上回講到，小弟喺九月二日話如果嗰晚美股可以做好，會開始考慮買貨。但點知真係開口夾著脷，於第二日朝早即係九月三日打開電視一睇，話吓！DOW 完全將前一日嘅升勢洗番晒落嚟！咁樣攪，小弟就緊係唔會買貨啦。
結果嘛．．．．．．事隔兩個禮拜咁上下啫，恆指已經由當時嘅 21,042 跌到家下嘅 19,352。跌咗超過千六點！如果有買貨就真係大鑊，呢次真係執番身彩。
不過話分兩頭，小弟推介嘅 ＃00568 山東墨龍都唔係跌得好多咁啫，推介時 ＄0.7， 家下 ＄0.64左右。Anyway，小弟家下手持的貨都只係得番隻於 ＄17.4 買番嚟嘅A50（＃02823），家下步署緊再入番多少少溝淡。
維京人認為今期係熊市二期，而相信三期好快就嚟緊。特別係今朝美國嗰便話 Barclays 唔肯收購 Lehman Brothers 攪到呢間有 158 年歴史嘅投資銀行破產！今晚歐美股市一於唔駛俾面大插水。寫呢篇 post 嘅時候 DOW 仲跌咗成超過 300 點！睇嚟個市會繼續跌，跌到幾時就真係未知！
全世界各地嘅政府同央行為咗救熄美國金融危機呢個火頭，今晚開始出招。今日傍晚阿爺嗰便有消息，人行會於中秋過後即係聽日下調貸款基准利率同埋存款準備金率 0.275厘。而歐洲央行亦注資救市。
連雷曼兄弟都執得，會唔會係最壞的時間已經過去？仲有乜嘢壞消息可以再差D? 全球各地都開始有D救市嘅措施，呢個又會唔會係股市否極泰來之兆？話晒股市走於經濟之前嘛 ．．．．．．
Good luck!
沒有留言:
發佈留言