不救不救還需救

尋晚聯儲局最後都冇減到息，可能令到某部份人失望。小弟則覺得合理，因為呢期美國甚至全球嘅經濟，亦唔會因為減息而有咩嘅改變。

美股尋晚終於暫時可以唔駛再跌，仲有個似樣嘅反彈㖭。一心諗住今日香港都可以跟吓大圍升番D，嘩嘩嘩！真係唔好講笑，原來今日空軍先係主角。恆指一度都升超過３00點，但人心超級虚怯，股民見低唔買見高即沽，朝早中間時段左右已經開始玩插水，最終差唔多 day low 收市，收報 17637點，跌成3.6﹪即663點，成交有成762億。

呢次美國繼次按留下落嚟嘅一連串骨牌效應，嚟到呢個禮拜真係可以話去到高潮。百年老店雷曼兄弟爆咗煲，真係可以話呢個世界乜都有可能。而且今次亦好影響維京人嘅思維：就係冇嘢係「安全」嘅。如果有日連大家都話好穩陣嘅 HSBC 都執埋笠（咁當然希望唔會啦），小弟亦覺得完全唔出奇。所以買股票真係要預期咩都可能會發生。

大家關注嘅保險巨人AIG最終都得到聯儲局注資860億,令到呢間全球最大嘅保險公司可以唔駛清盤執笠。相信全球各地無論係金融界嘅朋友定係一眾大小股民，都可以暫時鬆番口氣。美國政府好明顯都知道 AIG 如果真係清盤，對全世界嚟講都會幾轟動，所以結果都係猶如琵琶半遮面，不救不救還需救。AIG 條命真係比雷曼兄弟好！花旗政府成為持有其近8成股權嘅大股東，結果全世界最大嘅保險集團就係美國政府！

小弟都有份保險喺佢阿仔 AIA 度買，今次美國政府救咗佢阿媽，可以避免「擠提」。

睇嚟美國嗰面都係頂一頂先咁啦。今次止咗血但可能根本唔夠血小板。大家又再開始下一輪估嘢遊戲：估吓下一間又到邊間金融機構爆煲。寫呢篇 post 嘅時候美股啱啱開市，跌咗超過150點。尋晚反彈嘅升幅又一次冇晒。感覺上家下係黑暗嘅開始而唔係熊市嘅盡頭。小弟尋日心郁郁買咗嘅 A50，平均買入價＄12.5，唔排除隨時跳車走人，投降兼且拒絕再玩！

Good luck!