尋日油價挑戰 $140，美股及美滙昨晚大跌。DOW 跌多過三百點。全球股市亦因為呢隻油魔攪到散晒，尋晚歐洲至美洲至今朝的亞洲市，全面崩潰，日韓股市跌 2%；內地暴跌半成，滬指周線圖出現六支陰燭；香港恆指一度跌接近 700點，收市報 22,042點，跌 413點，成交約 620 億。
今日六月期指結算，淡友成為大贏家，由頭贏到尾，仲係贏到開巷嗰隻。成個六月原來跌咗接近二千點！五月跌二千六月又跌二千，兩個月夾埋已經跌咗成四千點。今期技術分析派又一次勝利，因為恆指好完美咁完成呢次頭肩頂的任務，達到量度跌幅約兩萬二，準到無倫！
滬深大插水，好似郭晶晶表演咁精彩。香港的國貨當然難獨善其身啦！六行三保全線下跌，其中跌得最勁的係財險 (#02328)，跌 4.49%。中石油 (#00857) 跌接近 3%、中石化 (#00386) 跌超過 3%。不過唔及 A 貨跌得勁。中石油 A 股 (#601857) 同埋中石化 A 股 (#600028) 分別跌 3.47% 以及 9.12%！郭晶晶跳水如果都係有咁樣的跌幅，可能會跌穿個頭都未定！
今年以來亞太區股市普遍跌超過一成。今晚油價又創新高，仲 touch 過 $142，DOW 都跌過六十零點。里昂料美股會跌至 06年低位，照咁計，DOW 大概會跌到去 10,700點，應該仲有約 7% 可以跌。油魔繼續發惡，睇嚟星期一亞太區股市都唔會有 D 咩大反彈。六月仲有下星期一呢個交易日，港股能否五窮六絶七翻身，仲要睇多陣，同埋要油價可唔可以唔再升先知！
沒有留言:
發佈留言