世事豈能盡如人意？尋日仲諗住意大利會生生性性咁踢番場好波 ...... 唉， OK 啦，唔算話踢得好差，不過淨係得個守字囉。而且個個球員都冇乜朝氣咁，個波唔咁就腳就即刻縮腳唔追波，慌死西班牙會打反擊，踢法略嫌保守咗啲。
另一樣未能盡我意既係今日個市冇大跌到，冇癮。其實喺開市前都估到架喇，因為澳洲日本等開市都唔係插得好勁。點知香港個市殺完好友殺淡友，由開市後跌咗三百零點，然後倒升而下午返嚟見到內地個市況唔就，恆指今日收報 22,714 點，跌 30 點。成交又繼續維持低水平，約六百幾億。國企指數就跌幅比較得勁啲，收報 12,236點，跌 107 點。跌得勁係因為好多資源股大插水，好似馬鞍山鋼鐵 (#00323) 跌 7.1%、中國鋁業 (#02600) 跌 5.7%、洛陽鉬業 (#03993) 跌 8.29%，真係冇陰功 ......
今期買股票真係都幾難玩，話晒都係熊市。之前以為好穩陣的股票，家下隨時都會俾基金洗倉。買藍籌博反彈咩？又淨係彈得少跌得多；買細價股博大升幅，而家好明顯又未係時候炒細股；買窩輪又只得正股有波幅，隻輪冇升幅，齋蝕時間值；買牛熊證就仲危險，因為隨時會 touch 到個回收價隻證即時打靶。
既然投資者今期未算恐慌，大市亦應未到衰到貼地、否極泰來之時。亦即係話個市應該未見底！大家要小心。
六月過埋呢個禮拜又差唔多玩完。D 財經分析員好多都話大戶為咗粉飾第二季甚至上半年年結的廚窗，都唔夠膽將個市捽低。禮拜五就期指結算，要留意呢個禮拜美國有幾個數據將會公佈，包括聽晚有 6月消費信心指數、星期三議息兼且有 5月耐用品訂單數據、星期四公佈利率決議及政策聲明，以及第一季生產毛額、個人消費、GDP 價格指數、個人消費支出核心指數及 5月成屋銷售。是但一個 lower than expectation or over expectation，個市又會大癲大肺發神經。
今日大摩摩根士丹利估未來十五日港交所 (#00388) 估價會下跌，甚至比小弟之前估的百零蚊進取，佢估會去到一百蚊！
今晚冇波睇，可以瞓番覺好覺！
請請！
沒有留言:
發佈留言