美股尋晚大升差唔多二百點，今日港股亦借勢裂口高開。不過高位實在沽壓重重，中午返來恆指仲只係升得番三百零點，最後恆指收報 26241，升 485點。國企指數表現就比恆指好，升 400點，收報 14631。今日港股成交都仲係未夠多，得嗰 89億。內地 A 股因五一勞動節假期仲未放完，繼續休市。
小弟晨早話博大霧估恆指因為聖火到，今日一定會升。結果都幾腐碌咁因為美股昨晚大升又撞中咗。不過小弟星期二心急買咗的中移動 call 輪就仲未翻得身，今日要玩大懺悔。
先睇下手頭的貨：
# 02823 A50 基金 - 暫賺 11%
# 13073 A50 基金 call 輪 - 暫賺 2%
# 13245 中移動 call 輪 - 暫蝕 9%
今次買中移動 call 輪有幾個 factors 漏咗考慮：
1) 中移動 (00941) 由 3月 18日低位 99 個幾升到上來差唔多 140 蚊，升咗差唔多四成，己經跑羸恆指同大部份的股票。升咗咁耐，好似上升動力唔係好夠；要抖抖。
2) 星期二中午高盛調低中移動評級，由「買入」降至「中性」；(雖然我成日都覺得大行的數據唔準)
3) 中移動 APRU 今年下跌，亦預期來緊會進一步下跌；
4) 今日中移動除淨；
5) 就算預期恆指今日會升，都唔一定要買中移動。
既然做錯，唯有放貨。不過今日我都冇放到！
其實今日大概下午 3:00 左右真係有諗住放架，不過徧徧呢個 moment 恆指又好似有 D 力買番上去。而我呢隻輪行駛價 136.8, 家下中移動報 136.1，暫時係算貼價。如果星期一開升，好有機會可以返去我的買入價。
咁當然啦，若星期一跌就繼續蝕錢啦。不過我估下星期都可能會徧好，尤其係見到今日期指由開市到大約下午 4:00 都係低水成百零二百點，但尾市 15 分鐘到收市開始升番上來，最後由低水變高水 9點；而且今日恆指沽輪成交徧高，似係散戶都比較睇淡。今日財經台仲有 D 專家叫人考慮做淡倉買熊證，哈哈，如果大家都睇咁淡，唔排除恆指砌上去 27000 先沽番落來，乘機夾一夾淡友，你話係咪不亦樂乎？
小弟其實都好鐘意用黃金比率去計數。恆指由高位 32000 跌到去 20000，若反彈 0.5，即反彈 6000 點，即係家下既 26000點。目標已達。不過唔知點解我覺得大家今次都好明顯係好有戒心咁睇淡，所以我估個市唔應該會咁淡！我估呢次反彈可能會有 0.618，即反彈 7416點又即係話會到 27416點左右又又即係話離家下個位仲有成千零點水位。ummm ...... 睇嚟都搏得過喎！
A 貨休市，我哋就睇下美股啦！美國今晚公佈就業率同失業率的數據，又係差到阿媽都唔認得。4月非農業就業人數連續 4個月下滑，減少 2萬個，不過比預期減少 7.5萬少咗好多。美市今晚又照舊一樣咁反智，將冇咁壞既消息當係好消息，寫呢篇 post 的時候 DOW 仲升曾經升咗百二點，呢個 moment 就倒跌咗約 11點。
尋日話美元兌日圓有機會衝破 105，結果今晚已經衝破咗！最高仲報 105.81 架！咦？咁樣睇來下半年去日本可能會平 D 喎 ......
睇來港股個市睇美股都係冇乜方向架喇 ...... 不如睇番內地個市啦 ...... 而內地近期阿爺救市，我覺得應該唔錯，港股可以審慎睇好。
祝各位有個愉快的周末啦！
沒有留言:
發佈留言