今日恆指又再插咗 528點，收市報 22,797點。離頭肩頂量度跌幅去到二萬二咁上下，仲有約七百點水位，仲未似係可以做好的時候。而內地個市今日就慘 lor，尋日大家都憧憬阿爺會出手打救，expect 個市會升；點知內地約一億股民既同一個夢想，亦喺同一日幻滅。今日 A 股超過一千隻股票跌停版，上證指數暴跌 192 點收報 2,748點，失守 2,800點。A 市股民開始不斷炒蝦拆蟹咁鬧，矛頭仲直指監管當局。唉 ...... 鬧嚟做乜？買股票係你情我願架嘛，跌市好心就未輸打贏要啦！
A 股已經喺高位回落差唔多一半有多，P/E 亦去到廿零倍咁上下 (要知道上年 A 股 P/E 去到差唔多有成 70 倍！) ，估值已經開紿變得較為合理。咁當然，廿零倍你話係咪好平呢？咁又肯定唔係。只係較為合理而已，而合理既股價亦唔代表股價唔會繼續跌！
若睇好 China 前景而同時亦冇貨喺手既朋友，呢個 moment，其實都可以考慮第一注買入與 A 股有關的基金。理由除咗估值上覺得合理外，原來家下已經有 95% 既 A 股股民輸錢！經濟方面，會影響內需；政治方面，會影響和階社會。所以阿爺可能會隨時出手打救！
阿爺無啦啦提高成品油價格，個勢似係想提高中石油中石化等重頭股既氣勢，唔通係出手間接救市？大家又睇吓點？
沒有留言:
發佈留言