初一開始遇厄運

倫敦上空



******

轉機去 Amsterdam



******

農暦新年期間，維京人走咗去歐洲玩咗兩個禮拜。路線主要係荷比盧（荷蘭、比利時、盧森堡） + 巴黎（法國）。幾經波折下終於喺尋日返番香港，攰到爆。

一早講過話今年流年對維京人不利。本身都唔係咁信，但又真係唔到你唔信。

年初一零晨由香港出發，坐 BA (British Airways) 先到英國 London Heathrow 轉機。話晒成十幾個鐘頭機，最好嘅娛樂就係睇戲。點知成架機都冇事，偏偏自己坐個位部電視就係壞嘅，激死！唯有喺個又迫又窄嘅位度瞓覺，但恰吓恰吓都唔覺得自己有瞓過。

睇唔到戲都係小事。最慘係初一中午左右（當地時間）到達荷蘭 Amsterdam 機場，出咗海關喺攞 luggage 個位等呀等呀，竟然等唔到自己件行李！？

幾經查問後，shit！BA 話小弟件行李留咗喺 London！要再等下班機轉過嚟 Amsterdam 先得。

結果件行李喺初二下午由 BA 搵人送去自己住嗰間酒店，即係話件行李唔喺手差唔多成廿四小時。

最慘嘅係當其時 Amsterdam 嘅氣溫得嗰兩三度，而自己嘅厚衫全部都喺個行李度。本來想買件外衣，但又唔想晒錢同埋驚回程時太多嘢拎，所以唯有忍凍喺 Amsterdam 度行街。

尤幸旅程期間亦冇咩大阻滯，最後一站係巴黎。

終於玩到最後一日（2月7日下午），喺 Paris 準備坐飛機去 London Heathrow 轉機返香港。點知 ...... 做埋 security check 後步入登記閳口，差唔多臨上機最後一分鐘 BA 先至話班機取消。結果 ...... bull shit！英航嘅工作人員話要我哋自行攞番 check-in 咗嘅行李，經過 immigration 出番去 ticket counter，再由英航嘅職員重新幫我哋搵下有冇機返香港。

但英航嘅工作人員效率真係冇得頂（即係太難頂）！冇解釋原因之餘，仲要攪到要排成兩個鐘頭隊做登記。叫佢開多個 counter，個法國佬認真臭吋，話 "We've just got these computers and we need time to proceed！No way！"。

好彩攪咗一輪終於安排咗 Air France 俾我哋坐，可以直接返香港。但都要由頭 check in，由頭做過嗰 D 煩死人嘅 security check。而最後比原定抵港時間遲咗成四個鐘。問番保險經紀，話份旅遊保險如果超過 5 個鐘先有得 claim。激死！

所以呢期對 British Airways 英國航空嘅感覺麻麻地。下次情願俾貴 D 搭直航好過。

Anyway，由於維京人未到過荷比盧，所以 so far 呢個 trip 都幾好玩。稍後會同大家分享下沿途所見所聞，尤其係歐洲人嘅慢條斯理，同埋報告俾大家知歐洲嘅零售市況如何。（話明市場維京人，緊係留意住個市啦）

******

睇番個大市，呢期好彩冇倉喺手。因為小弟係睇淡嘅，仲估過年後有機會開跌。結果呢，咪個市升到吧吧聲咁囉。

都話流年不利啦。除非有強烈嘅心水啦，睇嚟維京人呢輪都係少講股票為妙，費事做咗明燈。哈哈！

******

祝各位新一年行運一條龍。希望香港經濟最快可以彈起！

Cheers！

******