淡友倉位未夠，再升一會後謀反撲

美股尋日連續第二日大跌，DOW 美國時間星期四收報 8695，跌 443點或 4.85%。當一眾淡友以為恆指會跌千點起碼，指收卻反方向颷升。開市時恆指低開 517點後回升，最後恆指收報14243點，漲453點或3.29﹪，成交額卻繼續縮，只有488億元。

港股可以做得咁好，其中一個功臣可能就係 HSBC (#00005)，因為喺臨近中午收市前突然宣布減息25點子；加上 A　貨又做好；而且尋晚英國出乎意料大大大力減息厘半，歐洲亦減半厘，預期歐洲開市亦會暫時喘息初定，淡友中伏。

壞消息繼續出籠，DBS 宣布新加坡同埋香港一共裁員900人。「生意淡薄，不如賭博」，家下連博彩公司金沙都出現財困，個市唔係淡到咁下話？另外聯想公布第二季業績，出人意料之外大跌近八成。相信大部份上市公司 Q3 同未來 Q4 嘅業績，唔死都會一身潺。

維京人手持恆指 put 輪 #15500，雖然係淡友，但都不得不承認睇形勢短期仍會看好。似乎大戶仲未引誘夠散戶買貨。較早前恆指跌到萬一點時，已有隨口噏當秘笈嘅朋友話睇八千，而且連某些股評人同報紙佬都係咁講。當大眾有個預期時，市場一般都要玩吓呢班友仔。淡友嘛，要先儲夠倉位後再將好友殺個措手不及。

暫時睇，如果壞消息繼續水銀瀉地咁出嚟，又或者日㘣抽番上高位，恆指可以快少少向低位挑戰。否則，有機會升上萬六先跌落嚟。如果基金佬為咗做好盤數，升浪可至12月，踏入2009年又會跌過落去。是龍是蛇，大家睇落去便知。

六合彩嚟緊嘅星期日又有二千幾萬，喺而家咁嘅市況，買賣股票都好難搵到食，不如買番注博下好過！

祝各位有個愉快嘅周末。