請君入甕

港股喺端午節後大插，恆指上周連跌四日整咗支大陰燭，跌一千八百幾點。美國上周五公佈五月份消費物價指數，預期 3.9%，但結果 4.2%，雖然超出預期，但由於唔係超好多，市場解讀為聯儲局未必會大幅加息，甚至可能未必咁快會加息；加上油魔後退兩步，美股 DOW 上周大幅勁升 165點。今日恆指亦唔執輸隨外圍做好，全日收報 23,029 點，升 437 點或近 2%，成交 567 億元；國指升345 點或 2.8%，收市報 12,558 點。

呢期股市大跌，其中一個原因係油魔肆虐。啱啱過咗既 weekend，維京人喺度諗緊油價的未來去向。不過對油始終唔係好熟，所以都唔係諗得好通。淨係直覺上覺得油價高處可能未算高；有分析員仲話會升到兩百蚊一桶！嘩，咁家下咪仲有好多水位？不過話番轉頭，美元可能下半年會反彈，而且話晒今年美國大選年，政客應該會出吓手啩，共和黨冇理由唔做 D 嘢架喎 ...... 所以都唔係好估得到後向如何。

美股今晚繼續有壞消息，美國投資銀行 Lehman Brothers 公布，由於破紀錄既交易同埋對沖虧損，第二季輸 28億美元。呢間美國第四大投資銀行表示，每股虧損5.14美元。去年同期有盈利12.7億美元，每股盈利有成 2.21美元架。咁即係話今年第二季輸既等於上年同期所賺的超過兩倍！

呢兩日仲有高盛 Goldman Sachs 同大摩 Morgan Stanley 公佈業績。不過佢地就事先張揚話第二季都好似有錢賺。

今晚美國個市反智地認為美國經濟同股市最壞時刻可能已過，雖然開市 DOW 都跌過超過 80點，但寫呢篇 post 既時候跌幅又收窄番只係跌得廿零點。今晚油價就嚟想創新高，又睇吓今晚美股收市如何。

小弟覺得呢兩日個市有少少請君入甕格局，喺仍然一遍壞消息的環境先俾番少少甜頭 D 小股民，然後個市又可能再因為是但一個比 expect 差的壞消息又再插過。

個市雖然好似好難估，但有一樣嘢維京人就覺得都幾肯定的，就係港交所 (#00388) 徧貴咗！個市持續咁弱雞，佢既股價真係未必值超過 20 倍既 PE。家下開始留意下 D put 輪先 (例如 #07179)，等佢呢兩日升一浸可能就會入貨買港交所跌。目標價 100 蚊。風險係阿爺塞驚無神開通直通車或者有其他一 D 你估佢唔到既新政策，所以只宜小注。

******

睇番歐洲國家盃，尋晚嗰場波真係超好睇！小弟係捧捷克既，本身頭嗰 75分鐘都好開心，但點知土耳其淨低 15分鐘輸兩粒都唔氣餒，咬實牙根90 分鐘前追番兩粒。等我仲當其時即刻喺雪櫃攞多罐啤酒出嚟，諗住可以睇埋今年特設既分組賽分勝負射十二碼！點知土耳其響加時都可以射多一球，結果反敗為勝！捷克唯有輸波收場，真係吹佢唔漲！雖然捧嗰隊入唔到 8強，但土耳其既鬥志又真係好值得人欣賞！

That's why 足球點解咁好睇！又係嗰句：波係圓既！希望今晚德國唔好再滑鐵盧輸波啦！