考慮轉軚

尋日港股玩單日轉向，跌超過 400點。雖然跌市成交升，利淡，但維京人叫大家唔好睇咁淡。結果？今日恆指倒轉升番 336點，收報 15214點。

叫人唔好睇咁淡，理由係太多人睇萬六係個頂，通常咁多人睇嘅時候結局都係非如大眾所願。再留意下近期港匯轉強，金管局係咁沽美元，似係有資金流入香港？至於係買樓定買股票，定係準備定買人仔，就真係天曉得。

近期維京人呢個淡友打算改變看法。當個市由低位升到咁上下先改變看法又真係幾癈。但小弟唔係靠分析股票糊口，只係喺度分享看法。而且投機嘅嘢，無謂同錢拗頸，見個勢係咁升上嚟，唔買貨亦非上策。

咁即係點呢？暫時觀望，等候恆指升破 15800 左右。睇圖表如果升穿 15800，即係突破由 2007年十月畫落嚟嘅下降軌。突破後應會大升。暫睇 17000點，先殺一批淡友，再睇 20000點，直至最後一位淡友投降。

如果唔穿 15800，小弟都未必會咁有信心要入貨嘅。但如果要入，考慮長線買財險（＃02328），雖然佢係三隻中資保險股入面基本因素係最差嘅。但睇五年圖似做緊大型頭肩底，睇 $10。

渣打 (#02888) 打算喺印度上市，集資超過十億。難怪近期大升，似有勢。

有網友問維京人點解近期咁睇好金市。其實理由好簡單，就係因為各大國都已經開動印鈔機，每一種貨幣都會偏值，通漲會來臨，黃金似會保值。

睇圖，近期嘅金價走勢卻比較幾肉酸，喺 2月尾 3月頭環球股市風高浪急時見過 1000美元，但無力再上。一度維京人仲以為佢做緊頭肩頂，但似跌到 860 又跌唔落（否則睇圖應見 800)。真係唔知佢想點。

今晚美國有大數據呢。首次申領失業人數升至 64萬，較預期多。未到年中失業率已去到 8 - 9%。二手房屋銷售跌 3%。

消息刺激，金價一度挑戰 900美元一盎斯。短期睇 930 - 940，不過阻力好大。

維京人係 Apple (APPL) 嘅 fans。今日公布業績出乎意料地好，而且傳 Steve Jobs 會喺六月份重返工作崗位，消息刺激 Apple 股價上升，亦令納指 high high 地，寫呢篇 post 嘅時候微升 3點。

市場永遠都係咁迷人。時升時跌，估中市嘅滿足感非筆墨能形容。

Cheers！

******

荷比盧+巴黎遊

0: 初一開始遇厄運
1: 阿姆斯特丹感覺: 運河、單車、大麻、紅燈區、仲有花。
2: 好荷蘭感覺但有點造作的 Zaanse Schans
3: 不一樣的運河城市 - Utrecht
4: 城鎮雖小，建築美麗 - Haarlem
5: 閒逛阿姆斯特丹
6: 先到 Utrecht 鐵道博物館，再到 Rotterdam new!

******

近排比較忙，如果想睇維京人嘅 update，可以去 twitter。

******

維京人近期愛上跑步，有空請幫幫忙為小弟打氣啦！(雖然已經有成十日冇跑過！）

http://runningviking.blogspot.com