今日港股嘅走向可以話用出人意表嚟形容。朝早開市後曾升過百點，但過咗十一點後已經開始腳軟，但唔算話有咩點跌。點知食完 lunch 後，淡友開始做嘢，恆指仲跌破 15000點，最後以接近全日低位收市，報 14878點，跌 407點。
今日呢種市況我哋叫做單日轉向。跌市成交增，有成 678億。但係咪可以做淡，小弟呢個淡友短期亦開始有保留。理由係個市由低位萬一點抽上嚟近期高位接近萬六點，雖然升幅有成四五千點，但越嚟越多散戶喺高位做淡，大戶又唔似會跟散戶搭埋同一條船。
最好形容個市嘅係：唔似有大方向。不過咁講又好似有 D 癈話，唯有邊走邊看。
家下個市好似玩緊音樂椅咁，今期呢隻升聽日就輪到第二隻接棒。好似前排匯控 (#00005) 係咁抽升，今日就輪到渣打 (#02888)。經高盛同里昂齊唱好，渣打逆市上升，漲 1.3%，收報 $111.1，最高曾見 $114。
睇嚟大戶呢排冇乜錢，要將股仔輪流唱搶錢去也。今時今日炒股票，都係有短炒冇長揸者。
PCCW (#00008) 私有化上訴案件終於攪掂，過程峰迴路轉似睇戲。記得上年第一次話提私有化，造價為 $4.2，後嚟攪下攪下又話要提高到 $4.5，擾攘多時。後嚟又攪出一個種票疑雲，經過長達六日嘅審訊，三位法官裁定證監會上訴得值。小股東當然好高興，話晒高位買入後冇放過，如果私有化成功咪連一絲翻身嘅希望都冇埋？所以睇電視持有電盈嘅伯伯真情流露，忍唔住仲唱埋熱愛香港，好掂！
美國今晚有好多公司開始公布業績。包括第五大銀行 Morgan Stanely。佢開出嚟嘅成績表認真麻麻，蝕 1.77億美元。股價曾一度跌百分之七；反而另一隻富國，盈利破紀錄咁好，賺 30.5億美元，升幅就有百份之七有多。
寫呢篇 post 嘅時候道指開市約兩個鐘，暫報升約 40點。
美元升咗兩日後今晚回一回，歐羅兌美元報 1.3012，今朝曾低見 1.2877 㗎。至於 Spot Gold，喺 881 ~ 890 呢個 range 上上落落咁。小弟都係睇好金價，等待再一次升破 900 美元一盎斯再向 1000 大關進發，目標 1100！
Cheers！
******
荷比盧+巴黎遊
0: 初一開始遇厄運
1: 阿姆斯特丹感覺: 運河、單車、大麻、紅燈區、仲有花。
2: 好荷蘭感覺但有點造作的 Zaanse Schans
3: 不一樣的運河城市 - Utrecht
4: 城鎮雖小，建築美麗 - Haarlem
5: 閒逛阿姆斯特丹
6: 先到 Utrecht 鐵道博物館，再到 Rotterdam new!
******
近排比較忙，如果想睇維京人嘅 update，可以去 twitter。
******
維京人近期愛上跑步，有空請幫幫忙為小弟打氣啦！(雖然已經有成十日冇跑過！）
http://runningviking.blogspot.com
8 則留言:
維京兄提過數次睇好金價，何解？
維京：
好友淡友，依家都難分界綫。
自從牛熊證出咗，大行就一忽好友，一忽淡友，兩邊食！
維京! 好o野呀你! 好準woh :) 金價900喇!
想問o下你參與股票有幾耐? 想好鼓勵下自己要繼續努力...
湯記，
啱啱 update 咗 blog。得閒望望。
laulong,
係呀，好難搵食。今日小弟轉軚，睇好。
MF,
估中市加上有錢賺嘅滿足感，冇得頂。
(咁當然，睇錯市同埋蝕錢，要沉著應戰啦）
小弟已有超過十年嘅股票買賣經驗，窩輪約八年，期指約 3年，Forex 同 Spot Gold 則兩年貨仔。期間交咗唔少學費 (即係蝕錢）呢。
Cheers!
經驗真的好緊要, 看中市又賺錢的感覺非常良好. 輸了就要好好賽後檢討了. 謙遜, 股票市場教了我很多.
你作為淡友都想轉呔, 反而可能真的見頂law :P 有無一點神經衰弱...
20000點... 我覺得是要到年尾, 反而如果5月高不過4月, 就到我轉呔10676低處未算低.
MF,
> 你作為淡友都想轉呔, 反而可能真的見頂law :P 有無一點神經衰弱...
哈哈，小弟成日都遇到一轉軚睇好個市就跌，一睇淡就轉好嘅情況出現，見怪不怪，that's why 要嚴守止蝕。
不過如何止蝕同埋幾時止蝕，呢個真係一個藝術嚟㗎。
同埋要 depends on 有關產品嘅特性。股票基本因素好都話可以長揸，窩輪就要小心溢價太高，以致正股升 call 輪跌，正股跌 put 輪都跌；Forex、期指就一定要嚴嚴嚴嚴嚴嚴嚴嚴嚴嚴嚴嚴嚴嚴嚴嚴嚴嚴嚴嚴嚴嚴守止蝕，個人經驗。雖然好多時一 touch 到止蝕位就會反彈，但切勿因此而追貨。至於 spot gold，冇 forex 咁大上大落，但係就會發神經突然大升或大跌。
嘩嘩嘩嘩嘩嘩嘩嘩嘩嘩嘩嘩嘩嘩嘩好嚴呀!:o Forex及期指我不懂, 等多些經驗先玩喇.
選窩輪真的要好小心, 看清楚, 同埋唔可以長久...
我覺得可以寫blog講講財經, 實在幾好玩, 沒有作為職業的分析員咁大壓力及框框, 我o地反而可以暢所欲言.
MF,
冇錯，係好嚴同埋真係要好嚴㗎。
選輪嘅 process 真係好緊要，到期日行使價溢價引伸波幅街貨量等，任何一個 factor 唔同出嚟嘅結果亦唔同。
好同意你所講吖，最緊要係寫自己想寫嘛。
Cheers!
發佈留言