尋日港股成交創咗年幾以嚟的新低，維京人自己就買咗港交所 put 輪。沽港交所的主要風險為阿爺可能會塞驚無神開通直通車、或者有其他一 D 你估佢唔到既新政策。點知話口未完，今日內地個市就傳阿爺會出手救市，等 A 股今日終於嚟個反彈。
上證指數連跌十日後終於嚟個比較似樣的反彈，滬深兩市大漲超過 5%。上海證券綜合指數收市報 2,941點，升 146點，或 5.24%；深圳證券成份股指數收市報 9,903 點，升 473 點，或 5.02%；滬深 300 指數則報收 2991 點，升 148 點，或 5.23%。較多人講的上證指數同埋滬深 300 指數暫時仍然俾 3,000 點呢個心理關口頂住。
受內地個市帶動，港股亦唔執輸；其中又以 H 股升得較為勁。國企指數收報 12,829點，升 261 點，即 2.1 %；而恆生指數收市報 23,325 點，升 267點，比較略為失色升咗 1.2 %。
小弟覺得今次中字股反彈，特別係 A 股，絶對係一次死貓彈！即係話只係大跌後既迴光返照，暫時仲未見到轉勢！話晒個市弱不禁風，點會咁容易話升就升呢？更何況內地 A 股由天堂五十倍至一百倍市盈率跌落嚟，家下都有成廿零倍市盈率，都仲係喺人間，未至於去到地獄少過兩位數字的市盈率噃 ......
日前由中國證券投資者保護基金公司發出的一份問卷，內容古靈精怪，都唔知佢想點。問卷的問題設計，主要係想了解一下股票投資者對現有跌市的看法，但最攪野既係問咗好多投資者對政府救市的看法，例如「你是否預計到政府會採取措施？」、「你如何看待前期政府連續出台的政策措施的效果？」、「如果政府繼續採取措施，你認為以下政策措施按有效程度排列次序為？」然後俾十大政府救市措施俾人揀！
嘩！有冇攪錯？乜大家真係 expect 股市跌要政府出嚟救市？
買同賣係市場經濟一個好重要的自發性行為，冇人迫你買或者賣架喎。股價升，你叻你有眼光你肯博！股價跌，冇理由就希望政府救市吓嘛？話晒要食得鹹魚抵得渴喎！
要知道股價跌到咁上下，就一定會有醒目兼且有遠見的投資者出手入市。呢個 moment 唔入，可能未到價。等佢跌多 D 多 D 再多 D，點樣都有一個 moment 係醒目資金忍唔住要入市啩？市場總會有佢一隻無形之手去調整既，係咪一定要政府出手大家先覺得 OK ?
Anyway, 最衰內地股市仲未開放，嗰 D 醒目錢可能仲未可以直接咁投資內地個市，而導至內地既市仲未捨得正式脫離熊市。又或者大家都覺得 A 股既股價仲未去到值得價值投資者入市既階段？
小弟都喺 $17.4 買咗 A50 基金架 ...... 始終相信內地長遠經濟 no problem 嘛！For long term， 繼續 buy China 可也！短線嘛 ...... 大家可唔可以唔好，唔好迫阿爺出手呢？我相信阿爺都好想擺脫政策市，讓有中國特色的市場經濟發揮佢既作用嘛 ......
唔該晒！
沒有留言:
發佈留言