美股尋晚企番穩少少，但一 D 都對港股毫無幫助。小弟喺月頭已經喺度講話端午節過後要小心，仲話會跌到你唔信，結果又中！
美股上星期五暴跌接近 400 點，而內地個市受加存款準備金率 1 個百分點所影響，今日滬指狂瀉 7.7%！港股受美中兩面夾擊，完全冇啖好食，跌個一塌糊塗。恆指今日收市報 23,375 點，跌 1,026 點。國企指數收市報 12,789 點，跌 723 點！恆指創三個月嚟最大單日跌幅，成交又好配合咁有成八百幾億。今日有成 36隻恆指牛證被收回，破咗自從香港有牛熊證後的新紀錄。家下期指仲低水百幾點，你都咪話唔恐怖！
恆指只要跌多三十零點，就會補番 4月 2日彈上嚟的上升裂口。
維京人好肯定今期跌勢未完，話明六月飛霜，起碼跌埋下個禮拜！而且又係嗰句，會跌到你唔信！睇圖表，恆指日線圖已經成功出現頭肩頂，個頭喺二萬六，條頸線喺二萬四，如無意外量度跌幅應可以去到 22,000。仲有起碼千幾點要跌！
個人覺得今次就算跌破兩萬點都唔出奇。
小弟覺得中移動 (#00941) 有機會見雙位數，港交所 (#00388) 可能得番百零蚊，匯控 (#00005) 返 $120，中國人壽 (#02628) 跌低過 $25！係咪跨張咗 D ? 係呀！Hey, 不過做人最緊要有想像力！
咁係咪即係個市會反彈無力呢？咁又未必。小弟估跌埋下個禮拜後，奧運前可能會升番浸，奧運過後又跌過，正式步入熊市三期。不過咁快估奧運後的事都係言之過早，都係睇埋下個禮拜先算！
個市要升，油價要先回落。油價幾時會回落都幾難估。
其實今期都幾大鑊，無啦啦爆咗個亞洲小金融風暴。越南上年俾人捧到上天，今日俾人打番落地獄。股市由上年高位千一點跌到家下得番三百零點，比高位跌咗差唔多六成，認真不知所謂。仲不知所謂既係越南政府為咗減少游資同埋控制通脹，大幅一口氣加息超過百分之三，認真強勢政府。越南仲自行將其貨幣貶值 2%，攪到今日泰國等亞洲國家匯率大跌，要各國央行出手托匯！
小弟的貨：
# 02823 A50 基金 - 暫蝕 9%
# 30007 恆指熊證 - 暫賺 17%
內地個市咁差，理論上 A50 基金應該喺上指跌破三千點後沽出 (而家仲未到)。不過一嚟長遠睇好中國，二嚟怕阿爺出手打救，決定長線持有。若跌到 $12 左右會加碼。
******
今日咁多壞消息，不如講番單好消息啦。下個月 11 號香港就有 3G 行貨 iPhone 賣喇！Yeah! 不過好遺憾，淨係得數字台有得賣，即係話又要幫襯李生喇。和記電訊 (#02332) 今日逆市升 1.28%。
睇番個 specification，好多功能好似好正咁，而且價錢比非 3G 版本平成一半咁濟 ... ummm ...... 真係好吸引喎 ....
******
尋日歐洲國家盃，結果法國果然贏唔到羅馬尼亞，又估中咗！但我就衰咗喺意大利度，俾荷蘭贏咁多。激死！連贏五場竟然輸喺班意大利佬度。今晚雖然西班牙贏面好大，不過我好鐘意俄羅斯神奇教練希汀克，今日一於繼續博冷，買 Russia 去也。
Good luck !
沒有留言:
發佈留言