴，大家明知個經濟會越嚟越差，但又驚阿爺唔知幾時又出招救市會刺激個市反彈，買賣兩閒。今日恆指收市報 12815點，跌 100點或 0.78%，成交得嗰 389 億，如果冇記錯，大概約廿個月以嚟最低成交。港交所 (#00388) 今日唔跌住，微升 $0.5　收報 $56.5。繼續睇淡。

恆指跌破 13200點後應該暫時會同呢個位 say goodbye，向下挑戰新低位。

匯控 (#00005) 今日除淨，做得唔錯，升 2.07%或 1.6，收報 $79.2。

Cathay Pacific (#00293) 今期變咗良心企業，今年罕有地發咗兩次盈警，今日都仲可以宣布話會略略調整員工薪金，係加唔係減。可能油價跌，預期成本會大幅下降都唔定。之不過喺咁嘅時勢都肯加員工人工，國泰真係都算係咁咯。

另一間變咗「良心企業」嘅係合和 (#00054)，將原本叫 Mega Tower 嘅合和二期，發展規模由樓層 93層變減至 55層。密度降低 project 可以即刻上馬，創造 4000個職位。發展局林鄭月娥話過去大半年，一直與合和二期嘅發展商磋商；仲話喺磋商嘅過程中，並沒有向發展商施壓。今期究竟有冇咩「等價交換」？Who knows?

睇番美國，呢幾日其中嘅一個焦點係政府仲會點救市。其實維京人唔係好讚成美國政府出手救通用汽車（GM），雖然佢又真係可能好似 AIG 咁 too big to fail。話晒美國汽車制造業已經式微，救佢根本唔能夠長遠解決問題，只係等 D 工人仲留戀汽車業過去嘅好日子咁啫。世界唔同晒咯，長貧難救，據聞美財長阿 Paulson 手頭嗰 7000億美元救市基金已經用咗一半，間間都話 too big to fail，又睇下可以救多幾多間公司？

美國啱啱公布咗 CPI，真係嚇親人。10月消費物價指數按月下跌 1%，比預期嘅 0.8%大， 呢個亦係歴來最大嘅跌幅。另外，新屋動工量上個月減少 4.5%，至 79.1萬間，比預期至 78萬間好少少，但又係有紀錄以嚟最低。呢排美國 D 數據成日破紀錄，今晚就破咗兩個！

******

寫呢篇 post 嘅時候美股仲未開市，但 DOW 期貨已經跌咗百零點，唔通今晚杜指可以收低過 8000點？

經濟唔好，減價潮開始湧現。明天開始一田百貨「響應」通縮，減價低至２折！呢種瘋狂減價嘅感覺真係好鬼似曾相識，睇嚟大家都係樂觀 D 面對未來嘅挑戰！



請請！

冬天剛開始，春天怎會近？

維京人今日開咗成日會，連 lunch 都係喺 conference room 食，真係忙到儍。不過雖然咁忙，維京人都會靜靜咁睇下個市嘅。

一睇，呵呵呵，小弟講過話恆指只要跌破 13200，後市好有機會見四位數，亦親體力行晨早買咗 put 輪 #15500（唉，冇錯，買早咗）。結果嘛，果然合晒何車，今日恆指一度跌超過800點，全日收報12915點，瀉613點或4.54﹪，13200關鍵位亦告失守。成交四百幾億，咦？跌市成交升，後市唔多好咁喎。

港股今日大跌，除咗因為美股尋晚做得唔好外，亦受內地 A 貨急瀉所影響。四萬億方案對 A貨市場嘅支持原來得嗰四日貨仔，今日上證指數又跌破 2000點，收報 1902點，跌 128點或 6.31%。刺激經濟炸彈已開始失效。其實好友應該諗下，如果經濟好，阿爺又駛鬼駛咁多錢嚟救市咩？今日有超過七百隻 A貨股票跌停板。

溫總上星期六特登南來廣東省考察，話要加大加快扶持中小企，仲引用一句雪萊嘅詩嚟鼓勵大家：「冬天來了，春天還會遠嗎？」。睇嚟阿爺亦覺得國內外嘅經濟形勢變化對內地市場影響好大，要為各廠家同地方政府打打氣。

睇番香港，裁員潮不絕於耳。啱啱公布嘅最新失業率去到 3.5﹪，係上年 11月以嚟嘅新高。財爺仲話裁員已成世界趨勢。撇除李節性因素後，失業率已連續兩次上升，而且失業率上升仲廣泛咁分散喺本地經濟及對外貿易行業。睇嚟冬天剛剛才開始，春天仲離我哋好遠啫。

港股嘛，蟹貨太多，家鄉太遠。喺 discuss.com.hk 內已經有高人 hkft 話 11月19日癸亥月癸亥日，即係聽日，係股災最後逃生門，大家一定要把握機會出貨套現。維京人亦喺呢度一再強調，每次反彈都只係迴光反照，而且最後放生機會可能已經喺上星期出現咗。各位小心。

美國嗰面今晚又有數據公布：美國生產物價指數 (PPI) 跌 2.8%，大過預期嘅1.8﹪喎。道指期貨頭先原本跌成百點，寫呢篇 post 嘅時候反而微升１點。有乜綠機？估計市場解讀為通漲冇威脅，有減息空間，所以利好股市啩？似乎仲未有人諗起生產物價跌咁多，跟住落嚟嘅 CPI 亦有機會跌。股市肯定怕通縮多過怕通漲！

Yahoo！(YAHO) 楊致遠終於決定離開佢一手創建嘅 Yahoo！，兩個星期前佢仲話要繼續帶領雅虎改革，話口未完，已經俾班 board of directors 炒咗。世事真係多變。有興趣可以睇下約 40分鐘 Jerry yang 喺 Web 2.0 Summit 上嘅訪問。



天氣開始轉涼，各位著多件衫喇。經濟唔好，睇醫生都唔係好化算。

Cheers！

港股苦悶．A股續旺

G20 第十次武林大會曲終人散，一如維京人較早前喺度所料，真係無乜料到。會上基本上達成五個比較空泛共識：

• 提高透明度和可信度
• 改善監管
• 促進市場誠信
• 加強合作
• 改革國際金融機構

好多報紙今日都話中國喺國際社會上嘅角色越嚟越重，仲話扮演決定性角色。雖然講係咁講，但中國嘅投票權喺 G20 內只佔 3.27%，比日本嘅 6%仲要少；歐洲則佔 30%，美國一個國家就已經佔 17%，而且仲有否決權。中國地位無疑提升，但真係仲有一段路要走。

唔知係咪內地股民覺得自身面子越嚟越大，A 貨市場今日一於開香檳慶祝。受美股周五大幅下跌所影響，而過去 weekend 亦沒有特別利好嘅傳聞出現，滬深兩地早盤低開，其後受部份水泥股、建材股、有色資源股等帶動，開始發神經彈上去，上證指數收市竟然上破十月中以嚟都未見過嘅 2000點，連升四日收報 2030點，升44點或 2.22%。睇小時圖似係營造緊頭肩底，日線圖則似係圓底，如成功突破 2050點，好有機會去番2300點，而呢個亦係一個幾大嘅阻力。

港股今日就過咗沉悶嘅一天，全日波幅都係得嗰 461億，真係好苦悶。恆生指數輕微高開後低見 13277點（一早講過話 13200點會有支持！），其後受 A貨呢面帶動，又彈反去全日高位 13738點，最後恆指收報 13529點，微跌 13點或0.1﹪。即月期指收報 13461點，低水69點。港股全日成交得嗰398億元，唔夠400億，年半以嚟最少。

摩笛一奏，無啖好食。呢排港股成交量咁少，大摩就削港交所 (#00388) 目標價至 $38。今日港交所低見 $59.2，最後都企得住 $60，收報 $60.55，跌 $4.95或7.56﹪。小弟睇如果成交去番百零億，港交所去番低過廿蚊都有可能。至於富士康 (#02038) 則遭 Goldman Sachs 唱淡，股價亦急跌至 $2.12，跌 $0.27或 11.3%。堂堂大藍薵俾人咁質法，慘不忍睹。持有冰島債券嘅工銀亞洲 (#00349) 同埋 永亨 （＃00302）今日亦係繼續跌。

家下個市雖然自萬一點抽番上嚟後好似企得好穩咁，又有阿爺救市，不過維京人繼續睇淡。如果信個市已經見低位者，相信過埋呢兩個月好快會冇晒希望。今日又傳 HSBC (#00005) 裁員，睇嚟呢浸失業浪會冚越大。小弟大膽 D 預期未來起碼會有一成人會失業，身為百業之母嘅銀行應該會幾唔掂。如果持有本地銀行股者要小心。

Good luck！

壞消息股市升．峰會變歡送會

恆指 13200 係重要支持，美國杜指 8000點則係重要防線。尋晚 DOW 一度跌破10月10日低位，穿埋 8000點後即有強力反彈，臨收市一個鐘又一如近期好有戲劇性嘅表現，杜指最後竟然嚟個大 deep V 升番552點，星期四晚收報 8835點，真係執番身彩。

尋晚美國真係冇乜好消息，壞消息就一大堆。美國新申領失業金人數破50萬，係7年嚟嘅新高；９月出口值劇減咗6﹪，只有1554億美元，降幅又係7年嚟最大嘅；股神巴菲特旗艦公司把郡 (Berkshire Hathaway Inc.) 的股價跌破１0萬美元，連跌４日，連跌日數創下１３年最長日數；通用汽車 (GM) 唔受花旗國財長眷顧打救，接近零價值，股價最低報２.8元，係65年新低；索羅斯出席國會聽證會時話美國經濟己陷入衰退，唔排除出現蕭條嘅可能性！

咁樣攪法，美股都有得升，呢個一定係技術性反彈而已。支持好快就會支持唔住，8000點防線應會攻破，如無意外 DOW 應可喺未來幾個月內見 6XXX！

港股今日受美股所刺激，連跌三日後終作出反彈，恆指收報 13542點，升 321點或 2.43%，國企指數做得唔錯，升226點或3.33﹪，收報7021點。不過恆指整周都係下跌 700點，十天廿天線都去唔返。

今日香港公布本地生產總值， Q3 GDP 按年增長 1.7%，同 Q2 比下跌 2.5個百份點，係 03年 SARS 以嚟最小增幅。按季負增長 0.5%，全年預期由原先估計嘅 4% - 5%，降至 3% - 3.5%。技術上嚟講香港經濟將會喺來年陷入衰退。至於失業率，Q3 為 3.4%，最慘嘅係數字只係反映金融海嘯嘅初步情況。話晒香港係外向型經濟，睇嚟隨住出口無啖好食，消費跟住放緩，失業率會持續回升。連 CNNMoney.com 都有段 video 講香港經濟衰退，可以 click 呢度睇下。

後市點睇？繼續睇淡囉。千祈唔好太信救市，救市其實都只係杯水車薪啫。不過亦唔好太信經濟差股市短期一定跌，因為股市亦係一個反智嘅地方。

今晚美國又有一堆 bad news：Citigroup (C)前四季合共炒咗 23000人後，又再 cut 多多１0000人；Sun Microsystems (JAVA)又裁 6000；Freddie Mac (FRE) 勁蝕超過 253億，原來上年都只係蝕廿零億！Fannie Mae (FNM) 今年第三季每股蝕 $12.97美元，但佢嘅股價都只係得嗰幾亳子，即係話一季蝕嘅錢係佢股價嘅 20倍！最恐怖係十月份零售銷售，按月跌 2.8%，比起九月份跌 1.3%跌得勁，而且仲係有紀錄以嚟最高嘅！Oh！Come on！ It's record high！（咁其實呢個數據都係 92年先開始制定啫）

嚟緊嘅周末就係睇下 G20 峰會點攪喇。胡總已經飛咗過去 Washington 開呢個武林大會，所謂四萬億救市方案都係攞嚟同鬼佬晒冷用。原來呢四萬億中央出嗰萬二億啫，其餘嘅係地方政府自己籌。美國阿硃仔同 Paulson則喺開會前企硬話最好等 D 唔掂嘅企業由得佢自我滅亡，真係唔知佢係想出手救定唔出手救。各國都有自己嘅利益同埋世界觀，而各國亦想趁美國佬弱勢時重整適合自己嘅金融秩序。你話佢監管金融機構不善咩？佢話番你輸出三聚氰胺。你一句我一句，應該都冇乜嘢好講㗎喇。睇嚟呢個會嘅意義係要嚟送別呢任嘅美國總統，不如改做硃仔歡送會，大家喺咁嘅經濟環境下開 party 減下壓好過！

祝各位有毎愉快嘅周末！

恆指挑戰支持位 13200

尋晚美股受到花旗國 Paulson 話救又唔救言論所影響而大跌。阿 Paulson 話嗰7000億美金救市基金唔會購買問題按揭資產，而係改為購入信用卡債務、汽車貸款同埋學生貸款等作抵押嘅證券，即係方向由直接救金融機構，改為力保消費環節。咁突然，市場一時間對金融機構仲有得救嘅希望幻滅，結果引發美股連續第三日大跌。

亞太區股票受美股跌所影響，今日一樣開跌。恆指收市報 13221點，跌 717點或 5.15%。尋日話港股下個位睇 13200點左右，估唔到咁快跌咗落嚟，誓要測試下呢個支持位係咪支持得住。又睇下聽日港股係 Black Friday 定係會有反彈？話晒 A 貨今日係可以獨善其身報升嘅。

世上只有媽媽好，有媽嘅孩兒像個寶。中信泰富受到母公司肯承擔阿仔炒 accumulator 輪錢嘅部份損失所影響，今日竟然逆市上升！喺開盤前嘅議價時段一度暴漲65﹪。開市後一度漲17﹪，最後收市都可以升超過9﹪，報＄6.6２。

大摩又調低 HSBC (#00005) 嘅新目標價為 $66，據聞有 D 口痕友話中國移動 (#00941) 會移動到 $4X。家下 D 淡友想像力越嚟越豐富，成日發白日夢。最抵死係家下嘅市況好多時都可以夢境成真！

有親朋戚友同維京人講話睇淡市況，話有乜 put 輪好買。如果睇淡 HSBC，#09513　年底夠期，行駛價 ＄115， 溢價少，得嗰 1.91%；如果好睇淡中移動，#15178，出年三月夠期，行駛價 $70，但隻輪溢價高，要正股移動到 $57先算打和；睇淡恆指，小弟持有 #15500，好進取，因為打和點係 10521。出年五月夠期行駛價位 12600。另外可以考慮 #15094，出年3月夠期行駛價 16000，溢價比較低。

補番句先：買賣股票 warrant 請自行評估風險，所有買賣損失唔關呢個 blog 同埋維京人事。
:P

恆指 13200始㚵係一個關鍵點，今日跌破結果都拗番上嚟，可能要試多幾次先破。另外，聽朝阿爺嗰便就救市措施好似有記者會，可能又有好消息。G20 weekend 開會，雖然明知係吹水，但對股市存有變數。寫呢篇 post 嘅時候道指受 WalMart 業續唔錯而高開超過 100點，做淡友要留意，可以趁市升先買佢跌。

******

尊貴嘅議員又好心做壞事，尋日開咗成日會決定引用特權法查雷曼事件，話希望讓苦主盡快得到合理賠償。咪玩啦，成件事根本就係喺度自打嘴巴。你要查清楚，勢將傳召政府、監管部門同埋銀行等財金要員到垃圾會作證，非一時三刻嘅事嚟㗎噃。喺未查清楚銀行責任喺邊度之前，銀行一定大條道理話尊重法治又或者尊重立法會依法調查等理由暫停所有回購。如此這般，又點會可以讓苦主「盡快」得到合理賠償？

唉，算吧啦，呢個世界好多人都係反智嘅。

******

台灣阿扁入獄，件監犯衫號碼 2630 竟然成為今期熱門話題。最衰港股冇 #02630，如果唔係可能都俾人炒起！



請請。

經濟衰退前可以做的七件事

尋日維京人講過，話恆指今日收市要企喺 14000點或以上先至會有一線生機。下午收市前睇下個市，咦？唔錯喎，由開市後跌最多 414點後，曾倒升超過 200點，好似好好兆頭咁。點知過咗 4:00 「勁假」時段，喺大家唔知價嘅情況下，原來大家所謂競價都係掟貨嘅多，接貨嘅少。恆指最後收報 13939點，跌 102點。萬四真係守唔住！即月期指仲大低水177點。

唉，個市弱過藥煲，都係唔好諗咁快會見底咯。睇下呢個 weekend G20 開會又有冇轉機？恆指下個位睇13200左右，穿埋嘅話四位數指日可待。

明知個市會衰，冇理由喺度坐以待斃等死架嘛。睇報紙雜誌一般都係係咁咦叫人要積殼防饑呀、保住份工呀、諗辦法開源節流呀咁，我夠知啦，問題係點樣做到呀嘛。維京人思前苦後，茲列出以下經濟衰退前可以做嘅七件事，希望大家可以俾 D 意見一齊 brainstorm 下：　

1. 提早大掃除，幫自己資產做個大盤點。你會發覺屋企有好多嘢都係冇用嘅。既然係咁，不如拎去咪攔站或者腰 bay 賣鬼咗佢，套現攞番 D cash，多個錢旁下身。

2. 如果係公務員或自覺份工比較穩陣嘅，請繼續儘情消費，以刺激香港經濟。否則，若身在「高危行業」（例如 finance firms），請喺每期六合彩或者三T，用 5蚊 又好10蚊又好，點都買番注以小博大，keep 住做人最緊要有希望。留意聽日六合彩又有 snowball！

3. 不論係影視店、餅舖、湯水舖，總之你有套票或年票喺手，快 D 用晒佢。你唔會知道你幫襯開嘅舖頭有冇買 i kill you later 或持有類似「累埋兄弟」嘅「謎離」「債券」。今日無啦啦又爆單工銀亞洲（＃00349）原來都持有冰島債券，好彩政府對銀行存款有無限嘅保障，就算佢執笠都可以攞番 D 存款，俾你無限個信心。

4. 買恆指 put 期權或買 put 輪，萬一個市跌到阿媽唔認得，你賺到笑。買期權 (唔係賣 call，係買 put) 同 warrant 理論上係蝕有限 (最多輸晒個本金) 賺無限。如果你公司有上市，買自己公司跌仲可以對沖公司執笠嘅風險，萬一失業你玩下手仲賺得多過你平時返工份人工。

5. 學識炒外匯。無論經濟好唔好，外匯價格都可以日升日跌，唔需要買單邊。而且可以日炒夜炒，萬一失業起碼可以有 D 細藝。早 D 學識，早 D 做好準備。好多 Forex 公司都可以做 online trading，本金少過一萬蚊都有得炒。不過前題當然係要提醒你炒匯都可以蝕好多錢，小心。

6. 除咗炒匯，快 D 搵多 D 正職以外嘅賺錢途徑。網上拍賣又好幫雜誌寫稿又好幫人掃地都好，總之有 cash flow 嘅方法都要試下。起碼可以做到分散風險嘛。如果做生意，最緊要本錢少先好做，家下做生意絕對唔係一件易事。

7. 趁家下仲有個錢，買 iPhone。Apple 專為 iPhone 或 iPod Touch 而設嘅 App Store，裡面有好多好 app，無論要俾錢或唔駛俾錢都有。萬一失業無嘢做，有佢陪住你人生仍會充滿樂趣。唔信可以參考下 iPhone 維京人。

以上所講，你當認真又好講笑又好，總之喺市況低迷時更要保持樂觀。

Cheers！

你公司今日執咗笠未？

金融海嘯後嘅暗湧似乎慢慢湧到嚟香港。今日又有連鎖壽司店目黑話要執笠，旗下嘅 Stage Cafe、甲乙丙、中國廚房同埋和庭日本料理亦要結業。受影響員工 350人，集團拖欠薪金約談３００萬元，據聞拖欠1300萬。

呢個結業浪暫時只係殺入零售業，睇嚟而家都算只係 kick off 階段。好多中小型企業其實都係餐搵餐食餐餐清，呢頭賺到嘅 cash 嗰頭就攞嚟找數俾 vendor 或者出糧俾員工。當生意好時想擴充就自然要把握機會問人借錢。結果嘛，當有 D 咩事時銀行要收緊銀根，周轉就會有問題，攪唔掂 cash flow 就逃唔過結業嘅命運。

金融海嘯後銀行銀根史無前例咁緊張。各國政府就算肯放水，但銀行都冇信心借錢出去。除咗係咁嘅時勢銀行怕你生意唔掂外，其中一個原因係呢次金融海嘯，攪到大把 accumulator 爆煲、股票又大跌、外匯大幅波動，銀行係怕中小企自己收埋好多 i kill u later 又或者不知名嘅投資工具而頼嘢，攪到執笠就真係啞晒。

家下仲有少少實力嘅零售企業仲可以頂多一陣，過埋消費旺季嘅聖誕同埋農曆新年先算。但好多做貿易嘅中小企，好多都係年尾找數，而今年農曆新年又特別早會嚟到，遇正數十年難得一遇嘅金融危機，睇嚟企業倒閉會陸續有嚟。下次見到 D 好耐冇見嘅朋友，你不防問一問佢：「你公司今日執咗笠未？」，玩下手十個裡面有幾個會話俾你知家下喺屋企量緊地。

香港暫時仲頂得下，美國方面就壞消息不斷。美國第二大電器零售商 Circuit City (CC) 申請破產保護；速遞公司 DHL 將裁減9500名美國工作嘅員工；北美最大電話設備生產商 Nortel (NT) 季度勁蝕 263 億美元，裁員 1300人；Starbucks (SBUX) Q4 盈利倒退97﹪等，攪到美股尋晚高開低收，走勢勁樣衰，DOW 星期一收市倒跌73點。咁多間公司只有麥當勞 (MCD) 受經濟不景所影響，銷情勝預期。

港股受美股所影響，就算有阿爺豪擲四萬億嘅救市措施亦無補於事。恆指今日一開盤已經低開超過400點，期後竟然玩倒升。不過喺熊市入面，每次反彈都可能係最後沽貨機會。午後受企業倒閉、澳門金沙 project 攪唔成等消息所影響，市場又返回現實憂慮前景，恆指一度跌超過800點，最後收報14041點，跌704點或4.77﹪。

維京人繼續睇淡。目標為恆指半年內見四位數。

咁恐佈？又有冇好消息呀咁？都有嘅，今日恆指跌市成交少，利好；十天平均線自今年七月以嚟都未 touch 過條20天線，今日竟然有緣相聚，又利好。寫呢篇 post 嘅時候杜指期貨大跌超過 150點，只要聽日恆指收市守得住 14000，可能都仲有一線生機嘅。

今日睇報紙見到電訊數碼呢個 ad，雖然無厘頭但笑爆嘴。就等維京人破例一次喺度幫佢地賣下免費廣告啦。Cheers！

暗湧

唔知係咪天氣開始凍，大家又開始換季。維京人 weekend 喺街度轉咗個圈，發覺 D boutique 人頭湧湧，大家都博命消費。唔講真係唔知地球另一邊嘅歐美，嗰便 D 人家下勒緊褲頭正準備渡過近幾年嚟最窮嘅聖誕節。

始乎世界各地嘅正式同埋疑似經濟衰退，真係未殺到香港。雖然前排有泰林、URight 同埋老外冬甩店執笠，DBS、HSBC (#00005) 同埋利豐 (#00494) 又話裁員，不過唔知係咪針唔㓤到肉仲唔知痛，又或者就算知道痛都未殺到埋身，都係今朝有酒今朝醉，happy 咗先。

要小心，越美麗的東西可會越有暗湧。

唔知點解諗起黃耀明唱嘅「暗湧」（其實係王菲唱先）。

阿爺為咗對抗金融海嘯後遺症，避免所引致嘅內地潛在經濟風險，今日就宣布豪擲四萬億人民幣攪基建，力度之大，出乎市場預料。溫總較早前已苦口婆心咁警示港府唔好忽視海嘯嘅威力，見港府冇乜郁手，就自己行動先。話晒呢次危機唔係你我想像到，早 D 出重手，好過死咗想救都冇用。

咁好嘅消息，緊係令到股市亢奮啦！今日 A 貨市埸一開市已經節節上揚。上證指數收報1874點，升127點或者7.27﹪，昂然闊步似乎想搶攻錯列1900點。港股喺阿爺出招後緊係唔執輸啦，恆指一開市一度衝破15000點，最後收市報14744點，上升501點或3.52﹪。萬五點阻力真係好大。

其實阿爺出手嗰十招，主力都係希望擴大內需，加快民生工程、基礎設施、生態環境建設同埋災後重建。其實四萬億表面睇好多，但計番條數都只係每個中國人都唔夠四千蚊。但都可能等如一個農民幾年人工都未定。

基建投資始終唔係一時三刻嘅事，有其一定嘅滯後性。另外，今次救市好似冇對樓市下滑有咩計，而且 Q3 開始公布嘅上市公司業績已經開始見紅，又睇吓呢個四萬億嘅炸彈可以刺激股市幾多日。

小弟仲揸住恆指 put 輪 #15500。睇嚟恆指個反彈可能仲要維持多一陣。由於只係小注，暫不考改變策略。不過可能會換馬其他一 D 行駛價較高嘅 put 輪都唔定。

Good luck！

淡友倉位未夠，再升一會後謀反撲

美股尋日連續第二日大跌，DOW 美國時間星期四收報 8695，跌 443點或 4.85%。當一眾淡友以為恆指會跌千點起碼，指收卻反方向颷升。開市時恆指低開 517點後回升，最後恆指收報14243點，漲453點或3.29﹪，成交額卻繼續縮，只有488億元。

港股可以做得咁好，其中一個功臣可能就係 HSBC (#00005)，因為喺臨近中午收市前突然宣布減息25點子；加上 A　貨又做好；而且尋晚英國出乎意料大大大力減息厘半，歐洲亦減半厘，預期歐洲開市亦會暫時喘息初定，淡友中伏。

壞消息繼續出籠，DBS 宣布新加坡同埋香港一共裁員900人。「生意淡薄，不如賭博」，家下連博彩公司金沙都出現財困，個市唔係淡到咁下話？另外聯想公布第二季業績，出人意料之外大跌近八成。相信大部份上市公司 Q3 同未來 Q4 嘅業績，唔死都會一身潺。

維京人手持恆指 put 輪 #15500，雖然係淡友，但都不得不承認睇形勢短期仍會看好。似乎大戶仲未引誘夠散戶買貨。較早前恆指跌到萬一點時，已有隨口噏當秘笈嘅朋友話睇八千，而且連某些股評人同報紙佬都係咁講。當大眾有個預期時，市場一般都要玩吓呢班友仔。淡友嘛，要先儲夠倉位後再將好友殺個措手不及。

暫時睇，如果壞消息繼續水銀瀉地咁出嚟，又或者日㘣抽番上高位，恆指可以快少少向低位挑戰。否則，有機會升上萬六先跌落嚟。如果基金佬為咗做好盤數，升浪可至12月，踏入2009年又會跌過落去。是龍是蛇，大家睇落去便知。

六合彩嚟緊嘅星期日又有二千幾萬，喺而家咁嘅市況，買賣股票都好難搵到食，不如買番注博下好過！

祝各位有個愉快嘅周末。

好了傷疤忘了痛

環球股票喺10月27日超級大股災，當日恆指暴瀉1602點至11015收市。見低位後繼而嘅日子開始反彈，仲係要幾彈有幾彈嗰隻，七日後嘅尋日已經升番去14840點收市。

市升主要受美國及環球股市所帶動。股市預祝 Obama 入主白宮，將會帶嚟新景像。似乎大家當咗 Obama 係神唔係人，或者就算係人都要做摩西，可以帶大家逃出苦海。

當美國總統選舉完畢，大家又要面對慘情嘅經濟衰退現實。而且 Obama 尋日演講亦講過，家下美國經濟嘅慘況未必可以一年，甚至喺佢任內嗰四年可以解決。始終 Obama 係人唔係神，要收拾殊仔嘅爛攤子又談何容易。

結果，股市喺近幾日亢奮過後，又再跌過。尋晚美股 DOW 就一個唔覺意已經跌咗 486點，或5.05﹪。攪到今日環球股市都跟佢一齊跌。恆指今日大跌1050點，或7.08﹪，收報13790點。唔好話沖萬五，萬四都守唔位。維京人仍手持恆指 put 輪＃15500，買入價徧貴，但仍睇淡後市，所以揸住先。

其實好多小投資者都係好了傷疤忘了痛。明知經濟前景唔好，股市由低位反彈就仲唔走貨，以為個市仲有得升。好心啦，最後沽貨機會玩下手已經過咗，今期反彈係諗住放生各位啫，你唔走都冇辦法。

一葉知秋。國泰（＃00293）繼七月發咗次盈警後，十一月一開波又發盈景。理由係燃油對沖合約在截至上月底虧損２8億元。油價跌真係估唔到佢咁都冇運行，睇嚟油價對沖呢下嘢，真係做又死唔做又死。今日收報＄8.08，下跌＄１.35或14.32﹪。

今晚各國唔知又發乜嘢神經，可能見美股星期三晚跌咗 486點嚇親，驚後市會唔掂，大力放水。英倫銀行減息一厘半，係半世紀以嚟最低水平。減幅出乎市場意料之外，好明顯經濟前景惡化，要落重藥。歐洲央行亦將利率調低半厘。家下係咪減息都要鬥一餐先？其實減息係輪出衰退嘅一個好駛好用嘅武器，咁嘅時勢，真係減得快好世界咯。

總之個市唔跌穿上次低位，都會試試有關嘅低位㗎喇。各位小心啦！

Good luck！

It's time to change！

奧巴馬成功搶政七個共和黨票倉，共搶去共和黨８１張選舉人票，成功當選新一屆美國總統。Obama 勝利後發表演講第一句：「如果你仲係唔相信喺美國一切都有可能、仍然懷疑前人嘅夢想係咪能夠響我哋呢代實現，如果你仍質疑民主，今晚就係你嘅答案！」

It's time to change！有興趣睇佢長達差唔多成二千個英文字演說嘅朋友，可以 click 呢度。

維京人覺得 Obama 上台，某個程度都係受到金融海嘯經濟唔好，而令美國人極度渴求「改變」所致。So far 睇佢咁多次演講，好老實講，都冇乜具體嘅政策，真係得個「吹」字！不過做領袖唔一定要自己做，只需要有魅力，就可以吸引人才嚟幫佢手。所以小弟都相信佢或多或少都可帶俾人希望。

記得佢喺競選時曾承諾上任後會推出減稅措施，但喺前朝累積巨大財赤下，仲減稅嘅話是否撐得住強美元政策？

Obama 略帶保護主義，話企業每招聘一個美國人可以獲得減稅，而高收入人士交稅就相比低收入人士交多 D 等。

永遠都係講就天下無敵，做就有心無力。大家睇下台灣嘅小馬哥，只要選舉後冇乜表現，D 人就開始唔耐煩，攪到佢家下都幾狼狽吓。不過此馬未必同彼馬，奧巴馬睇嚟都係聰明人，話勝出選舉只係開始，家下經濟危機影響美國，未必可以一年，甚至佢任內嗰四年可以解決。 就睇下佢可唔可以帶領美國佬重振雄風？

港股受美股昨晚上漲所影響，恆指曾經好 high 咁升咗933點。但當知道奧巴馬當選後，可能受「好消息」出貨所影響，升勢唔能夠持續，最後恆指收報14840點，升咗456點或 3.17﹪。

今日成交有成633.7億港元，留意今日下晝嘅成交係多過上晝嘅。上午升市成交少，下午跌市成交增多，徧淡。高開低收，一支陰燭加上射擊之星格局，又係徧淡。期指低水約百零點，亦都係徧淡。

港股由最高位跌落去萬一點，家下約萬四點。仲未放貨者，請留意呢次反彈可能係最後放生機會，唔好再話個市唔俾機會你放貨喇。It's time to change，係指美國政壇而唔係指港股！跌勢已成，唔係話改變就改變。

小弟繼續持有恆指 put 輪 #15500，繼續睇淡。

Cheers!

等待．觀望

等待，觀望，繼續等待，繼續觀望。

做乜？之唔係屏息以待美國總統大選囉。選擇結果最快都要星期三下午公布。今次大選無論 Obama 定係 McCain win，都無可避免地要面對經濟衰到貼地嘅殘局。就算家下 Obama 得人心而當選總統，以家下 D 人性急嘅心態，相信民望好快就會回落。

反觀市場，似乎放出嚟嘅 signal 係看後選後市況。寫呢篇 post 嘅時候美股仲未開，但杜指期貨就一度升超過２00點。

今日港股似坐過山車，恆指一度下挫近500點，其後倒升近２00點，收市略回只升40點，收報14384點，成交又再縮一縮，至452億元。

內地 A 貨就繼續徧淡，阿爺出咗咁多招都未能一時間扭轉跌市。上證指數一度跌破1700點，重磅股份後來做護盤生力軍，最後艱難免強地算係守得住1700點，收報1706點。全球反彈 A 股唔彈，唔通大家覺得 A 貨實情比人貴？

大起大落己經成為近期股市嘅風格，以現時市場氣氛睇嚟，港股可能喺１５日 G20 開會前仲有一浸升勢。維京人暫時手持恆指 put 輪 #15500，買入價 $0.234，家下已回跌至＄0.197，暫蝕約１５﹪。繼續持有，等待再嚟緊嘅試低位。

Cheers!

波幅大，牛熊證容易打靶

美國今晚開始實行冬令時間，美股於香港時間晚上１0：３0先至會開市。要睇美國個市，又要遲一個鐘。寫呢篇 post 嘅時候美股啱啱開市，杜指牛皮跌唔夠20點，觀望氣氛濃厚。

港股繼上個禮拜玩反彈後，今日大玩波幅。恆指一度升咗9２0點至14900點，一度想衝破15000點，不過阻力太大，及後漲勢回順，散場只係升咗３75點咁大把，收報14344點，成交521億。暫時距恆指250天線的距離相差39﹪，算係收窄咗 D。

香港嘅拆息市場今日開始亦已冇上個禮拜咁緊張。計我話，係想借錢嘅人己經心灰意冷，唔想同你銀行借。唔借咁點算？中小企咪索性執咗檔生意拒絕再玩囉，想買樓嘅人士咪索性唔買樓囉，日等夜等都等唔到銀根，原本想借都變唔借啦。　

難怪乎今日經濟機遇委員會第一次開會，都話當務之急係紓解借貸收縮嘅影響，要研究點樣進一步支緩中小企啦。金融地產物流旅遊四大碌支柱經過金融海嘯後，亦唔係好撐得落去，要搵新機遇先掂。預期明年失業率會顯著增加，我哋民望如浮雲嘅特首又再強調香港09年衰退嘅風險越嚟越大。

好多人都批評呢個經濟機遇委員會攪嚟都多餘，又話一個月先開得一次會冇乜用。計我話攪好過唔攪，喺咁嘅時勢政府肯同多 D 識賺錢嘅人 brain storm 絕對好過閉門造車；而每月一次開會都無可厚非，唔通你叫特首淨係睇住經濟而唔做其他嘢咩？

經濟放緩已經成為大眾嘅共識，股市肯定仲有得跌。暫時底部 10676點就算唔跌穿都會再試貼近一下，各位記得睇位做人。

今日超過80隻牛熊證俾人打靶，包括 56隻恆指熊證、10隻國指熊證、同埋２0隻股票熊證，破咗紀錄。其實家下波幅咁大，係絕對唔係好適合玩牛熊證嘅，因為太容易 touch 個打靶價。咁當然， warrant 亦唔慌好得去邊，溢價太高，成日睇啱方向雙輪都唔升。所以玩證要預咗 all-or-nothing，玩輪要趁反方向買入會較有著數，例如大升買入 put輪，大跌就開 call。

美國聽晚進入總統選舉嘅最後一日，如無意外，香港星期三左右應有結果。留意留意。

反彈後繼續尋底

啱啱過咗嘅星期五係萬聖節，維京人亦約咗朋友出去食飯，順便睇下出便個市。金融海嘯下大家壓力都好大，似乎大家都好需要放鬆 relax 咁去發洩下，所以當晚比我想像中多人，落吧仲要搵咗幾間先有位。同朋友傾開，佢話前幾年其實仲熱閙，今年撞正星期五其實人唔算多也。

上個星期一股市大跌後，星期二開始已開始作出報復性反彈。各股民上星期過咗一個由地獄又折返人間嘅一個禮拜。恆指最低位見10676點，周四見高位14329點，星期五收市收報13968點，萬四都係守唔住。全周升咗10.7﹪或1350點。

各散戶見個市反彈都鬆咗一口氣。如果星期一收市入咗市，到星期五放貨相信都幾和味。至於是否見底，則見人見至，始終冇人可以預見幾時係底部。維京人就相信就算個市反彈，之後都會繼續跌。理由係呢次急升，主要理由係星期一基金洗倉沽貨過急所引致一個大反彈而已。而星期一曾跌穿下降通道嘅底部，照理唔會咁容易就升得番穿上跌通道頂部。就算未必會再創新低，但都會再測試 10676點是否見底。

維京人星期五一如較早前所講，買咗 put 輪 #15500，買入價為＄0.234。明年五月夠期，行駛價為 12600點。行駛總成本約 10070。而小弟亦相信好有機會恆指會喺出年五月前見４位數。

美股星期五公布１0月消費者信心指數為57.6，比市場預期57.8差。而芝加哥採購經理指數亦急跌至37.8，比月份56.7少一大截，創０１年最低水平。究竟個市最壞情況是否已出現？美股星期五升百零點，１１月４日美國又大選，下個禮拜睇嚟又係繼續波動。

Good luck！

去年憧憬四萬．今日收報萬四

今日期指結算，果然有殺戳戰場嘅味道。今個月淡友明明已經極爽咁坐定粒六等收錢，點知就喺月尾受日圓跌番落嚟，溫總又幫口打氣，中美又一同聯手出招減息，港股三爬兩撥，恆指已經返上去14000點嘅整數關口，收報14329點，暴漲1627點或12.8﹪，為歴來第四大升幅。成交好番少少，有成751億元。

亞太區股市亦做得好好，上證指數升2.55﹪，台灣升約 6%，日本狂飊一成，南韓可能受食咗人參所影響而狂漲一成二！

原來去年今日，港股係創咗歴史新高㗎！當其時恆指一度升見31958點，正係大家都炒到如痴如醉，仲有人諗緊係咪應該辭咗份工去炒股時，熊仔就靜靜地玩熊出沒注意。當其時甚至有人憧憬恆指快見四萬，家下睇當然係太天真太傻咯。

下個月１５日 G20 會開峰會。究竟到時會傾 D 乜嘢？各國其實都好唔妥美國佬之前洗腳唔抹腳，亦希望利用今次金融風暴重建新金融秩序。到時相信仲會有好戲睇。

今晚美國出 GDP，第三季經濟收縮0.3﹪，較預期跌0.5﹪為佳。寫呢篇 post 嘅時候 DOW 己經升咗 200點。經濟咁差股市大升，後市會點？

維京人相信個市呢幾日應該仲會有反彈，唔排除聽日就彈番去見萬六。呢個只不過係因為之前跌得過急所致。其實上市公司快將公布 Q3 業績，就算好亦無用，因為要睇 Q4 先至見真章。小弟亦堅持唔買現貨，後市看得較為徧淡。如果聽日再升，小弟可能會勇字當頭做空軍，買佢跌。

各位有貨嘅朋友，請自行判斷。個人覺得呢次大反彈，可能係最後走貨機會。

Good luck !

中間徧淡

美國佬跟風，見尋日港股大升差唔多成千六點，亦玩報復性反彈。尋晚 DOW 一口氣大漲近九百點，似乎俾面聯儲局今晚預期嘅減息。

日本股市受日圓有機會減息所刺激而大升589點；A 貨雖然受溫總打氣所影響，但做得唔好，上證指數跌52點，免強守住1700點；香港股市受阿爺嗰面窒住窒住，恆指由原本升約７００點，點知食完 lunch 返嚟變倒跌約２00點，最後收市升番105點，收報12702點，成交592億元。

股市風起雲湧，要睇穿大市，又談何容易。星期一嘅大跌令到港股試低位，呢兩日又突然抽高攪到家下冇晒方向。

維京人雖然較早前講過個市應冇沙士時咁差，但眼見股市匯市咁大上落，就算經濟未必會差過當年，金融海嘯下股票亦未必會有人接貨，可能會令到股市有機會向下。

另一方面，各國救市，亦可能會令個市冇大家想像中咁差。

一負一正，好難估。

睇圖發現恆指今日做個倒轉鎚頭。個人睇個市都係比較徧淡。如果睇跌，恆指有機會先試見四位數，等大家又再恐慌真係超級絕望時就應該見底。咁樣可能做淡都會有個唔錯嘅值博率。

但個圖亦可以解讀為呢兩日係 V 形反彈，後市向好。

都係睇埋聽日期指結算先算！

尋晚三千幾萬六合彩冇人中，明晚又再一次俾人希望，頭獎有機會獨得4800萬。祝各位好運！

來回地獄又折返人間

一早講過「日圓唔跌，港股唔升」，今日日圓跌，港股果然有個強力反彈了。恆指收報12596點，大漲1580點或14.35﹪，全日成交多咗喎，有 660.5億港元。尋日急跌暴瀉為環球之最，來回地獄一輪後今日竟然又神奇地折返人間，升幅亦係無人能及。據聞以波幅計，係９７年後最勁嘅升市，亦係歴來第三大升幅。

期指總成交有成 224461張，好似比平日多咗 D。真係唔知係咪大戶喺度對戰緊。可能就嚟期指結算，轉倉活動大增所致？

維京人尋日平咗隻 HSBC (#00005) put 輪，執咗 88%後手頭無貨，暫時觀望。今日忙到爆，公司又有新 project，都冇乜時間睇住個市。

小弟維持直至出年年中，唔買股票唔會有損失嘅原則！不過都要鴿住個市，以防又有新變化。

Cheers!

Bloody Monday

上星期五係血腥星期五，估唔到放完周末返嚟嘅星期一繼續血腥。今日港股自爆股災，恆指暴瀉1602點或12.7﹪，收報1１015點，險守萬一，為歴年第二大跌市。最血腥淒厲時，恆指見一關闖一關，低見10676點，瀉1942點，連破萬二萬一兩個心理關口，跌得難以置信但又唔到你唔信。

42隻藍籌中，只有一隻跌幅少於10﹪。全部日線圖都失守，周線圖都差唔多咯。跌幅超過15﹪嘅都有成14隻。最弱係中信泰富（＃00267），瀉27.7﹪，係全日低位。最重磅嘅匯控（＃00005）亦收最低位，報75元，重挫14.8﹪，係01年9月以嚟嘅低位。連埋上星期五嘅跌幅，兩日唔見超過25﹪！大戶果然係大戶，大摩上星期掟個報告出嚟話 HSBC 目標價 $75，果然唔駛一陣就快人一步理想達到！

今日個市嘅場面可以用人踩人嚟形容，大家都要錢唔要貨，優質股係要嚟俾人「質」，真係悲壯！咁樣插法，真係跌得誇張，瀉到心傷。今日已有口痕友話恆指可能會返去９８年政府入市位 6542點！駛唔駛睇到咁淡？維京人略為計過數，假設０８年恆指成份股嘅公司平均業績倒退三成半，恆指 PE 已跌至 97年冧市時嘅 10倍仲要低。理論上可以話非常非常接近熊底，不過唔代表個市會大升。

區內股市未係股災亦大跌。上證指數就算阿爺落重藥， 1800點亦不保，收 1723點，跌116點或6.32﹪，近六百隻個股跌停。台灣放寛股票沽空措施後，見５年低位。日本股市長痛長有，日經平均指數收報7162點，跌486點或6.36﹪，為1982年以嚟嘅最低位，亦即係話呢26年嚟日本股市又還原基本步。長揸股票者請當股票返去高位時，認真諗下係咪要適當時候放貨唔好死守，因為人生唔係有幾多個26年！南韓股市受央行救市同埋政府打算退稅影響，暫保綠洲升少少。

港股今日大跌，其中一個原因係日本紙持續高企。正所謂「日圓唔跌，港股唔升」。利差交易拆倉潮受日圓高企影響，拆完又拆， fund 佬為應付贖回清貨套現。我愛香港，因為香港又成為大戶 ATM（自動提款機）！其實呢兩日都有資金流入香港，因為港息比美息，港匯轉強，港元成為資金避難所。市場對流動資金需求卻極度渴望，攪到金管局要同一日內要兩度注資。

維京人今朝早就放咗隻 HSBC put 輪＃14312，的確係放早咗。賣出價為 0.355，今次略賺　88﹪，如果收市前放可以賺 double 㖭。後市方面，個市係咪見底未知，直覺上覺得經過今日後，已經少咗好多好多散戶仲話想入市，睇嚟嚟熊底越嚟越近，睇下過埋今個月期指結算先。小弟暫時睇恆指 10000點應該跌唔穿，就算跌穿應該亦唔可能返去沙士時嘅8000點。理由係今次唔同沙士，仲有人出街仲有人消費，而且當其時仲未有自由行。不過就算個市唔跌亦唔代表會大升，其實出年年中前唔買股票都可能冇蝕底。

經濟越嚟越差，今日就有美國冬甩店執笠。不過維京人相信逆境中總會有條生路。各位要沉著應戰，危中總會有機。最緊要係家下要保持樂觀，明天會差唔代表後天唔會更好。

係喎，明晚六合彩估計頭獎獎金一注獨得有3800萬，何況一試運氣？等小弟拿拿臨買番注先。中咗就真係後天會更好喇！

祝各位好運！Cheers！

匯控終淪陷的血色星期五

維京人今日忙到抽筋，基本上都冇乜時間睇住個市，不過心情就非常非常非常愉快。呵呵呵．．．何解？之唔係小弟一向睇淡嘅匯控（#00005）一如所料，跌返去沙士價！今日暴跌，紅衫魚真係守唔住，仲同預期一樣樣跌破 $90。收市＄88，返番去沙士時嘅價位，一日瀉咗＄12.6 或 12.52﹪！

個市淡到咁，維京人卻贏了近期難得嘅一役！原因係喺今個月１３日個市大反彈，恆指一度升咗1500點時，小弟買咗匯控嘅 put 輪 #14312，今日大升 30%。如果以小弟嘅買入價 $0.188計，帳面已經賺咗約72﹪！

匯控暴跌嘅原因，其實都同維京人較早前所講嘅一樣：佢持有太多新興市場嘅投資喇，今期金融海嘯已經由美國殺到歐洲再撲落亞洲同埋其他新興市場度，預計佢嘅業績應該唔會好得去邊。匯控個價喺呢次海嘯中算係跑贏大市，照計佢冇理由會跑贏同業，個 PB 值仲鬼死咁高。今日大摩終於亦將佢嘅目標價調低到 $75，仲話佢可能會削減一半股息。

連匯控都失守，市場陷入極度恐慌，好友信心儘失。港股午後跌穿 13000點，恆指收市報12618點，跌1142點。原來恆指已返番去04年8月以嚟嘅最低位！塵歸塵土歸土，還原基本步，一切又好似由頭嚟過咁。之不過，呢嘢還原基本步係咪淨係返去４年多前就夠皮呢？定係話要返去沙士時？今日已經有唔少人牙斬斬，講話恆指今次起碼要跌至 8000點先至會見低！係真係假，真係天曉得。

日圓升至十三年新高，美元日圓曾報約 91。一日跌咁多，日股亦順勢跌接近一成，收報7649點，已經唔知係幾多年以嚟嘅低位。咁樣嘅還原基本步，問你死未！

維京人其實都好相信價值投資法，相信買優質股長遠應有可觀嘅回報。只不過小弟亦唔會買股作長線投資，理由有幾個：

1) 長遠投資要睇下幾長。好似日股咁都可以返番去十幾廿年前個位都唔奇。
2) 經濟蕭條可以蕭條好幾年，優質股亦可以有排都唔升，唔駛急住買啫。
3) 原本係優質股都可以因為經濟因素而變成劣質股。如果長揸，到你發覺佢係劣質股時相信已俾人質低。
4) 最重要係，我唔係巴菲特，適合佢嘅投資方法未必適合自己。假設佢有幾億，蝕一半雖然肉痛但唔會死人。我身家冇咗一半就就已經好憂柴憂米。

歐美股市今晚都出現恐慌，全線下瀉，真係好一個血腥嘅星期五。美股杜指期貨喺開市前段，急挫５５０點，跌到停板。杜指一開市已跌超過500點，寫呢篇 post 嘅時候就好番少少，跌二百零點左右。

無論今晚美股表現如何，小弟都可能會喺星期一平咗隻 HSBC put 輪 take 咗 profit 先。股市直插咁多日，今日已經有人睇匯控會去到 $60 甚至 $40。喺市場一遍睇淡氣氛中，大圍嘅諗法好有可能都係錯嘅。相反理論下個市下個星期可能會反彈。另外，喺北京開嘅歐亞峰會，可能各國會有 D 你做唔到嘅救市措施出現。所以有得食就食，唔係就罪大惡極。

今個周末開始轉涼，大家著多件衫。經濟唔好，無謂冷親唗錢睇醫生嘛。

祝各位有個愉快嘅周末。

匯控百元攻防戰

星期三晚花旗國企業業績麻麻地，市場關注點繼金融海嘯略為隱定後又變番擔心經濟衰退。DOW 連續第二日插水，跌 5.7%，超過 500點。亞洲各國繼續試低位，港股亦一開市已失守萬四點，最高時候曾大跌超過800點，中午食完 lunch 後跌幅稍為收窄。最後恆指收報 13760點跌 506點，約3.5﹪。係三年半以嚟嘅新低。成交　564.6億，睇嚟港股開始步入熊市三期，買賣將會兩閒。港交所現價 $77.5，如果成交有一段時間（估計半年左右）持續咁少，睇嚟股價返落去 $65甚至 $60都唔係咩難事。

近排嘅財經新聞其實都冇乜咩「新」聞：報指數嘅都係得個「跌」字，或創 XX 年嘅新低。如果唔理點數同埋年份，真係同一段片日日播都冇問題！

匯豐控股 (#00005) 今日開始進入百元攻防戰區！今日一開市已低見 $99.1，成個朝早都係喺低位陪迴，淡友得呈。話晒１００蚊點講都係重要心理關口，於下午開始好友反攻。其實例牌地每次匯控一去到低位總有一眾散戶築起血肉牆城，令股價扯番高少少，去到 $101.8。收市４：00 後嘅競價時段唔知係咪大戶做嘢，唔俾佢 day high 收市，係都要掟番落少少。最後收市報 $100.6， 比昨日收市價跌 3.08%，呢場攻防戰暫時好友略佔上風免強守得住，淡友擇日再戰。

小弟已喺上星期一開咗 HSBC put，買咗 #14312，暫賺約 32%。對匯控嘅目標價為 $90。就嚟進入公布業績期，估計匯控新興市場嘅業務會做得好差，不過據聞中信泰富 (#00267) 炒外匯單生意匯豐有份做，睇嚟匯控裡面嘅叻仔叻女都幾醒，一單 deal 己經執佢幾個億。

美國啱啱開市，都幾波動。 DOW 初初升差唔多成百三點，寫呢篇 post 嘅時候又反彈番超過二百點。唔夠兩個鐘，杜指波幅已有三百點。花旗國仲係壞消息不斷：第三季斷供升71%，估計斷供潮未咁快完；啱啱公布業績嘅聯合包裹（UPS）按年倒退9.9﹪；通用電氣 (GE)　同 Goldman Sachs (GS) 都話要裁員。

經濟差麥當勞生意反而好，話晒食餐飯麥記點都平過茶餐廳嘛。佢仲啱啱出咗款 Wasabi 魚柳包，睇嚟好似好好味咁。維京人都會去試下。食過嘅朋友不防話俾我知係咪真係咁好味啦。

美國後欄失火，港股低處未算低

港股喺放完國慶黃金周假期後嘅一個禮拜，正正係金融海嘯殺到正一正嘅一個禮拜。恆指於１0月１0日星期五收報14796，去到三年嚟嘅低位。當其時，維京人已經喺度好明確咁話每次反彈都只係迴光反照，而且強調恆指一定未見低位。

上星期一環球股市受全球聯手救市消息所影響而暴升，維京人當日好身體力行咁買咗貨，不過唔係買升而係買跌（買咗 HSBC put)！結果，今日恆指果然又見低位，收市報14266點，跌774點或5.2﹪，成交略增至540.9億元。即月期指仲大跌1064點，報14106點，轉大低水１6１點。查實恆指今日下午開市後都曾經暴瀉超過千點，低見14038，仲低過１０日嘅低位14398點。萬四點真係危危乎也。

睇番技術分析，其實恆指己經進入超賣區，９天 RSI 仲背馳，達32.5。理論上恆指已經跌過籠。不過金融海嘯下，壞消息過後仲係壞消息，壞消息過後仲有更壞嘅消息，沒完沒了。其實同牛市一樣，大牛市升勢永遠唔知升到去邊，熊市一樣個市會越跌越有，你一定估佢唔到。既然係咁，做人最緊要有想像力，暫時小弟睇恆指應可先挑戰 12800。

小弟睇淡匯豐，其中一個理由係覺得今次金融海嘯，金融股受當其衝，當年沙士佢個價低見 $88，照計今次佢嘅影響亦應該俾當年更勁，話晒今辦開金融股嘛，所以都幾有信心可以落番去 $90 左右。維京人講呢番話嘅時候（即個零禮拜前） HSBC 仲係百一蚊多 D，今日已低見　＄103.8！

今日睇經濟日報，專門研究新興市場經濟嘅季霆剛亦提出東歐受海嘯所累，而匯豐又好大機會受東歐所累而堪憂慮。理由係今年匯豐原來投資東歐業務唔少，就等維京人做文抄公：

３月　
斥２億美元擴充俄羅斯業務；

４月　
於捷克開扣拓私人財務業務；
於烏克蘭開設第一家分公司；

６月　
於格魯吉亞開展業務；
於波蘭開展卓越理財服務，為全球第３９個國家設有該項服務；

７月　
於哈薩克首都阿斯塔納開設第一間分行；
委任著名銀行家 Simon Jukes 及 Arjan van den Berkmortel 為集團於希臘及捷克嘅總裁；

8月
於維也納開設環球資產中心。

東歐國家基本上未入歐元區，而呢 D 國家一直有高信貸增長率，為當地人借貸都係以低息嘅美元或歐元做按揭嘅。只要美元或歐元兌當地貨幣升，即當地貨幣跌，借咗美元錢或歐元錢嘅人就更難還外債，咁東歐國家嘅資產相對惡化，調番轉頭又會影響番母公司嘅業務，如匯豐。

咁當然， HSBC 一日未公布業績，一日都未知第三季佢做成點。只係小弟就略為睇淡，買佢跌對沖下風險嘛。

原本美股尋晚都做得唔錯，不過受後欄拉丁美洲各國失火所影響，所以臨收市１０分鐘跌番落嚟。阿根廷宣布國有化私營退休金，令股票經紀形容話此舉等同沒收國民私有財產；今日又傳墨西哥有公司好似中信泰富咁又輪外匯，巴西做紙嘅巨頭 Aracruz Celulose SA 同工業界嘅巨頭 Grupo Votorantim　亦係有關嘅傷忙名單中。睇嚟今次金融海嘯引致嘅外匯波動，又影響埋賭美金落嗰班友仔！全世界都係咁架喇，南韓係咁印度係咁香港係咁，拉美一樣都可以係咁！

今晚美國勞工部公布九月份失業數字，係 911 事件以嚟最高嘅。市場又開始擔心經濟衰退，寫呢篇 post 嘅時候美股又大跌，DOW 跌咗 380點或 4.22%，如果收市前唔回升，聽日港股又再跌過！

家下緊係要順勢而行，無謂買貨博反彈！

小心小心！

玩大咗！

維京人實在太保守喇，尋晚竟然估中信泰富 (#00267) 因為受炒外匯輪咗所影響，今日開市會跌 5 - 7 %左右。結果嘛，中信一開市已經急瀉 6元，跟住俾摩根大通、美林、高盛等唱淡或叫沽貨，同埋澳元又咁啱今日大幅回落，最後中信收市一共跌咗8蚊，即55% 有突，收市報 6.52元。感覺就好似前排美國嘅金融股咁，跌幅嚇死人！

今期市場焦點已經由金融海嘯轉變為中信事件，特別係堂堂一間上市公司，究竟邊個需要去負呢單嘢嘅責任。已辭任嘅兩位管理層張立憲同埋周志賢，離任時嘅崗位為財務董事同埋集團財務總監。但俾股壇長毛 David Webb 揭發兩人同年報上的職位有出入，於年報上的職位分別為副董事總經理及執行董事，令人摸不著頭腦佢哋係幾時被人委任。

另外，公司主席榮智健家族亦有人喺中信任職高層，佢個仔榮明杰係係「副總事總經理」，個女榮明方係「財務部董事」。雖然太子女係集團嘅財務董事，但由於佢唔係喺董事局，而且論職級，張立憲一定係較高級，據稱是次涉及嘅虧損投資，由張立憲決定，所以張生才是最終負責人。至於董事總經理范鴻齡則宣稱財務呢瓣係直接向榮生匯報，所以又好似唔係好直接關佢事。

令市場人士不滿嘅係，點解９月已經知道出事，當其時又唔公布？點解又唔當時候平倉？點解要等澳元跌到阿媽都唔認得時先出聲？仲有就係大企業就算對沖風險，點解又會買 D 賺有限蝕無限嘅高風險 I Kill You Later？最大鑊係個合約要到 2010年7月先夠期，到時澳元跌番去咩位呢？如果跌到去前幾年低位 50美仙，佢就要蝕260億港元，比家下市值百多億仲要多！睇嚟呢舖中信真係玩大咗！但完全莫名其妙嘅係點解要買類似 I Kill You Later 嚟做對沖？點解唔買蝕有限賺無限嘅期權？再問落去，已有人問點解太子女又唔駛落台？

事件耐人尋味，令人諗起家好月圓。

呢間老牌大紫籌間接受金融海嘯所影響，單日市值唔見過半，真係欲哭無淚。如果唔係佢阿媽救佢，分分鐘真係會好似雷曼兄弟咁一日跌八成。堂堂龍頭企業亦如此兒戲，就好似 D 公公婆婆一樣唔識債券股票衍生工具而買咗雷曼兄弟嘅迷你債券一樣，如此管治水平，真係令人對紅籌又好、市況又好，都冇乜信心。

民主黨都收到市民投訴，指事件非常不公平，一夜間公司損失一半錢。由於中信泰富有多名管理人員任職財金官員，今次事件可大可小，所以已要求證監介入。 umm .... 太子爺小心呢單嘢嘈到阿爺度呀，分分鐘連位置都不保呀。

港股今日可能受事件影響，尋晚美股升咗超過400點同埋亞洲其他地區升市都冇用，斯人獨憔悴。恆指曾跌穿15000關口，收市報15041，跌281點或1.8﹪。大小投資者心血越嚟越少，擔心中信事件可能只係眾多上市公司嘅冰山一角。金融深淵，大家都冇膽趁低吸納，成交得番506億左右。

補番一句，中信泰富投資槓桿式嘅外匯買賣合約，據聞涉及嘅銀行包括 HSBC （#00005） 同埋法國巴黎銀行。

中國要很牛

如果你係地球人，就無可避免地要承認全球開始陷入衰退。喺呢個一片哀鴻遍野嘅地方，要搵一 D 有經濟增長嘅地方已經唔容易。Buy China，可能係家下唯一嘅選擇。

之但係中國在當前環球動盪嘅環境下，今日公布嘅首三季嘅經濟，亦儘顯下滑趨勢。GDP 增長終於由雙位數回落至比同期增長 9.9%。據中國社科院金融發展研究室所講，原因有幾方面啦。一嚟四川地震有滯後效應，二嚟攪奧運又停咗北京同埋周邊嘅生產，而且最大鑊係遇上數十年難得一遇嘅金融海嘯，影響進出口，間接影響經濟。

小弟就覺得除咗以上原因外，仲包括股市同埋樓市表現唔理想，財富效應下影響消費亦係其中一個重要因素。

睇嚟阿爺亦睇得出自己可能係全球數一數二仲有咁強勁增長嘅地方，面對全球經濟衰退嘅風險，難怪調控措施亦要改變方向，要包括保住經濟增長啦。咁又難怪，祖國國力增強，對世界嘅影響力亦日益重要。保住自己嘅經濟，其實比直接救市可能對世界嘅貢獻仲要負責任。

睇嚟，Jim Rogers 要講唔係 a bull in China, 而係要講 a bull need to be in China 先啱。即係話，中國唔係很牛，而係「要」很牛。家下好多人靠中國搵飯食，中國好，實情唔只香港好也。

受外圍股市及內地股市反彈下，港股今日做得唔錯，恆生指數今日收市報 15323點，大升 768點，超過5﹪。成交萎縮至約537億。升市成交少，各位要小心。

收市後中信泰富 (#00267) 發出盈利警告，指為咗減低西澳洲鐵礦項目所面對嘅貨幣風險，簽咗槓桿式外匯買賣合約而引致虧損。暫時已經虧損咗8億港元，按市值計約蝕有147億元。只要澳元繼續跌，佢就會蝕得越多。

呢單嘢，其實可以話係受到金融海嘯間接所影響。中信掌櫃原本驚住澳元歐元等貨幣有上升壓力，所以諗住買番 D 金融工具對沖下。本身都唔可以話佢錯，不過好買唔買，點知走咗去買外匯嘅 accumulator，當澳元跌穿0.78時要雙倍接貨。賺就有 ceiling，蝕就無底深潭。所以咁就賴嘢。

真係估唔到堂堂上市公司，咁蝕底嘅嘢都肯做。睇嚟聽日呢隻嘢都會跌坐底超過 5 - 7 %。好彩中信佔恆指嘅比例唔係好大，不過部份投資人士可能會因為呢件事對中資機構存有戒心。

至於個市，小弟真係估唔到咁嘅市況仲有咁多人想博反彈。希望各位真係記得呢個係「反彈」，而唔係「轉勢」就得喇。如果唔係，怕你反彈都唔肯放貨，會死得好快！

為咗增加各位嘅危機感，補充一下：今日又多一間內地設廠嘅港商（港聲電子廠）倒閉；而香港今年七月至九月嘅失業率微升至 3.4%，預期情況會越嚟越差。各位打工仔喺呢 D 咁嘅時勢睇嚟都係唔好郁 D 遲到早退請病假，否則會好快死先者也。（實情維京人都係打工，想提醒自己咁啫！）

Good luck!

「跌」數難逃

維京人上個禮拜先講過，每次嘅升市只不過係迴光反照。

講完後嘅星期一全球股市暴升，恆指升咗1515點，之後嘅星期二又升多512點，兩日合共升咗超過 2000點！部份睇過維京人呢個 blog 嘅朋友當其時仲問小弟有冇睇錯市，理由係全球央行一齊救市，個市應該會見底。維京人一於好少理，喺星期一就開咗 put。

睇番港府當年 (1998年) 救市，淡友以為港府冇料到，救嚟都冇用。最後結果嘛，市場力量唔係大晒，當其時淡友全軍覆沒。

此一時不同彼一時也。維京人堅持呢期反彈只係會反彈，金融海嘯頂得住唔代表經濟衰退頂得住。

結果，市場嘅睇法同小弟嘅睇法一模一樣，星期三開始了另一輪嘅骨牌式下跌。恆指當日跌834點，尋日跌767點，尋日寫 blog 開口埋口話今個禮拜都係會跌，結果今日恆指超乎完美咁同小弟嘅預測一模一樣，照樣係跌！

今日恆生指數跌 676點，收報 14554點；國企指數跌 355點，收報 7007點。尋晚美國杜指出奇地由跌約３００點倒升超過４００點，結果今日香港都係要大跌。一周計數，今周恆指微跌約 250點。所以都係開跌，「跌」數果然難逃！

由舊年８月左右開始，次按風暴越演越烈，後以今年九月開始嘅金融海嘯將台戲推向高潮及白熱化：銀行不穩持續惡化，信貸失衡、信用破產、銀行倒閉等等。前排政府仲話風暴啱啱開始，除股票市場外，香港人其實還未真正感受到任何負面影響。

怎知道，說時遲那時快，經濟衰退已悄悄喺大家身邊出現，而且殺到大家一個措手不及。賣衫嘅清盤、賣金嘅俾人追數、做玩具嘅執笠、今日到賣電器而且有62年歴史嘅泰林亦宣告結業，企業倒閉潮陸續浮現。去年勁賺14億元嘅知名基金公司惠理集團（#00806）喺月頭已炒咗一成多嘅員工、匯豐（#00005）前排亦好快手宣佈裁減一部份後勤員工（又係先裁 IT，激死！）、兩大地產代理中原同美聯（#01200）雙雙減分行或裁員！

呢種感覺，美國佬可能之前未感受過，但香港人嘛．．．感覺似曾相識，難道又是依稀 SARS 時？

今晚美國又有數據公佈：新屋動工量創１７年新低；消費者情緒指數為57.5，大大低過市場預期嘅 70。DOW 開市即回吐逾２００點，後因科技股如 Google (GOOG) 同埋 IBM (IBM) 有錢賺而且業績好過預期，令道指一度回升，寫呢篇 post 嘅時候就略為微跌　60點。

其實美股呢排波幅都好大，而且走勢飄忽，好似等緊終極壞消息咁。

小弟手持 HSBC put 輪 #14312，由於隻輪溢價比較高，正股跌幾個巴先隻輪都未肯大升。Anyway, as 睇 HSBC 會跌到低過 $90，暫時持有，當係對沖下經濟差嘅風險。

祝各位有個愉快嘅周末！

另一輪骨牌式下跌

各國出晒飲奶之力咁挽救金融機構，令到金融海嘯嘅威力一時間大大減弱。香港亦成功咁避過呢一刧，起碼 so far 冇聽過話任何一間金融機構出事，除咗東亞受傳言影響而出現短暫濟提潮外。基本上可以話，呢個金融海嘯已經完結。

海嘯完結，唔代表後市可以看好，因為而家先至考驗收拾殘局嘅時候。大家都預期嚟緊呢年幾兩年經濟都唔慌會有好轉。

美股尋晚受褐皮書同埋美國聯儲局局長伯南克嘅言論所影響，DOW 昨晚跌超過七百幾點，係 87年股災後最大嘅跌幅。阿伯果然係學者出身，唔係好識講大話：話雖然金融危機已過，但經濟仍有衰退嘅風險。咁又係，救經濟仲難過救金融機構，睇嚟唔大蕭條淨係衰退都有排衰。

市場信心散渙，今日亞太區股市亦平均跌超過１成。日本日經平均指數亦係87年以來最大跌幅，跌1089點，收市報8458點。南韓亦跌超過百份之九。內地個市嘛．．．原來上年指數創咗歴史新高，收6124點，當其時大家都喜氣洋洋預祝今年嘅奧運。今年今日上證指數低收　1909點。真係去年天堂，今年地獄。

港股個市又點呢？星期一及星期二玩大升市，恆指懶勁咁加埋升咗超過 2000點，不過呢 D 都係拜之前跌得勁所致。反彈完成後，第二輪骨牌性下跌即馬上展開。星期三插 834點今日又跌 767點，一加一減，截至星期四恆指今周約升咗 456點，好有可能聽日插埋就變倒跌。

維京人手頭持有 HSBC put 輪 #14312，暫賺約 10%。暫時打算繼續持有。就嚟各大銀行股會公佈業績，小弟睇 HSBC (#00005) 可能會跌到去 $90 左右。

補充吓今晚老美個市，都有幾個好重要嘅數據公佈：CPI 無升跌，俾預期會升少許嘅為好；首次申領失業人數亦較上一周好；工業生產同埋制造業指數就遠遠超出預期咁差，其中制造業指數仲係 18年低位，顯示 financial sector 嘅不景氣已漫延至 manufacturing sector，美股亦又由升轉跌，寫呢篇 post 嘅時候 DOW 又跌咗約 300點。

今朝聽收音機，煲呔出席電台聯播，回答聽眾對施政報告嘅提問。維京人驚訝發現，打電話去嘅聽眾都唔係淨係識得叫政府派錢，唔似得 D 疑似台灣政客嘅議員淨係識咆哮攞錢咁。有聽眾亦同維京人一樣係反對設立最低工資者。小弟聽到後都覺得開心咗少少，原來香港仲有得救！而煲呔近期雖然不斷受人批評佢嘅施政，但今期嘅施政報告己經聽唔到乜嘢太過假大空，感覺務實同埋謙卑。維京人最鐘意務實嘅人，暫時仲係睇好煲呔，希望佢嚟緊唔好令大家失望啦。

Cheers！

設立最低工資是見樹不見林

今日維京人心情真係唔多好，點解？之唔係今日阿 Donald 宣佈施政報告，話要攪最低工資咁囉。雖然維京人都唔係做生意，但如果識維京人嘅朋友，都知道小弟一向都以市場為主導。如果唔係呢個 blog 就唔叫做「市場維京人」啦。既然係市場主導，一切阻礙市場自由度嘅行政措施基本上小弟都係唔係好認同。

我成日都唔係好明，設立最低工資係咪真係幫到香港比較工資低嘅一群。為咗整理自己嘅思維，試試整理一下以下嘅分析。以下所講嘅市場價係指若沒有最低工資，僱主願意付出而僱員願意打工嘅工資水平。

情境一：假設最低工資 = 市場價

僱主方面：既然呢個水平同市場價相差無幾，僱主覺得要請人就要付出同最低工資一樣嘅價錢。設立最低工資喺呢個水平對企業影響唔大。

僱員方面：如果一個人有能力，咁當然可以搵到份比最低工資高人工嘅工啦！相信大部份香港人亦屬於此類。如果一個人無咁好能力，咁但係佢又想搵工喎，佢唯一可以競爭嘅就係工資。除非佢壓低自己嘅工資，否則僱主唔會請佢。如果設立最低工資，呢類人只會失業。

情境二：假設最低工資 > 市場價

僱主方面：企業一定會為咗降低成本，以裁員節省開支，或改變營運模式以取代勞工，例如設立自動櫃員機，減少服務人員等。大企業問題一般影響也不大，但如果係中小企，工資一般都會佔營運成本一個比較高的百份比，頂唔住嘅唯有執笠。無論企業是否頂得住，如此一來，失業人口勢必提高。

僱員方面：當實施最低工資嘅初期，如果係大企業，僱主一般都會睇定 D 先，未必會咁快有咩人事上嘅改動。過咗一段時間，如果工資只佔企業營運成本一小部份，自身身價比最低工資低嘅僱員（即能力未達到僱主值得以最低工資俾人工佢嗰班人），都可能可以繼續混水摸魚喺大企業度混落去。如果喺中小企打工嘅員工，則好大機會當最低工資實施嘅時候，就已經俾人炒咗！！

情境三：假設最低工資 < 市場價

僱主方面：如果用最低工資請人，由於最低工資少過市場價，所以應該請唔到人。企業唯有提高至市場價先會有人 show 佢。不過唔排除有 D 能力冇咁好嘅人會降價以吸引僱主。咁樣對僱主點都係多咗選擇。

僱員方面：如果企業以最低工資請人，正常僱員都唔會去做嗰份工。唯獨是能力比較差嘅人，佢仲可以降低自身嘅身價，同 D 俾佢能力高嘅人競爭。

設立最低工資只會對那些想混水摸魚的人有利

睇過晒上面嘅分析，似乎設立最低工資，只係會對社會上最窮最沒經驗同埋最沒有生產力，而又想混水摸魚嘅人有利。即係話，有關人等嘅能力，未達到僱主值得以最低工資俾人工佢嗰班人而已。

咁當然，我哋又唔可以忽視弱勢社群。

如果有人嘅能力真係唔多掂，而且個人能力亦冇辦法達到付出最低工資僱主嘅要求，而僱主可以提供嘅又唔可以滿足一個人生活最基本最基本嘅需要，咁點收科？喺香港，其實呢點真係唔駛擔心，因為其實香港亦已經有綜援制度，如果能力未達標，請找政府，而不應該找企業。

小弟堅持若設立最低工資法，睇牌面，立法者嘅眼光實情根本就係超級短視，見樹不見林。

大升市的第二日

繼昨日港股暴漲 10.24% 後，昨晚歐美股市繼續作出報復式反彈。歐美全力救市，杜指昨晚又破紀錄，上升936點，創歴來最大點數升幅。港股今日受美股做得咁好而再亢奮，一開市恆指已升 829點，一度衝破 10天平均線至17141點。

不過，原來開市的高位就係今日全日嘅高位，最後都衝唔破 10天線。恆指收報 16833點漲 3.1% 或 521點，成交略增至 817億港元。內地個市仲樣衰，倒跌收市。A 貨股民似乎對股票越嚟越冇信心，每次反彈都越彈越弱。

今日香港政府趁全世界出手救市嘅時候，收市先宣佈動用外匯基金為香港所有銀行存款提供百份百保障，並設立銀行備用資金安排，直至 2010年底。香港係繼德國、冰島、澳洲、新西蘭、台灣等國家地區宣佈為銀行存款包底。睇嚟呢個措施都係針對近日東亞所發生嘅無厘頭嗌擠提事件。

其實港府係咪真係驚過籠呢？今期美國金融爆煲，其實係因為佢地玩衍生工具同埋做 D 結構性產品玩得太儘所致。次按一爆煲，各金融機構短錢即時唔夠冚長錢，所以眨吓眼就話要執笠。香港嘛，實情銀行存款準備率比外國高，外匯儲備又大把，政府又唔係有赤字，係咪又真係有需要以納稅人嘅錢做咁樣嘅擔保？

今期呢個金融海嘯，話明係海嘯，緊係只得一個浪冚埋嚟，浸死大家就算，而唔會係一浪又一浪咁殺埋嚟。既然香港都冇受個浪冚死，相信政府官員似乎過份驁青。前排政府財金官員又話風暴啱啱開始，但問題係香港金融機構係咪真係咁差？又話實力夠又話叫人唔好自亂陣腳，但個風未殺到嚟港府已經出手，感覺上係有 D 自打嘴巴。

毒奶事件出手就好慢，金融風暴就提早出咗手，好似 timing 唔係好準咁。雷曼「謎離」債券事件攪咗咁耐又仲係得個拖字。睇嚟有關嘅苦主都係繼續爭取繼續等，直至當公眾亦忘記呢件事就會冇事。

英國首相白高敦今期真係當紅，因為英國為銀行注資成功為當地同業拆借情況解凍。今期升市某個程度上都係靠佢咋。美國政府見英國呢招咁 work，睇得出問題晶結所在，今晚老美殊仔亦宣佈注資入去九間大型銀行股，見人地條橋好就照抄。杜指開市一度都急升過約四百點㗎，不過寫呢篇 post 嘅時候 DOW 則倒跌廿零點。

金融海嘯雖然可以話係完結，實情就係時候開始執手尾。好似地產市道咁，中原同美聯都開始話裁減人手，而估計歐美國家經過今次事件後，元氣都大傷，未必短時間就有能力有資金可以去大肆消費同埋投資。個經濟出年年中前都可能唔係咁好。其實救完市只係代表救完金融市場個市，令到 D 銀行保險公司唔駛執笠咁啫，經濟係咪唔會衰退家下都未知。

各國無所不用咁樣救市，如果大家又放肆當冇事，繼續放寛借貸，相信過多幾年就會有大通帳，到時個泡沫唔排除會更大。

前排個市跌得咁勁只係代表大家驚有金融機構執笠咁啫，仲未反映後面經濟有幾差。小弟繼續持有 HSBC (#00005) put 輪 #14312，出年年中夠期同埋行駛價為 $113.88，衰在成交少。睇 HSBC 前排都冇乜點跌，其實市帳率已經徧高，相信佢嘅業績唔會大好，睇嚟點都要跌番浸。

聽日又到公佈施政報告嘅時候，唔知 Donald 係咪又繼續講救市講經濟而唔講政治？

Good luck !

重虊終見成效

個市跌咗咁多日，今日終於算係暫時止瀉。可見各國央行上星期落嘅重藥終於有 D 見效。恆指今日一開市就先高開２００點，之後反反覆覆。午市返嚟後連同內地 A 股一齊抽番上去，最後恆指巨升一成有突，收市報 16312點，即升咗 1515點！成交則一般，只有七百幾億。

歐盟十五國過去嘅 weekend 開會，最後決定聯手注資、入股、重組甚至做擔保政府都做埋！咁樣落重藥法，市場乜信心都返晒嚟。冇理由唔會先刺激亞洲個市先升，然後輪到再輪到歐洲嗰邊升咯。

日本今日休市，但一樣有消息。三菱 UFJ 銀行入股 Morgan Stanley，睇嚟日本仔都開始唾唌美國嘅銀行股嘅美色。咁又係嘅，美國佬唔係成日都肯俾人入股銀行股㗎嘛，真係經貴！唔知阿爺嗰邊 D 銀行又會唔會入番 D 美國嘅平貨呢？

亞歐股票市場今日基本上都大升，美股方面，杜指亦出現報復式反彈。寫呢篇 post 嘅時候 DOW 一度升超過 500點。如果美股今晚可以保持呢個升勢，聽日港股都會升多少少。

各國咁樣落重藥，總算暫時止到血。不過美國經濟相信就如患 cancer 嘅病人一樣，食咗重藥做咗電瘵，就算醫返好都會好虚弱。雖然海嘯個浪一嘢就打散晒個市，而通常海嘯都唔會一浪大過一浪，反而係海嘯後嘅經濟會點先係真係要留意嘅。美國公認有排衰，英國央行已經預見經濟會嚴重放緩，新加坡亦陷入衰退。股市走在經濟之先，睇嚟呢個會係下期炒落去嘅藉口。

維京人今日好忙，都忍唔住入咗市。不過唔係買佢升，而係買佢跌。由於睇 HSBC (#00005) 前排好有支持，小弟估佢有機會嚟緊呢期會成為俾人質低嘅對象，所以小注買咗佢嘅 put warrant #14312 @ 0.188。如果 HSBC 正股升到百二蚊，會再買多少少 put。估計呢個反彈可能去到禮拜尾先完都唔奇。若 HSBC 升到 $130 就一定會止蝕。

呢個反彈浪可唔可以持續？一係索性轉勢？定係好快又玩完？又睇下點？

Good luck !

每次反彈都只係迴光反照

全球經濟環境變差已係不變嘅事實，而好明顯呢個海嘯表面仲未影響到香港好深。點解咁講？君不見旺角一樣係咁多人買嘢？周末落 bar 一樣有好多人？去到啲電器舖仲有好多人想買新手機？睇財經台一樣仲有好多人想撈底？仲有人覺得 HSBC (#00005) 現價好有支持，應該好穩陣？仲有一班散戶堅信阿爺出手個市一定唔會衰得去邊？

港股星期四反彈約五百點，小弟初頭都以為可以有個似樣嘅反彈。點知上星期尾恆指約萬七點，星期五已經去到14796，一個禮拜已經跌到 2886，係三年嚟嘅低位。

A 貨星期五受中石油尾市買盤帶動，上證指數一度跌穿2000點後免強頂得住2000點。不過睇嚟阿爺出咗咁多招都冇反應，似乎要繼續尋底。

維京人今期同政府財金官員同一陣線，堅信海嘯個浪只係啱啱開始。相信個市仲有排差。大家睇下今期全世界財金官員都出晒飲奶嘅力去維持住金融市場嘅穩定可以看出一二。

今年好多嘢發生，樣樣都俾人話係數十年甚至百年難得一遇。例如四川地震、中國攪奧運、中國太空人喺太空漫步、百年老店雷曼兄弟執笠等等。係嘅，全部都可以話係近幾十年甚至近百年都未見過，不過最駭人嘅係今期嘅金融海嘯，連被稱為最響往自由經濟嘅美國亦出手救市，而且全球央行亦聯手打救！各國之齊心、出手之快速、場面之悲壯，好明顯，呢次嘅危機應該係俾之前幾次嘅今融危機嚴重，同埋影響巨大。

既然係咁，小弟就要以古借今。雖然歴史唔會簡單地重演，但相信或多或少都會有類似嘅大方向。小弟覺得有生之年見過最肅條嘅事件就係 SARS，嗰年嘅四月一日哥哥張國榮仲離我地而去，真係乜嘢冇可能想像到嘅事情都可以發生（每次諗起哥哥嘅死其實真係感覺好傷感）。嗰年如果冇記錯，HSBC 好似都曾經去到 $80 左右。如果今次金融海嘯比 2003年嘅情況更惡劣， HSBC 估計都應該可以去到低過 $90！港股每次反彈都只係迴光反照，如無意外，匯豐一定會跌，恆指一定未見低位。

見高要買 put，就係咁簡單。

Good luck，同埋繼續懷念哥哥。

美股創新高一周年

唔係講笑，原來睇番上年嘅今日（１０月９日），美股係啱啱創完新高嘅。當時嘅杜指 (DOW) 喺８日（即係香港９日）收報14163點。睇番尋晚美股收報 9258點，跌咗 35﹪。驚覺時間過得真係好快，唯有嘆句過去一年都曾經披星戴月過，大家喺投資市場上迎風冒雪咁又過咗一年。

港股上年喺呢個時候仲牛氣沖天，大家都睇 35000 甚至有人發神經吹晒水話恆指會升破 40000點。通常呢 D 時候，亦係牛市見頂之時。結果仲記得十月個市就見咗頂，而股神四叔喺年底仲死雞撐飯蓋話個市喺 08年春天會好轉。實情熊仔已靜悄悄報到。

市場變化之巨，真係令人目定口呆。

個市跌咗咁多日，今日港股終於彈番五百零點。維京人暫時仲未睇好個市。階因睇圖其實仲未有跡象會好。呢次金融海嘯，應該比97亞洲金融風暴、2000年科網股爆破、200１年911、同埋2003年 SARS 殺到埋嚟仲要得人驚！之不過，各國救市嘅奇招亦係聞所未聞見所未見，暫時仲未知可以話見底未。

維京人見呢兩日個市反彈，正考慮開 put。睇嚟星期五係好時候。

Good luck!

金融深淵，救極都跌

呢期金融海嘯殺傷力真係超級驚人，一個浪又一個浪咁打埋嚟，都好似冇停過。

繼澳洲尋日慌失失慌死救遲一步都即時死亡走去減息一厘後，其他央行亦不為餘力，為銀根鬆綁。美國聯邦儲備局將聯邦基金利率由２厘減至厘半；歐洲央行將基本利率由４厘２５減至３厘75；瑞典央行將基本利率由４厘７５減至4厘25；英倫銀行的基本利率由５厘減至4厘5；加拿大將基本利率由３厘減至２厘５；阿爺方面，中國人民銀行亦減息０．２７厘，仲減埋存款準備金率同埋減存款利息稅，三招齊發；至於香港，任總亦將貼現率減 1%。而歐洲七家大銀行包括 HSBC (#00005) 同埋 Standard Charter　(#02888) 都齊齊放水。

維京人炒股票同外匯咁耐，真係未見過幾日之內各國會同時減息救市。減幅之大，行動之快，場面悲壯！

雖然各國都好有誠意出嚟救市，但海嘯已變成深淵，跌市沒完沒了。尋晚美股早段上升，大家以為可以喘定，點知尾市都係倒跌成 500 點；攪到今日亞洲個市跌到一蹋湖塗。日股跌破一萬點，重挫 9.4%；印尼交易所仲寸，跌幅超過 10% 索性暫停股票買賣！阿爺嗰便連續三日下跌，A50 (#02823) 又返番去 $9；港股食完 lunch 後受日股急挫下，恆指曾急瀉至 15500 左右，其後受歐洲七家大銀行聯合放水消息所影響，有買盤掃至 16300，當大家期待以為又有奇跡日出現，結果恆指就好似係狼來了嘅故仔咁，以全日最低位 15431點收市，瀉 1372點即 8.17%，全日成交都唔少，有成 77.8 億元，國企指數一如佢大起大落嘅風格，收報 7452點，跌幅 11.9%！

似乎大家都好習慣大冧市。當大冧市變成麻木，總會有人想博反彈。睇財經節目仲有好多人想買貨，通常仲有人想買貨，個市應該仲未見底。

睇嚟今期個市都係有反彈，冇錢賺。各位想博反彈絕對可以博，不過當諗起海嘯效應下，全球經濟將會陷入衰退， earning 減少其實家下個 PE 都唔算低。相信個市反彈後都會好快俾人沽番落嚟。聽晚六合彩金多寶，睇嚟買多幾注六合彩仲好過！

請請！

火燒歐洲，美股暴跌

今期美國次按嘅火燒連環船威力已經殺到去歐洲。德國第二大房貸商 Hypo Real Estate (HRX) 陷入倒閉，最後又要政府出手：德國政府、德國央行、監管機構同埋其他金融機構聯手急救。德國前兩日仲好大支嘢話唔 join 法國政府提出由歐盟成員國共同出資嘅救市措施，點知轉頭就自己就出事。好彩德國佬今次都算反應快，仲話會同德國嘅銀行存款包底，俾香港嘅十萬個放心更加放心，算係暫時過到關，未引致更嚴重嘅恐慌（起碼無東亞事件發生）。

美國政府上星期五雖然大拿拿拎咗七千萬美元出嚟，但最心痛是，救得太遲。亞洲個市今日就完全唔俾面，全面暴跌。日本跌到四年新低，澳洲跌到三年半低位。阿爺雖然喺周日公佈融資融券嘅措施，但又如何？內地房地產股同埋金融股無論 A 貨同埋 H 貨，股民都係一於要錢唔要貨。

A 貨只有券商股孤芳自賞，海通證券（600837）、國金證券（600109）、長江證券（000783）等唔係跌停板就升起碼超過 7%。上證指數暴跌一百二十點，或 5%，失守 2200點，收報 2173點。香港作為金融中心，家下百業嘅阿媽銀行股出事，港股大幅下挫，恆指失守 17000關口，收報 16803點，跌成878點，係兩年嘅收市新低。成交就唔多，只有473億元，今日可以話係乾跌。

歐洲開市繼續大插。美股喺小弟寫呢篇 post 嘅時候，DOW 一度跌超過 500點。

cnnfn.com

仲跌破 10000點，係四年嚟第一次低見呢個位。睇嚟呢期真係日日都可以係股災，而股災後嘅反彈只係反彈，然後又再股災，股災後又股災，然後又股災又股災再股災。日日驚嚇日日嚇到麻木，咁至係標準熊市嘛。

匯市今日都有近期新高／低位：歐元跌破 1.35，日本紙又返去１00。唔通過年去歐洲抵過去日本？

小弟原本尋日諗住阿爺救市，A 股可能或者都會升一浸。不過睇嚟事不在人為，政策造勢點頑抗都敵唔過市場嘅力量。睇嚟大家都可以放一排長假，唔好睇住個市感覺會比較良好。好彩聽日港股重陽節休市，唔知有冇機會避過一刧。各位可以考慮會當凌絕頂，一覽眾山小，只要大家唔係喺恆指３２０００點呢個高位買貨望番落嚟就得喇！

祝各位有個愉快嘅重陽節假期！

假期完結前，阿爺又出招

上星期個市咁波動，維京人都冇乜留意個市。而且內地又放黃金周假期，小弟返嘅又係內地公司，所以一於放假去也。

當知道美國聯儲局正式確定了救市措施後，維京人周末去咗中山玩咗兩日。其實中山都冇乜嘢好玩，志在食吓嘢行開吓咁。今晚啱啱喺中山食完馳名靚粥搭最後一班船返嚟。由於有颱風，坐船都幾驚濤駭浪，成船人有約三份一人嘔到七彩。令人諗起股票市場一樣，大起大落。

返到屋企睇新聞，嘩！阿爺又喺大家唔經唔覺咁（例如喺中山食緊粥）再次出招。呢次出嘅招係講咗好耐嘅融資融券。中國證監會宣佈啓動融資融券試點。原則係「試點先行，逐步推開」。試點期間只允許證券公司利用自有資金以及自有證券從事融資融券業務，試點取得成效後，有關嘅業務先會成為常規嘅業務。不過試點嘅細則會於近期才發佈。

由於市場對有關嘅融資融券期望甚高，睇嚟呢個消息應會「激活」股市。短期睇嚟 A 貨嗰邊應會有一浸升勢。可以考慮短線留意 A50 嘅 warrant。

有熊必有牛

呢幾日國際金融市場風起雲湧，上星期尾傳美國救市方案遭受滑鐵盧，令到周一港股即跌六百幾點。星期一晚美股就更加破咗紀錄，DOW 單日跌超過700點！星期二朝早諗住個市會繼續插啦，點知港股恆生指數由跌約九百點倒升番百零點，真係日升日跌，你估佢唔到嗰隻。

個市咁波動，維京人暫時平晒手頭嘅倉位先。靜觀其變。今期點睇？好明顯家下就係熊市，而小弟覺得應該係熊市二期末段。如無意外，熊市三期好快就會嚟到，到時個市水靜河飛，冇人想買股票，亦唔會有人想講股票。一眾大小戶嘅入市意欲幾乎等如零。呢個時候反而係俾 D 有遠見嘅人見到，會慢慢慢慢分批入市。

當到牛市一期嘅時候，大家都唔係咁想信個市會好番，而早少少入市嘅人就開始賺錢。

道理好似好簡單，不過要分辨牛熊有時真係幾難。

小弟會覺得呢排各國政府都出手救市，可能會令到熊三嘅時間縮短。喺呢 Ｄ 咁風高浪急嘅年代，都係保住個本揸 cash 先會隱陣 D。正所謂有熊必有牛，隧道的儘頭總會見到曙光。只係呢段時間要靜候出擊。

呢幾日香港政府又推出最低工資嘅 Proposal。唉，如果最低工資真係立法，一眾老闆請人肯定會更深思熟慮。其實工資呢下嘢市場自會自動調節：如果市道好，老細自然會請多咗人，或俾高 D 人工；如果市道差，咁公司自然亦會炒人；其實根本立唔立法都冇用，市場自會自行調節。最低工資呢下嘢又係 D 政棍喺度攪事之作，只見眼前樹木不見整個森林。

神七升空．美國救市

美國總統布硃同國會傾緊美國經濟點收科。紐約股市今晚就急升，主要係大家憧憬政府嘅七千億救市方案。就算內用品訂單等數據唔係咁理想，寫呢篇 post 嘅時候 DOW 已經升超過 200點。睇嚟受到政府嘅支持，杜指短期似係築緊底。

港股就牛皮，似乎仲有睇淡者。內地股市就受到融資融券嘅消息所刺激，A 貨嘅券商股飊升，集中漲停。上證指數仲一度直搗 2300，不過收市都係收喺 2300點以下，收報 2297點。

小弟持有嘅 #13894，大升超過 10%。由於買入價為 $0.101 相對比較貴，暫時仍蝕錢，不過會繼續持有睇多陣。

神七升空，若果今次探月順利，感覺上氣氛會向好。暫時唔考慮入貨或者放貨住。

股神買高盛．東亞傳擠提

阿爺出手救市，不過內地個市都唔係好頂得住。 A 貨前兩日繼續沽盤擁現，上證指數尋日仲險守 2200，今日一開市就已經跌破。臨收市唔知係咪阿爺喺背後發功，中石油尾市受神祕盤帶動，令到上證指數又返翻去　2200點樓上。收報 2216點，真係險過剃頭。

港股繼上個星期嘅大落大起後，今個禮拜呢個時候市場人士都係睇淡者比較多。港股普遍受美股帶動，美股受股神巴菲特入股買高盛都冇乜好樣嘅走勢俾大家睇吓，難免氣氛麻麻。

尋晚打完風，今日魚缸走勢反覆。今日恆指早段反彈升超過 300點，一度重上 19000關口，但其後升勢乏力，收市僅微升 89點，收報 18961點。成交一般啦，約 590億。

一眾食品股除咗維他奶 (#00345) 比較標青外，其他大部份唔駛點講就緊係冇運行啦！尤其係傳出東亞 (#00023) 擠提事件，攪到人心惶惶。有 D 似返番去 97 年金融風暴嘅 feel。

小弟下午都收到老豆打嚟急 call，問我有冇存款喺東亞度。好彩維京人幫襯開都係發鈔嗰幾間，所以都唔係好關我事。不過放咗工都忍唔住，走咗去其中一間分行睇吓乜嘢環境咁。仲影咗幾張 snapshot 同大家分享吓啦。






其實如果我有錢喺東亞，都唔排除學埋 D 公公婆婆走去排埋一份，攞番 D 老本。自從雷曼兄弟爆煲事件後，心諗百年老店話執就執咯，又有乜嘢係唔可能發生？雖然自己都覺得東亞事件係一個謠言，係絕對唔可能有事嘅，但大家都應該體諒排隊攞錢嘅小市民。今日連去咗美國公幹嘅三點不露主席都趕返番嚟主持大局，可見事態嚴重。

不過 AIG 俾美國政府救番又俾咗我另一番嘅啟示，就係買嘢要買大，因為政府唔想影響市場生態，就算最 buy 自由經濟嘅美國都會入市救市。既然係咁，我諗 D 資產放喺發鈔嗰幾間銀行應該相對嚟講都比較穩陣。東亞其實我都覺得好穩陣，因為佢嘅主席同阿爺關係都唔錯，小弟相信如果真係有事總會有人會出手打救，不過係邊個出手就唔知咯。

小弟上星期五買咗嘅 A50 call 輪 #13894 暫蝕約 20%。由於係小注，暫時 hold 多陣。

過兩日神七飛天，唔知會唔會為個市沖喜下？另外，今日 Google 仲公佈咗出 Google Phone，睇嚟手機市場繼續有一番熱鬧。

Good luck!

P.S. 小弟近排出咗個新 blog iPhone 維京人，大家記得幫忙 bookmark, forward 同埋 revisit 喇！ Cheers!

阿爺的誠意

星期四係翻版大奇跡日，尋日星期五又再發生大奇跡：尋日全球指數都發狂咁暴升，仲升到你唔信！日本升超過３﹪未算神奇，南韓升超過4﹪唔算勵害，台灣升多過5﹪亦係碎料咁啫。原來，原來仲有D更勁嘅！

代表中國內地嘅上證指數，星期五一開波已經有接近全部嘅股份漲停板。最後報升約9.46﹪收市，已經三爬兩撥返番去　２，000　樓上，係繼２00１年後大盤漲停。內地同胞唔知係咪見內地個市升到停板冇得炒，一於落嚟炒埋恆指。結果恆指由一開市已經升成千點，最後恆指收報　19，327點，升咗1，695點，即係　9.61﹪，可以話係全世界升幅最勁嘅地區之一！（俄羅斯仲發神經，升成２8﹪！）

美國銀行股破產，全球陪葬。明明美國嘅家事，結果為免連累全球經濟，齊齊唔理乜嘢市場經濟。總之就喺呢個非常時期執行非常措施。你話粗暴干預又好，話佢共產化又好，總之救番先算。

阿爺喺呢個咁風高浪急同關鍵嘅時候終於都出手，令大家嘅情緒好鬼高漲。國家救市三箭齊發，包括印花稅單邊征收、匯金公司將買三間銀行嘅股票、同埋國資委鼓勵上市公司回購或增時自己嘅股票，咁明顯嘅信號，大佬，好難唔跟你買㗎喎！所以今日大家都好識做咁一開市先升停板，而且唔俾佢停落嚟，令到 A 股個圖好鬼攪嘢，基本上係一條橫線。

照咁睇，今期嘅金融風暴應該可以暫時抖番啖氣。未來嘅經濟郤充滿危機同困難。如果美國嗰面嘅失業率無改善，又或者大家對美元失去信心，嚟緊應該仲有大插嘅可能。不過今期阿爺咁有誠意，冇理由跖陪佢玩番轉。

維京人星期二入咗市星期四沽咗，係近期超級失敗之作。不過做人嘅嘢唔可以因為自己衰咗就自暴自棄唔睇個市做鴕鳥，又或者安慰自己話睇定先㗎嘛，話晒個市唔會等人。今期好明顯係星期三大陰燭星期四嚟個蜻蜓十字星星期五一碌大陽燭，形態上明顯地係 morning star 又或者係底部棄嬰，就算預期後市點差都好，形態上屬利好，要追。所以小弟於星期五下午三點多左右，見個市升得有支持，亦入咗貨，買咗 A50 (#02823) 嘅 call 輪　＃13894　＠　＄0.101，收市已經即市賺約 10%。

睇嚟內地股民嘅亢奮應該唔會一日就玩完，唔係嘅話就真係對唔住阿爺誠意獻上嘅禮物囉！

祝大家周末愉快！

大震倉：重演大奇跡日

今日港股繼２００７年8月17日呢個大奇跡日後又再嚟一嘢大奇跡日。

恆指今日一開市先跌約600點，然後暴瀉最多成1300點，大家見貨就掟洗太平地，最低見16，283點，市場人心虚怯近乎絕望。

食完午飯過後，受到金管局向市場注資超過15億元所影響，以及歐洲嗰面開市後收到風歐美央行注資增加流動性，恆指竟然好神奇地倒升番上嚟，一度仲升超過200點見高位17，849點。原來股市嘅大 deep V 同著低胸衫女人嘅大 deep V 一樣咁令人注目。＃00941中移動由地獄變天堂，最低跌到＄66，最高升超過＄74，收報＄73.2。低位買上嚟都有約一成嘅升幅！＃00005匯豐最低驚見＄106.4，之後跌幅幾乎全消！恆指兩大支嘢暴跌又倒升，令人聯想起上年八月嘅大奇跡日。

資源股同大市一樣好神奇咁暴升。好似　＃02899　紫金礦業就升咗２成。內房股今日就醜女大翻身。好似＃01109　華潤置地收市升番２%。

記得上年港股自8月１7日嘅大奇跡日後，股市就開始暴升。今年又有冇呢支歌仔唱？

要記住歷史係唔會簡單地重演。如果今日個市４：00　準時收市就 perfect！好可惜港交所（＃00388）整咗個競價交易時段，臨收市１５分鐘，哎吔，最後匯豐又跌番落嚟，期指由高水又變番低水。最後恆指升勢冇支持，收報17，632。

經過今日後，我又好懷疑今期係咪熊市三期，因為正常嚟講熊市三期應該係恐慌拋售，同埋冇人想買股票嘅。但今日個勢似係恐慌性驚買唔到貨就真。

Anyway，錯就要認打就企定。今日維京人嘅恐懼蓋過晒一切，結果俾個市震咗出嚟，放晒手頭嘅 A50 (#02823) @ $8.92咁上下，真係定力唔夠。其實自禮拜二買完貨後都好後悔，因為見呢次火燒連環船好似無底深潭咁，唔知幾時先可以完。既然今日放咗貨，今期可以安心睇住美國台戲也。

請請。

不救不救還需救

尋晚聯儲局最後都冇減到息，可能令到某部份人失望。小弟則覺得合理，因為呢期美國甚至全球嘅經濟，亦唔會因為減息而有咩嘅改變。

美股尋晚終於暫時可以唔駛再跌，仲有個似樣嘅反彈㖭。一心諗住今日香港都可以跟吓大圍升番D，嘩嘩嘩！真係唔好講笑，原來今日空軍先係主角。恆指一度都升超過３00點，但人心超級虚怯，股民見低唔買見高即沽，朝早中間時段左右已經開始玩插水，最終差唔多 day low 收市，收報 17637點，跌成3.6﹪即663點，成交有成762億。

呢次美國繼次按留下落嚟嘅一連串骨牌效應，嚟到呢個禮拜真係可以話去到高潮。百年老店雷曼兄弟爆咗煲，真係可以話呢個世界乜都有可能。而且今次亦好影響維京人嘅思維：就係冇嘢係「安全」嘅。如果有日連大家都話好穩陣嘅 HSBC 都執埋笠（咁當然希望唔會啦），小弟亦覺得完全唔出奇。所以買股票真係要預期咩都可能會發生。

大家關注嘅保險巨人AIG最終都得到聯儲局注資860億,令到呢間全球最大嘅保險公司可以唔駛清盤執笠。相信全球各地無論係金融界嘅朋友定係一眾大小股民，都可以暫時鬆番口氣。美國政府好明顯都知道 AIG 如果真係清盤，對全世界嚟講都會幾轟動，所以結果都係猶如琵琶半遮面，不救不救還需救。AIG 條命真係比雷曼兄弟好！花旗政府成為持有其近8成股權嘅大股東，結果全世界最大嘅保險集團就係美國政府！

小弟都有份保險喺佢阿仔 AIA 度買，今次美國政府救咗佢阿媽，可以避免「擠提」。

睇嚟美國嗰面都係頂一頂先咁啦。今次止咗血但可能根本唔夠血小板。大家又再開始下一輪估嘢遊戲：估吓下一間又到邊間金融機構爆煲。寫呢篇 post 嘅時候美股啱啱開市，跌咗超過150點。尋晚反彈嘅升幅又一次冇晒。感覺上家下係黑暗嘅開始而唔係熊市嘅盡頭。小弟尋日心郁郁買咗嘅 A50，平均買入價＄12.5，唔排除隨時跳車走人，投降兼且拒絕再玩！

Good luck!

中秋過後火燒連環船

尋晚寫 Blog 嘅時候仲喺度諗，DOW開市後都係跌得嗰300點左右，跟住凌晨左右仲只係跌200點咁大把，好似少咗D喎。話晒今次呢個係金融海嘯嚟㗎嘛，點可以跌咁少㗎！？

結果？呵呵呵．．．真係「開心」：今朝打開電視一睇：嘩！勁呀！DOW 跌成500點咁好玩？

亞洲開市當然就繼尋日歐洲同美國個市暴跌後，中秋煲臘嘅火攪到火燒連環船咁啦。史上最強嘅破產個案，美國雷曼兄弟申請破產所引發起嘅連鎖效應，環球股市基本上七癆八傷。雖然阿爺幫忙將１年期貸款利率調低0.27個百分點，以及下調部分存款類金融機構人民幣存款準備金率1個百分點，不過，so　what？內地股市都玩埋一份，反映上海A、B股綜合走勢嘅上證指數失守２000點，收報1986點或上挫4.47﹪。

今日內地個市仲出現咗近年嚟非常罕見嘅一幕，就係有8間銀行好齊心咁一齊跌停，而且佔據咗滬深兩市跌幅前1０名中嘅8名，包括深圳發展銀行（SZ.000001)、興業銀行（SH.601166）、浦東發展銀行（SH.600000）、招商銀行（SH.600036）、交通銀行（SH.601328）、華夏銀行（SH.600015）、工商銀行（SH.601398）、建設銀行（SH.601939）。

至於港股嘛．．．香港身為全球嘅金融中心，而且又係紐倫港嘅一份子，又點會跌得少？恆指一開市就大跌超1300點，直瀉落一萬八千點嘅關口。食完　lunch　後就做好少少，埋單全日大跌1052點或5.4﹪，收市報18300點，都幾好意頭。成交今日就多番D，有成884億元。

美國國際集團（AIG） 傳清盤，尋晚美國已經跌咗成6成，寫呢篇post嘅時候歐洲時段亦跌超過1成。呢次火燒連環船真係攪到大家兵慌馬亂。大家都擔心幫襯 AIA 嘅保險可能連渣都冇。香港嘅宏利保險（00945）亦順勢插超過6﹪。兩年嚟嘅氣勢，一日冇晒！

睇嚟今次金融大風暴，wall street 開始變 fall street，而香港亦好難獨善其身也。

不過就咁呢．．．小弟今日忍唔住入咗隻 A50 (02823)，買入價亦算高，為＄10.48。收市點知已經報＄１0，即市唔見接近5﹪。收市睇番期指報低水，放工再睇番歐洲個市，一樣係跌跌跌跌，睇嚟個市應該未跌完。

家下買得股票，都唔會預咗即刻可以升番上嚟㗎喇。 A50 再跌落去到＄8左右都唔奇。

講笑咁講，小弟睇今次跌市應該好快完。點解？好簡單啫，恆指今日一日都跌成千點，家下恆指萬八點，即係話跌十八個交易日就可以跌完，都唔駛一個月！！試問跌到落零點又點駛再跌呢？睇嚟恆指見低不遠！：p

講番認真，有可能恆指會先試萬六點，個市先會穩定番少少。大家小心。

Good luck!

百年老店執笠，股市見底之兆？

上回講到，小弟喺九月二日話如果嗰晚美股可以做好，會開始考慮買貨。但點知真係開口夾著脷，於第二日朝早即係九月三日打開電視一睇，話吓！DOW 完全將前一日嘅升勢洗番晒落嚟！咁樣攪，小弟就緊係唔會買貨啦。

結果嘛．．．．．．事隔兩個禮拜咁上下啫，恆指已經由當時嘅　21,042　跌到家下嘅　19,352。跌咗超過千六點！如果有買貨就真係大鑊，呢次真係執番身彩。

不過話分兩頭，小弟推介嘅　＃00568　山東墨龍都唔係跌得好多咁啫，推介時　＄0.7，　家下　＄0.64左右。Anyway，小弟家下手持的貨都只係得番隻於　＄17.4　買番嚟嘅A50（＃02823），家下步署緊再入番多少少溝淡。

維京人認為今期係熊市二期，而相信三期好快就嚟緊。特別係今朝美國嗰便話　Barclays　唔肯收購　Lehman　Brothers　攪到呢間有　158　年歴史嘅投資銀行破產！今晚歐美股市一於唔駛俾面大插水。寫呢篇　post　嘅時候　DOW 仲跌咗成超過　300　點！睇嚟個市會繼續跌，跌到幾時就真係未知！

全世界各地嘅政府同央行為咗救熄美國金融危機呢個火頭，今晚開始出招。今日傍晚阿爺嗰便有消息，人行會於中秋過後即係聽日下調貸款基准利率同埋存款準備金率　0.275厘。而歐洲央行亦注資救市。

連雷曼兄弟都執得，會唔會係最壞的時間已經過去？仲有乜嘢壞消息可以再差D? 全球各地都開始有D救市嘅措施，呢個又會唔會係股市否極泰來之兆？話晒股市走於經濟之前嘛　．．．．．．

Good luck!

開始買貨

維京人成個八月都忙到九彩，唔好話股市，連奧運都冇乜時間睇。而八月個市又真係唔睇好過睇，港股升一日跌一日，而最後都係跌！個個都覺得個市跌到咁真係冇乜心機。

今日四叔又出嚟講嘢，話恆指目標已由年頭的三萬二變做家下的兩萬三，連佢自己都嗔話輸錢。你話喇，咁攪法，個市點會升得去邊？個個驚 D 有錢佬放貨嘛 ...... 今日港股成交仲縮到只有約唔夠五百億港元。做經紀的睇嚟有咁耐風流，今期就算唔折墮都唔會 happy 得去邊也。

不過小弟就始終相信物極必反的道理 (問題係物幾時到“極”同埋幾時“返”咁啫)。今日恆指曾插穿 20,600，收市出奇地報升收 21,042，卒之都升咗 136 點。最神奇係期指，預計大低水點知午市彈返上嚟仲大高水 120 點，睇嚟對後市有 D 啟示。

今晚美國開市，藉颱風威力大減，油價曾跌超過 $6，而道指一開市已經升超過 200 點。寫呢篇 post 的時候 DOW 升咗 191 點。如果美市能夠 keep 住個升勢，聽日港股一定會大升。如是，係趁勢買入定係藉高沽貨？呢個其實都係一個幾主觀的問題。小弟就可能會選擇買貨，反而唔吼大價股而吼 #00568 山東墨龍，博佢上星期有大成交可能有後著。

Good luck !!

開始想再買 A50

維京人呢兩個禮拜忙到傻咗，主要係公司個 Project 終於攪掂，system 可以 go live。呢外係另一方面自己又有幾個 Project 想開。再加上呢個禮拜部 iPhone short 咗，拎咗去整。攪到冇乜時間 update 呢個 blog。

上回講到，小弟覺得奧運過後個市未必會如大家想像中咁跌。結果個市於奧運開幕開始，幾乎日日都跌，真係超冇癮。小弟手持 #03898 亦於星期一放咗 (Sorry, 冇 update 到大家)，價位 $6.61，比起買入價 $7.05，大概蝕咗 6%。冇啦，近排見個市咁，都係持盈保泰好 D 。

至於長線 A50 (#02823)，呢期睇嚟都係真係要長線。隻嘢跌至近期低位，亦接近小弟所講 $12 可以再溝淡。會開始想溝淡呢隻嘢。聽日睇下點先。

Good luck!

奧運後未必咁快會跌

維京人呢個禮拜真係都幾忙，主要係跟緊的 project 就嚟可以 close，另外就係掛住玩部 iPhone！不過小弟亦有睇住個市，只係冇咁多時間寫 blog 咁啫。

睇番過去呢個禮拜，美國佬個巿真係差到冇人有。啲人仲話家下只係衰退的邊緣，實情小弟覺得已經肯定係衰退就真。相信美國政府亦睇得出呢點，所以喺非常時期要用非常措施，人為干預股票市場，限制金融類股份「無貨沽空」，咁先令到個市場定番少少咋。

如果冇記錯，有關的措施應該會去到八月中咁上下，睇北京奧運亦應該去到一半，照市場人士估計，好有機會過咗奧運個市會較為偏淡，亦唔排除會一嘢過散晒。

維京人就唔係咁睇。雖然小弟亦好唔睇好美國個市，不過相信奧運後個市唔會咁快跌住。點解？因為信阿爺囉 ...... 如果有睇呢幾日的新聞，亦留意到阿爺的取態已經改為一保一控，即係保住經濟平穩發展同埋通帳受控。睇來阿爺短期可能會有措施或者就算無措施都會出口術嗰隻，點都要奧運定住下個市先。而於個個都睇淡奧運後個市，又根據相反理論，可能未必會真係咁淡。而且呢個月好多公司會公布業績，好多中港公司其實未去到咁差。同埋小弟好相信10月先至係股災的月份，暫時仍短期看好後市走向。

小弟家下除咗長線手時 A50 (#02823) 外，仲短炒株州南車 (#03898)。佢的母公司南車正 roadshow 等上市，加下走勢唔錯，短期睇 $8。

祝各位週有個新的開始。

上車了

星期一講過話個市將會大上大落，點知話口未完，繼星期二恆指大跌 429 點後，今日港股借美股尋晚個勢，又升番 432 點，好似乜都冇事發生過咁。恆指星期三收報 22,690 點，今日好友乘乘機機趁期指結算日夾淡倉。

維京人於八月一日公司就會上新 system，呢排都比較忙，冇乜心機睇住個市。不過前兩日講過話要留意的株洲南車 (#03898)，講的時候 $6.6，今日已經去到 $7.08。小弟見今日朝早唔駛開會，忍唔住喺 $7.05 買咗貨。

如果睇三個月陰陽燭圖，似係做緊個頭肩底或圓底，家下突破咗頸線 $7，應該可以去到 $8 樓上。睇一年圖，如果突破 $8.8 就更加 perfect，肯定可以過 $10。至於短線嘛 ...... 暫定第一個目標價為 $7.4 - $7.5 左右，理由係 $7.3 左右有個下跌裂口未補好，既然近幾日的走勢都有支陽燭傍下身，走勢唔錯， $7.3 的裂口應可以補回。

咁當然，都要花旗同 A 貨生生性性先得。見步行步，暫定 $6.5 - $6.8 止蝕。近排個市睇淡者眾睇好者少，都係小心 D 好。

Good luck!!!

家下唔上唔落‧靜待大上大落

維京人都有好幾日冇寫 blog 喇。個市咁悶，不如玩吓 iPhone 同去書展行吓好過啦！天氣又熱，空氣又差，真係冇乜心機睇住呢個咁悶既市。今日恆指都曾經做高升過百零點，不過收市最後都要倒跌約 53 點，報 22687 點。成交超級萎縮至上年四月到而家的低位，只得 415 億。

港交所 (#00388) 當然係低成交首當其衝的股份啦！今日以全日最低位 $118.8 收市，跌成 1.4%。個市自從俾維京人準確預測話會升上 23,000 點後，家下好似唔上唔落咁，似係要等待來緊的大上大落。點解咁講？因為小弟其實仍然睇淡個市，只係眼見大市做緊反彈，買淡又唔係好敢。買升又唔知反彈幾時會做完。攪到自己冇晒方向。下個星期 HSBC (#00005) 就會公布業績，對大市肯定起主導作用。不過就算佢做好，美國個市氣氛又好差，而臨近期指結算同埋 8 月 8 日的奧運，睇嚟真係行 D 講句：好淡爭持，真係唔知買邊便好。再睇埋今日經濟日報阿 Sky Sir 話估計未來 3 至 4 個月內 21,700 或 24,000 點都有機會見，屬大型上落市，現在大市正正處於兩者之間。你話，今期做乜好？

維京人一向都不按牌理出牌，今日有隻異動股可能大家要開始留意。佢就係株洲南車 (#03898)。今日開市冇耐呢隻野已經俾人掃上 $6.6 樓上，古靈精怪，收市仲叛逆而馳，升咗超過 8%，或 $0.5，收報 $6.73。寫呢篇 post 的時候美股失守， DOW 大跌超過百三點，睇來聽日可以留意呢隻嘢，或者小弟會小小注買入。

香港足球誌

聽日就係書展，今期唔講股市講讀書。

請 click 一 click 以下海報。

呢本，可能係全球唯一一本講述香港球壇的「歷史書」，維京人誠意推介。

早走早著

維京人其實都好牆頭草，一時一樣玩無定向風。尋日先講完恆指有機會會去到二萬三千點，自己仲身體力行於七月頭約 $0.16 買咗牛證 #30289 (曾經跌到去差唔多 $0.11 !!) ，懶係實牙實齒咁。點知小弟今日見個市急升咁多，結果喺 $0.216 就放咗隻牛證，利潤為 35%。

放既原因好簡單，就係因為今期係熊市！喺熊市應該逢高做淡同埋買佢跌。買升有咁既利潤，都係早走早著著數。雖然小弟仍然相信恆指有機會去到二萬三千點，但值博率感覺上有限，加上熊市大起大落時時有，為免食驚風散，所以都冇乜所謂囉。

連升咗四日，今日香港個市仲嚟個大升，有貨的散戶應該都幾高興。恆指收報 22,532 點，升咗 658 點，或 3%。升得咁勁的原因為美國上星期油價跌番落去 130 美元，攪到大家心理上都好過 D。而今早外圍又做得幾好咁，台灣同埋南韓都升超過 4%，再加上下午傳出中投可能會入股 HSBC (#00005)，大笨象即刻變飛象，升咗 $4.9，超過 4%！大藍籌有咁既升幅，淡友今日冇啖好食。放工返嚟睇番新聞話 HSBC 已否認有集資需要，真係唔知呢單嘢會唔會炒一日就炒完。

內地個市亦做得好好呀。上證指數升接近 3%。主要為 "大小非" 解禁將會定期喺網站上披露。咁大家就會有個預期幾時市場會多咗咩貨。資訊清晰即不明朗因素減少，難怪股市會造好。離奧運越近，內地個市睇嚟有番 D 氣息。小弟手持既 A50 基金 (#02823) 雖然俾買入價跌咗接近 20%，但由於係長揸，所以唔會放。反而前排留意到 A50 好似比 A 股的指數走得慢咗 D，有可能會追番有關的升幅。明天會留意 #14120 等 call 輪。

呢排內地既治安俾人感覺好始麻麻地，唔知係咪臨近京奧有人想攪攪震。雲南昆明今日無啦啦發生巴士大爆炸，仲炸咗兩嘢，都幾得人驚！

另外，香港通帳繼續超勁，攪到繼維他奶後屈臣氏的員工都嚟擺工，唔知下次會唔會輪到可口 XX 或者 XX 可樂呢？至於今日亦有單新聞話油價高企，連巴士公司都話要發盈利預警報定案先。睇嚟高油會高通帳對大家的影響越嚟越明顯。

呢 D 新聞其實對市場氣氛亦有所影響。大家要留意，留意。

******

今日另外一單大新聞當然係偉仔同埋嘉玲結婚啦。小弟一向對嘉玲冇乜特別好感 (除咗佢喺大內密探入面的演技外)，只係覺得偉仔演技越嚟越精湛！不過小弟諗嚟諗去都諗唔明點解佢哋要去不丹結婚，要一大班朋友長途跋涉去到泰國又要再轉機先去到，認真奇怪。大明星的思維果然唔係我地會諗到。

股市令人抓狂‧iPhone 令人瘋狂

呢個禮拜維京人都冇乜點睇住個市，一嚟個市大起大落令人抓狂，另外就係小弟響呢個禮拜頭出咗 iPhone 3G，而 iPhone 令人瘋狂。哈哈，jealous? 成個禮拜晚晚都玩部機玩到好夜，連 blog 都冇時間寫。

雖然冇時間寫 blog，但唔代表維京人冇睇住個市。

上星期有好多財經報紙同雜誌都話個市會反彈，其實呢點小弟都認同，所以較早前亦偷步買咗牛證 #30289。本身買咗之後都升過一浸架，但過去嘅一個禮拜，市場受美國最大嘅兩間房屋信貸公司房利美同房地美爆煲所拖累，結果恒指喺星期二嘅時候大跌超過八百點，隻牛證亦曾經跌差唔多成三成！雖然維京人眼見股巿係咁跌，但都冇止到蝕。其中一個原因當然同部 iPhone 有關（心不在市），另一個理由係小弟覺得奧運前個巿唔會大插住。

咁當然，呢個都係估架啫，只係希望估中咁啦。暫時嘅目標仍然係恆指會去到 23，000 點。

今次呢個 post 都係由 iPhone 寫 出嚟架。祝各位熊巿中賺錢啦。

美國佬救市唔講市場經濟

美國兩大房貸機構房利美 (Fannie Mae) 同房地美 (Freddie Mac) 莫財，花旗政府出招打救。香港個市星期一的今朝早仲升咗陣，維京人手持的牛證 #30289 仲一度升咗接近 20%。不過恆指喺 22,200 點好有阻力，最後恆指收跌 170 點，報 22,014，易易寧一死，啋，真係大咭利事！

今晚美股都好勁架，原本！頭先晚黑 9:30 - 10:00 鐘左右，DOW 升過超過 110 點，不過眨吓眼到寫 blog 的呢一刻十一點鐘，個美市已經唔係好掂當。DOW 只係升得嗰廿零點左右，Nasdaq 仲倒跌十零點！好疲喎，個樣。

讀過吓經濟學的朋友應該都知道咩叫市場經濟。所謂市場經濟即係話市場上總會有一股需求 (Demand) 同供應 (Supply) 的角力，當供應大過需求，價錢自然會通過無形之手而下跌，反之亦然。政府喺正常的情況下，係唔應該干預的。因為呢隻無形之手會自自然然去做嘢。當你間公司唔掂，自然要自己諗辦法去解決，又或者賤價賣俾肯買的人亦得。當你價錢太高，買的人少，價錢自然會跌。

今期美國財長 Paulson 突然話要救 Fannie 同埋 Freddie，可以話係政府干預市場的一件大事！經濟學上面講過，只有當市場冇效率時，政府才需要出手。不過點為之冇效率就見人見智。維京人覺得如果花旗政府今次唔出有形之手救市，美國經濟短期肯定冇得翻身。不過小弟覺得只係拖延美國經濟死神的到來，可以話吊緊鹽水。美國政府採取短痛不如長痛的策略。只要美元唔跌，美國可以繼續印銀紙，美國佬仍然可以大魚大肉亂消費，一於當信貸爆煲冇到！

維京人暫時持有的恆指牛證 #30289，家下有 13% 進帳。小弟本身目標為恆指會彈到 23,000 咁，不過如果美股繼續差，唔排除港股會借勢大插先彈上嚟。要睇位食糊。

******

前排海洋公園死咗條國寶中華鱘，好神奇地國家見我哋死咗一條，會送番五條落嚟。令到海洋公園將會有九條中華鱘。真係因禍得福。

另外，星期三開始發售的奧運紀念紙幣，估唔到今日下午己經有人喺中銀門口排隊！今晚天文台仲掛上黃色暴雨警告，香港人真係乜都排一餐乎？

美股熊爪未扯低港股

話說星期三維京人買咗恆指牛證 #30289，博個市會有反彈。點知星期四朝早一打開個電視睇新聞，嘩吓？唔係啩？美國道指跌成超過二百幾點？咁咪好大鑊？港股會唔會大跌架？咁我隻牛證咪玩吓手渣都冇？

今日朝早忙到阿媽都唔認得，亦冇時間睇住個市。點知原來港股好似跌唔落咁，恆指一度跌超過三百點到中午前竟然倒升約百零點，臨收市受內地股市氣氛及伊朗再試射導彈影響，但都可以穩守。最後恆指收報 21,821 點，升 15 點。

維京人呢次真係執番身彩！

美股呢個禮拜冇乜數據，焦點反而係上市公司開始公布業績。總括嚟講，業績唔算差，只係個市氣氛唔好。另外，受 Fannie 同埋 Freddie (即係美國兩大半官方房貸機構房利美 Fannie Mae 同埋房地美 Freddie Mac) 呢兩位美國的朋友越跌越沉所影響，到而家仲未捨得翻身。而且美股又已確定踏入熊市，除咗美股外，近排維京人亦發覺歐洲股市跌咗好幾日，而且仲係跌得幾甘嗰隻！好似德國 DAX 指數咁。我仲記得佢記幾個月定係半年前仲係去到八千點左右，家下已經去到六千五百點有找。我覺得美國次按風暴吹到歐洲的情況亦該越嚟越明朗化。

照咁睇，若歐洲亦失陷，如無意外下一站應為亞洲。但亞洲有阿爺主持吓大局，可能香港股市亦會避過一刧？

精神分裂

星期二晚美股出奇咁做好，DOW 收市升咗百零點。攪到星期三港股亦受到刺激，升咗差唔多六百點。恆生指數今日收報 21,805 點，升 585 點。成交多番少少，有七百幾億。

寫呢篇 post 的時候係星期三晚，啱啱美國鋁業 (#AA) 公布咗業績，比預期好，令美股一度做好。不過受伊朗試導彈影響，油價略為回升，影響升勢。呢一刻美股倒跌 60 點。

上個星期維京人曾估計今個星期中開始會有反彈，仲諗住星期二入市做好友。不過尋日個市實在跌得咁勁，俾佢嚇親，小弟仲預期港交所 (#00388) 同埋中移動 (#00941) 有機會見雙位數！一時睇好一時又睇淡，維京人今期其實都有少少精神分裂！其實都好難怪的，睇番呢幾日恆指的走勢：

- 上星期五恆指升咗差唔多二百點
- 今個星期一又升多五百點
- 尋日星期二跌咗接近七百點將前兩日的升幅抵消晒
- 今日又升番接近六百點！

個市一日升一日跌，真係左一巴右一巴！所以又好難怪今期維京人做咗雙面人！

維京人為咗表示自己的臘腸 ...... 呀，唔係，係立場先啱！為咗表示自己的立場，即係審慎看好後市有反彈，今日已經買咗恆指牛證 #30289 作短炒，買入價為 $0.16，即係今日收市價。如果尋日唔係俾個市嚇親而入咗市，今日已經執咗超過 30% !! 激死 !!

美股正式步入熊市

啱啱話口未完話星期一的升市可能係要嚟引好友落搭買貨，等個市有人可以接貨。結果今次又開口中，而且今日即刻應驗！恆指今日一開市已經跌 281 點，跟住沽盤基本上未停過，淡友係咁沽係咁沽，最多曾跌多過 800 點，21,100 點亦曾經失手。最後恆指收市報 21,220 點，全日跌咗 692 點。

尋晚寫 blog 的時候諗住美股做得咁好，今朝可能會有個反彈咁啦！吖！點知今朝一起身睇新聞，話香港時間星期二零晨兩點幾，美國兩大半官方房貸機構房利美 (Fannie Mae) 同埋房地美 (Freddie Mac) 無啦啦公布發售 20 億美元 3 個月票據，消息令美股即劇急插！DOW 仲一度挫 140 點！就算油價曾跌超過 $5，對大市都幫助唔大，今朝美股收市報 11,231 點，跌 56 點。

喺7月2日，道指其實已由07年10月高位14198点回落至當晚收市的11215点，跌幅高達 21%。技術上，一般會認為美股由高位跌超過 20% 為之熊市。眼見7月3日嗰半日市美股做番好少少，尋晚又以為美股開市報升可以喺熊仔邊緣撈番上嚟，結果都係俾熊爪抓住走唔甩。

維京人原本尋晚 plan 好今日買 call 輪或者牛證博反彈既，但係晨早流流見美股個勢咁弱，唉，咪喇，都係少做少錯，唔做唔錯，自行將所有買貨意欲打消得一乾二淨！

不過內心深處都係心思思想博反彈，覺得呢個禮拜中後期或下個禮拜個市會企穏少少甚至會彈番上少少。睇嚟，「摸著石頭過河」呢招又可以大派用場！

至於睇淡股份，小弟喺六月已講過，港交所 (#00388) 會跌到百零蚊，同埋講過中移動 (#00941) 好有可能見到雙位數！哈哈，睇嚟呢兩隻股仔的股價短期好有可能會同時由三位數變成雙位數！各位買咗呢對孖寶的朋友都係要有心理準備好！

小心！小心！

唔夾淡倉，好友點會落搭

啱啱過咗的週末，維京人先話短期可以看好後市，仲話呢次反彈恆指可以彈返千零點。點知話口未完，今日恆指已經接近完成小弟心中一半的反彈。今日恆指收報 21,913 點，升咗 489 點。成交好番少少少少，都係咁上下啦，有成 598 億元。七月期指收報 21,888 點，意頭好好但就低水。

阿爺嗰便今日大升。上證指數升咗超過 100 點，收報 2,792 點，實升 122 點，或 4.59%。較有代表性的滬深 300 指數今日收報 2,882 點 (又係幾好意頭？)，升咗 140 點，或 5.14%。日股嗰便亦終於打破連跌十二日的彊局，可以抖下氣。

啱啱開市的美股則做得唔錯。寫呢篇 post 花旗市開咗個零鐘左右，DOW 升 90 點咁上下。美股做好原因係油魔退守返番去大約 $140 咁上下，油價跌咗超過 $5，或超過 3.5%。油價跌令美股暫時由熊市邊緣爬番上來。係咪真係短期成功走出熊掌要睇埋今晚收市先至知。

今日港股個市咁好，係因為有幾單好消息出嚟：上星期內地銀行股發「盈喜」不在話下；內地亦因為金融股有好消息而 A 貨大升；習副主席訪港，暗示或公眾自我傳釋為阿爺可能有新政策益港等等。其實對小弟嚟講，恆指由五月頭跌落嚟差唔多有成五千點，點樣都要借 D 咦反彈的。不然個市日日跌，想買貨的都會好冇癮啦！冇人買貨，淡友又如何可以沽貨？所以要先引蛇出洞，等大家憧憬一下奧運前會有一片歌舞昇平的景象。

今次反彈唔知維唔維持到多一陣。如果睇恆指三個月的走勢圖，短期可能會挑戰 23,000 呢個重要阻力。如果睇番長少少，我哋試下由上年十一月浪頂與五月頭高位呢兩點畫條線，中期下降軌阻力會喺 25,000 點左右。小弟上星期放咗港交所 (#00388) 的 put 輪，暫時仍長線持有 A50 基金 (#02823)。想聽日買恆指 call，不過又怕會冇力上。

ummm ...... 估計油價升咗一輪會有少少回吐， DOW 可能會藉此徘徊於 11,000 點 - 13,000 點。尤其係美國好多公司會喺呢個禮拜公佈業績，美元上半年跌得咁勁而喺美國上市的公司好多都係環球企業賺外滙，可能業績都未必係咁差。唔通道指可能真係會暫別熊仔？如果係，咁會帶動環球股市氣氛做好。港股亦應該會唔錯。OK, 諗完一輪，聽日都係買恆指 call。個個都睇恆指過唔到 23,000，但照路睇，應該點都會升番穿啩？

又睇下點？ Good luck !!

屏息以待月內反彈

尋日7月4日，是為美國獨立日。昨晚美股休市。

星期四美股半日市， DOW 收市升咗 73點，收報 11,288點。11,288，一一易發發，好似幾好意頭咁。星期五亞洲區股市就仲係未企得好穩：日本微跌，係 55 年嚟首次連跌 12 日；南韓就仲要插多 2%，人參仲未發揮功效；兩岸今日就開始咗直航，不過對台灣個市冇乜幫助，亦跌超過 2%；阿爺嗰便睇指數就微跌，上證指數收報 2,669點，跌 33 點，或 1.24%。

如果睇個周線圖，上證指數一連七支陰燭。週五煤炭股狂瀉，理由係受資源稅調整傳聞影響。據聞新方案核心內容包括徵收方式由從量徵收改為從價徵收以及徵收的標準會適當提高。咁樣攪會增加煤商的經營成本。A 貨市場嗰便，中煤能源 (#601898) 跌 7.8%、中國神華 (#601088) 跌 8.13%，兗州煤業 (#600188) 跌 6.72%。至於香港的煤炭國貨，則跌得冇咁勁，普遍約跌唔夠 5%。

昨日港股嘛 ...... 算係亞洲區唔錯架喇。星期五恆指曾經升咗差唔多 300 點，不過高位承接力弱，最後收市收報 21,423點，升 181 點。升市成交卻少，只有 501 億。七月期指卻出奇地高水 102 點，收 21,525 點。

繼工商銀行 (#01398) 發盈喜後，招商銀行 (#03968) 同埋中信銀行 (#00998) 昨日收市後，亦分別披露上半年淨利潤按年大增 100% 以上，以及 150% 以上，雙雙報喜。息差擴大，盈利有增長。估計星期一開市，內銀股應會有所反彈，如無意外亦會帶動其他中資金融股如保險股等上升。

維京人原本手持的港交所 (#00388) 認沽窩輪 (#07179) 昨日亦平倉。六月中買入價為 $0.144，昨日沽出會為 $0.24，賺 66%。今次策略又一次成功！其實小弟仲係好睇淡個後市，只係覺得恆指由五月頭跌落嚟，亦差唔多有成 5,000 點，屬於大超賣。雖然多咗人話睇淡個市話會去到 20,000 樓下，但如果多咗人睇淡，小弟憑傳統智慧加相反理論，呢個可能反而係短期見底之兆。加上港交所去到 $100，好多人會覺得好抵而且會好有支持咁，沽落去短期值博率未算高，所以根據「有食唔食，罪大惡極」的原則，平咗倉賺咗先算。

家下呢期睇淡的因素，除咗美國次按爆煲後的一連串惡果外，其中一個係油魔攪攪震所做成。油價超過 $140 後，好似仲未有捨得食飽要飲杯茶抖抖，反而好勇猛咁想向 $150 埋手。不過小弟覺得油價去到 $150 前，應該唔會再大幅上升。理由係推升歐元的加息因素，隨住前晚歐洲央行行長 Jean Claude Trichet 棄用對通脹「高度警愓」字眼，以及對經濟有顯著下跌的風險而告終。歐元向下，相對美元會強番少少，而美元強對油價會造成阻力。雖然阻力未必大，但都好過冇。

道指其實已跌破複式 head and shoulders top，量度跌幅可以去到約 10,600 點左右，距離現水位仲有約 700 點水位可以跌。不過呢個頭肩頂亦用咗約四個月時間形成，中間有所反彈或唔郁亦好正常。加上如果油價升唔穿 $150，而前排美國政府發咗退稅支票刺激消費，可能嚟緊的經濟數據未必會預期中咁差。咁樣對美股可能有少少心理幫助。

維京人估計七月應有個約千點的反彈，下星期可能買入恆指牛證或 call 輪。不過就算係亦唔會揸得長，因為小弟中長期都係睇淡。尤其係美國，樓市爆破起碼要衰三五七年，大家睇下 97 年香港樓市跌到 03 年沙士時期就知！就算美國爛船都有三斤釘，相信都要 09 年打後先會復原。

估計下週中後期或到七月中嗰個禮拜，反彈就嚟。就等下個星期初 D 剩餘沽盤出埋嚟先啦！

Good luck!

好友望反彈，淡友唔就範

代表港股的恆指今朝一開市已經跌 315 點，中午曾經都好巴之閉咁攪到恆指升番約 38 點。不過淡友喺下午回來後又再手起刀落下三成，最後恆指收市報 21,242 點，跌 461 點，或 2.13%；國企指數收報 11,139 點，跌 469 點，跌幅 4.04%。恆指由五月頭跌到落嚟都有成 4,000 點波幅。淡友今期飲飽食醉，但似仲未有捨得收手的跡象。

究竟個市幾時先反彈？維京人預測，個市其實好接近反彈的邊緣，但問題係個市亦好大機會會繼續尋底。噢！太廢話喇！咁即係點呀？

咁即係話個市仲可能會跌，不過離反彈亦不遠咁解。

Anyway, 其實喺熊市博反彈係一個極度極度危險的行為，所以如果可以的話，大家都係賭性唔好咁強唔好成日入市。成日想入市炒炒賣賣喺呢期好可能會大大鑊。

維京人估計個市會繼續跌，大概去七月中左右可能會因為奧運概念而有少少轉機會反彈。所謂奧運概念，就係個市唔會大跌已經算還得神落嗰隻。然後奧運完咗，個市會大插，熊市三期更加冇得走雞。

家下離奧運仲有三十幾日，咁快講八月後升定跌其實都係言之過早。相信睇番七月個市會點走會比較實際同埋容易。

歐洲央行今晚打老虎。議息後一如預期決定加息 25 點子以對抗通漲呢隻超級猛虎。呢次加息係超過一年以嚟的第一次，不過喺央行新聞發佈會上，央行行長 Jean Claude Trichet 話穩定物價措施仍是央行主要目標，而且今次亦冇「高度警愓」的字眼，令人覺得下次歐洲央行可能未必會加息。歐元因為咁樣一度跌到近 1.5683。睇嚟歐元區利率已見頂？

日本連跌十一日，據聞呢個紀錄仲係五十幾年嚟首次。人心虛怯，亦係熊市的正常現像。

今晚美股曾升接近一百點，最後半日市寫呢篇 post 的時候 DOW 亦升近 73 點。由於聽晚美國係國慶假期，美股將會休市。港股後向如何？睇嚟都係下個禮拜先有個較為明確方向。

Good luck!

再跌一會

今日七月二日，放晴，不過淨係指天氣唔係指股市。尋日美股簡直似坐過山車，DOW 跌咗百零點後收市竟然升番 30 零點。今日仲諗住恆指喺 22,000 點會有少少支持咁啦，點知支持又變成阻力。响呢個難捱的 2008年下半年的第一個交易日，恆指收報 21,704 點，跌咗 397 點或 1.80%；國企指數仲慘烈，收報 11,608 點，跌 300 點，或 2.53%。

股市跌成咁，如果你話呢期唔係熊市都冇人信。尤其係內地 A 貨股民，呢個 moment 簡直已經去到死心的階段。

內地 A 貨玩家其實仲未係好成熟，even 係 D 所謂股評人仲以為阿爺會救市！唔好玩啦，如果阿爺要救，就晨早救咗啦！自上次阿爺出咗幾招後，家吓都好似冇乜新板斧出手救市咁，認真濕滯。今日大家以為新華社突然發表文章，話會維持股票市場隱定咁，升咗浸，但好快好快好鬼快，A 貨又調番轉頭，成日都好似冇乜點升過咁。上證指數收報 2,651 點，升唔夠 1 點。

至於維京人手頭的貨：

# 02823 A50 基金 - 暫蝕 22%
# 07179 港交所 put 輪 - 暫賺 46%

港交所 (#00388) 跌到呢個價位，老實講，我仲係覺得貴。不過我亦知道好多人會認為 $100 係個好撐得住的支持位，身邊亦有同事開始心思思想入市買呢隻股。睇嚟 $100 會係一個幾唔錯的支持。不過小弟都係唔會咁快放咗隻 put 輪，諗住個市會跌多少少先會反彈。希望個市能再跌一會，但願能再跌一會嗰隻。暫且睇埋聽日先算！

******

歐洲國家盃後，呢排維京人又開始忙番工作上的嘢。希望可以儘可能每個交易日 update 吓呢個 blog 啦！

請請！