一葉知秋

尋晚聯儲局議息，結果一如市場預期冇加冇減，維持 2厘不變。不過伯老對加息的態度就冇咁強硬，仲俾人的感覺有 D 搖擺不定。係咪以為經濟差就唔會有通漲先？喺外滙市場內，大家都有 D 失望，美元指數又跌番落嚟。

美元散散哋，油魔就 high high 哋又再出動。寫呢篇 post 的呢一個 moment，油價又升咗 $3.75，報 $138.3。睇嚟上破 $140 都係市場上既合理期望。小弟睇油價可能要去到 $150 先至會回吐番少少。OPEC 主席仲話油價有機會去到 $150 - $170，賣花果然讚花香！

話咗呢個禮拜係多事之週，美國今晚公佈 5月份二手屋銷售為 499萬間，略升 2%。國民生產總值就修定為 1%，比修定前好 0.1%。個人消費支出修定後為 3.5%，同預期差唔多。

高盛 (#GS) 睇淡花旗 (#C)，或者需要再集資，被列入沽空名單。富通仲話取消派息外，仲要集資15 億歐元。

DOW 開市就受油魔所影響，跌多過 200 點。又睇下美股收市會唔會再跌多 D?

香港的任總話第二季的外滙收入可能會連續第二季下跌。中移動今日以最低位收市，向雙位數昂然邁進。一眾出口股弱過藥煲，疲過腐皮。龍頭股利豐 (#00494) 大跌 6.72%。港交所 (#00388) 唔知係咪得罪咗政府，新的香港商品交易所 (HKMEX) 受鬍鬚司長力撐。港交所就受花旗調高至「買入」，升超過 2.5% 後收市只係升 $1， 唔夠 1%，維京人繼續睇淡。其餘港股今日好多都見高位後即刻俾人掟貨，你都未話唔驚！

恆指今日收報 22,455點，成交仍然奀 chit chit，只有 595億。跌咗既 179 點正係尋日升咗既 179 點。唔知係人為定係冥冥中自有主宰。今年股民睇來應該要忍忍手，唔係真係買咗股票做蟹後，冇得翻身仲變埋傻 B。

呢排亞洲各國開始有 D 爆鑊跡象。越南股市連續廿幾日開陰燭後冇得反彈；泰銖跌穿一年新低，泰國央行分別喺今個月 10日及 19日出手沽美元以維持滙價，最後美元兌泰銖報 33.545，出手冇用滙價繼續跌得一浪低於一浪。

今期應該有資金外流離開亞洲區。除越南同泰國外，其他既國家係咪真係流走同埋流走幾多就未知，但香港就肯定係流走得好勁！港滙自 3月中旬以來，港元對美元匯率持續走軟，並于近日創出 7.804 的近 10個月新低。與此相對應，港元拆息開始逐步攀升，呢兩個禮拜更有加速上揚的姿勢，好明顯國際熱錢開始撤離香港市場。

一葉知秋，種種跡象表明，呢個六月真係唔會好過。又睇吓過咗歐洲國家盃會唔會好 D ?

手頭的貨：

# 02823 A50 基金 - 暫蝕 13%
# 07179 港交所 put 輪 - 暫賺 28%

******

講番歐洲國家盃。尋晚好開心德國又贏波，雖然贏得好險。今晚又到咗維京人最鐘意既俄羅斯，對今屆大熱之一既西班牙。唔知俄羅斯可唔可以喺神奇教練希汀克既領軍之下，反敗為勝贏番上次輸俾既西班牙，以一雪前恥？

Good luck!