猶如琵琶半遮面

尋晚諗住等聯儲局個議息結果先寫 blog。點知維京人等下等下太眼瞓，結果瞓著咗，都冇 update 到尋日個市。

冇所謂啦，話晒今日係五一假期，香港冇開市嘛。而且尋日香港個市成交得嗰 80億左右，咁鬼少，都好似冇乜代表性。

睇番尋日呢個四月最後的一個交易日，恆指跌 159點，收市報 25755；而國企指數就下跌 68點，收報 14230點。成個月來睇，恆指都升咗多過兩千點，係今年的第一個升市的月份。

尋日成交咁少，有幾個原因啦。一來係五月期指啱啱開倉，大小戶都未知道今期應該做好定做淡；而內地五一小黃金周會休市幾日，下星期一先再有得做買賣，冇咗阿爺既方向；咁當然，觀望氣氛咁濃厚的主要原因，就緊係大家都靜待昨晚聯儲局的議息結果啦。

今朝睇番新聞，美國聯儲局以 8 比 2 的票數，通過減息 25點至 2.0%，符合市場預期。而原先有部份分析員就預期今次會係今年最後一次減息，仲話可能會係美元見底的先兆 ......

結果呢，利率聲明我就覺得好鬼含糊，令市場捉摸不定。一時又話寬鬆的貨幣政策可以喺未來一段時間刺激經濟；另一方面就話密切注意通脹。我哋可以理解為若經濟持續下滑，美聯儲準備再次降息；也可以理解為喺通脹繼續上揚既時候就需要加息。但幣就幣在有更多的分析員預期美國會出現滯脹，即經濟呆滯、通貨膨脹！呵呵 ...... 咁即係點呢？究竟美國今年仲會唔會停止加息呢？定係會繼續減息呢？

利率決議發表後，美元都衝過一段架。之但係雖然總體而言市場都覺得減息周期可能或者有機會唔排除唔奇會告一段落，但聲明出嚟既感覺都係好似怪怪咁，點都覺得爭 D 嘢爭 D 嘢，美元近期的升勢似有所減慢。就睇吓短期日本紙會唔會衝破 105 啦！

福滙亞洲的 forex 評論形容得好好，我就姑且借用佢的意思。今期聯儲局的聲明，簡直就係，簡直就係「猶如琵琶半遮面」呀！

講番尋晚美股個市，真係比較肉酸，先升咗一段 (好似過百點) 然後回落。不過寫呢篇 post 的時候美股又神乎奇技咁升咗 185 點！

咩話？升咁多？唔係眼花吓嘛！？突然升咁多？ DOW 仲過咗 13000？

係喎，原來。原來油價仲跌咗超過 2 美元，暫報 110.90 美元。攪到個市氣氛大好！

唔通我較早話過美元會有個強烈的反彈己經開始咗？ 話晒美元升通常油價會跌喎 ......

睇番小弟個組合：

# 02823 A50 基金 - 暫賺 9%
# 13073 A50 基金 call 輪 - 暫時打個和
# 13245 中移動 call 輪 - 暫蝕 15%

雖然中移動輪星期二早咗買，攪到我暫蝕 15%。不過美市家下中國移動預託證券 (CHL) 升超過 1%，加上小弟迷信地堅持睇好 5月2日聖火到香港個市會升，睇來聽日都好有機會收復失地兼賺錢！

只要今晚美股生生性性，聽日港股一定冇問題！

******

講開奧運聖火，真係有 D 氣頂！點解亞運金牌得主車菊紅同埋足球先生郭家明等冇得攞火炬，反而俾咗「領呔伯伯」呢位九唔答八的老人家可以攞呢？保你大呀，聽日攞火炬千祈唔好有乜衣郁 ...... 如果跑下跑下攪到心臟病瓜柴，都唔知道人哋幫你國葬定唔國葬好！？諗起紅旗蓋在你身上，我真係啞晒兼毛管棟架，大佬！