命不該絕，還是只是時辰未到？

過去一周環球股市大反彈！美國嗰便花旗 (C) 同摩根大通 (JPM)，連埋尋晚嘅美國銀行 (BAC) 報盈喜，近日呢三間大銀行都公布今年有望獲利。美銀仲 predict 全年稅前盈利將達 500億美元。刺激消息令到今周美國道指彈回 7000 點樓上，收報 7223點。

星期五港股亦唔弱，以為係黑色星期五？如果你係淡友就係黑色喇！恆指亦彈回萬二點樓上，一周收報 12525 點，未捨得跌落四位數。有人亦睇美國嗰便 D 銀行似乎攪得掂喎，加上溫總拍晒心口阿爺仲有大把收埋嘅措施刺激經濟，有人問其實家下會唔會係做緊牛一（牛市第一期）？

個市係命不該絕，定係跌市只係時辰未到，冇人可以話到俾你知。如果有，嗰 D 一定係神棍，或者係騙子。

睇淡嘅維京人又點睇？

1) 個市短期有反彈，冇理由唔跟趨勢走。睇好財險 (02328)，似係做緊雙底。家下 $4.21，第一關睇 $5.2 (小雙底量度升幅），第二關睇 $6.2 (12月高位為 $4.7　左右，以近期低位 $3.16 計嘅第二個雙底嘅量度升幅）。

2) 個市有機會反彈幾日。港股要睇禮拜四中移動 (00941) 公布業績。業績好壞都可以令到個市向唔同嘅方向移動。

3) 個人仍然相信恆指有機見四位數。3月30日秋官新劇玩打枱波，大家小心。

4) 歐羅兌美元近期試過 1.24左右無力再插，家下彈返去 1.2929，氣勢有餘未盡，估計有機上升 1.3300 左近。

5) 溫總講嘢擲地有聲， 叫美國佬醒醒定定唔好賴債。美債越嚟越似係一個 scam。
Obama 嘅刺激經濟方案銀碼就好刺激但個市就唔係好受刺激，睇嚟大印銀紙都係冇辦法中嘅辦法。除咗美國開動印鈔機，又有邊個國家可以唔印銀紙攪刺激經濟方案？睇嚟唔駛一年，通漲會話嚟就嚟，而且係好勁嗰隻。買實物好，買金銀銅鐵可能仲好。

黃金 touch 1000蚊後已回落接近一成，最新係見 929.4，係時候入番 D。荷銀亦有幾隻黃金嘅 warrant，不過溢價唔少，買嘅時候亦要考慮一下。

祝各位有個愉快嘅周末。

Cheers！