再談匯控供股．講吓匯市走勢

******

尋日匯控 (#00005) 出業績，轟動全城：業績差咗、派息少咗、仲要供股。睇嚟市場唔係好睇好，即刻放貨作投票。今日收市比起停牌前暴跌 18.79%，即 $10.7，收報 46.25。離維京人尋日計嘅除淨後價錢 $48.49 仲要低。

正當大家擔心咁嘅形勢仲有冇大戶會供股呀？唔駛驚，有散戶血肉長城，仲有各大孖沙撐場。不過由於今日大幅低開，有 15隻匯控牛證已經遭受殘酷一叮，另外仲有一隻未見光嘅牛證唔能夠面世。

富豪支持匯控，仲親體力行走去供股。其實大家亦唔需要因為有錢佬供，你就走去供。話晒有錢佬同銀行嘅千絲萬縷嘅關係，又唔係我同你可以咁一清二楚嘅。值唔值得供匯控，都係睇吓你點睇佢前景點樣囉。如果你百幾蚊買到家下都未放，供唔供股又真係冇乜所謂。因為你連百幾蚊都睇好，咁即係話家下四十零蚊你只會覺得佢係平而唔係覺得佢基本因素有變，咁堅持信念又冇話你唔啱嘅。

******

尋晚 1.2593沽咗歐羅，止蝕設於 1.2625。點知寫完篇 post 冇耐就已經 touch 到個止蝕。結果尋晚歐羅走勢勁反覆，又冇大方向，結果維京人輪咗差唔多 100點。好彩今晚跑步前又沽咗嘢，寫呢篇 post 嘅時候仲落到去 1.2525，都冇咁傷。

家下歐羅徧淡係事實。但短期睇，跌唔落 1.2499 佢仲成日會反彈，而且反彈力度都唔弱，穿破 1.2900 左右就更有戲睇！

另外，美元兌日圓一如維京人所講，100會有好大阻力。三月通常都會有資金回流日本做年結，所以小弟估四月開始日圓先會跌，美元兌日圓到其時將會升穿 100。咁當然，家下金融海嘯已經沖散咗大家一向玩開嘅遊戲規則，玩下手三月份沖破 100 又唔係冇可能。

******

荷比盧+巴黎遊
0: 初一開始遇厄運
1: 阿姆斯特丹感覺: 運河、單車、大麻、紅燈區、仲有花。
2: 好荷蘭感覺但有點造作的 Zaanse Schans
3: 不一樣的運河城市 - Utrecht

******

維京人近期愛上跑步，有空請幫幫忙為小弟打氣啦！

http://runningviking.blogspot.com


******