風神訪港，港股得番半日市。恆指今日收市報 22,635點， 升咗約 371 點後回軟，最後升179點。成交持續疲過腐皮，股民無心戀戰，半日市得嗰約 378億。
港交所 (#00388) 一如維京人較早前喺呢度所料，繼續下跌。收市報 $115，今日一度挫近 $113 今年低位，跌 2.3%。好肯定弱勢已成，家下沽港交所可以話係最穩陣的選擇！小弟的港交所沽輪則比我想像中升得少，可能 premium 仲係幾貴的關係？
維京人成日覺得香港自稱為國際金融中心，實情係有 D 名不符實。大家喺港交所炒開既嚟嚟去去就只有嗰幾味，較熱門的有股票、窩輪、牛熊證、期指等；外滙冇日本新加坡等咁普及，亦唔係港交所的 scope；而呢幾年好流行的商品期貨香港就連影都冇。實情我哋背靠大陸，理論上攪商品期貨應該有得做。不過唔知港交所係咪戀棧家下做獨家生意唔休做，好多對「香港國際金融中心」呢個品牌有幫助的產品都冇推出，確實令人失望。
今日突然睇新聞知道，唔知乜水突然話要攪香港商品交易所，仲話開始時做燃油期貨合約的交易。咁做係希望可以捕捉全球大宗商品投資的大幅飊升所造成的商機，亦可以好好利用香港作為中國咁多個城市中，最國際化同金融最好的優勢，幫番中國。新的交易所最快會喺出年 Q1 開始啟動，到時要密切留意。
另外亦都要留意的係，仲有約一個鐘美國聯儲局就會公佈議息結果，以及兩個鐘頭後歐洲國家盃德國對土耳其。
小弟係捧德國架！希望佢會贏啦！
沒有留言:
發佈留言