尋日恆指難得近期嘅大升，原來係個陷阱，今日就即刻又急跌俾你睇。
家下個市，風頭火勢，唔明點解仲會有人肯入貨。唔通個個以為自己係巴菲特，又以為跌得多去買貨就叫做價值投資？
維京人曾於 $300 時諗過買渣打 (#2888)，當其時雖然略貴，但報紙雜誌一眾財經分析員都話佢係好嘢嚟嘅。結果喺二百蚊懶勁咁覺得佢有「價值」而買咗，亦喺二百零蚊覺得個市唔對路放咗。家下 $75。
亦曾經睇好宏利 (#945)，曾於二百零蚊亦想買，因為覺得佢有「價值」，但最後都係冇買到。家下 $92.7。
自從雷曼爆煲後，維京人己經覺得呢個世界冇咩嘢冇話冇可能。你話 HSBC 穩陣咩？咪創個十年新低俾你睇下囉。
所以，投資投機同賭博，其實都要嚴守紀律。仲要識看風駛帆。就好似維京人上星期五一樣，明明睇淡歐羅，但佢反彈太勁，唯有跟住打反手買返上去，就咁先唔駛蝕錢，仲有餐茶可以執下。
呢排掛住睇外匯，都冇乜心機睇住個股市。上個禮拜五歐羅急升，維京人博佢星期一會回吐，沽咗歐羅兌美元 @ 1.28095，星期一朝早起身，都唔係點郁，喺 1.2808 平咗倉先。
今日就係咁買上買落，亦係先蝕後賺。其實投機蝕錢好正常，只要做好止蝕調整好心態，賺番錢嘅機會多的是。
今日睇信報，先至知道自己曾幫襯開嘅外匯公司決定唔再喺香港做推廣。呢間嘢可以話做 forex 嘅 education 做得好好，成日又有免費講座。可能眼見香港個 market 冇得做啩，早 D 徹退亦無可厚非。不過香港嘅失業率相信又會多幾名做外匯分析嘅金融從業員咯。
聽日財爺預算案，適逢臨近期指結算，各位小心。
******
荷比盧+巴黎遊
0: 初一開始遇厄運
1: 阿姆斯特丹感覺: 運河、單車、大麻、紅燈區、仲有花。
2: 好荷蘭感覺但有點造作的 Zaanse Schans
3: 不一樣的運河城市 - Utrecht
******
維京人近期愛上跑步，有空請幫幫忙為小弟打氣啦！
http://runningviking.blogspot.com
******
5 則留言:
哎, 资产又蒸发!!!
>>>家下個市，風頭火勢，唔明點解仲會有人肯入貨。唔通個個以為自己係巴菲特，又以為跌得多去買貨就叫做價值投資？
以超散既身份答你既問題...我不可以稱得上價值投資者, 只可稱為趁低吸納者. 當然技術高低在於stock picking 及你所講既嚴守紀律. 正如你講, "自從雷曼爆煲後，己經覺得呢個世界冇咩嘢冇話冇可能", 我同意! 佢盤數幾靚都好, 都有可能買i-kill-u-later 領野, 所以投資都involve 賭博成份!
小瓶子，
個人覺得股票唔一定要長揸。但無論揸唔揸，都要 keep 住對市場嘅警覺性 ......
唉，不過知易行難。
imak,
越嚟越覺得投資 involve gambling 嘅成份越嚟越重，橫掂都係，不如投機好過!
明你嘅趁低吸納嘅，不過如果注碼唔多，心心急急都可能去咗炒 instead of invest 咯。
Cheers!
viking... 我無你咁叻睇市嘛! plus 師傅話我無橫財命, 20蚊六合彩都可以慳番! 再講, 我都唔係無試過短炒, 真係舖舖損手 (真係唔到你唔信架)!!
投資 involve gambling 成份相比起投機少, 再加埋時間 + 紀律的factor, 希望ok 啦!
imak,
小弟睇市又唔係話好叻，只係交咗唔少學費 (即係輸錢!)，成日對個市嘅方向都好似聞到味咁囉。如果睇錯，咪即刻止蝕或打反手轉呔。
投資除咗眼光要好、紀律要嚴之外，其實俾投機仲要考驗多一樣嘢，就係耐性。所以唔同人亦會有自己嘅賺錢 style。祝你無論投資又好，投機又好，都可以成日賺大錢！而且仲會買多幾部相機俾你老公玩！
Cheers!
發佈留言