六月飛霜

呢排個市靜得交關，但維京人則忙到不可開交。原本五月底要趕個 project deadline，但 D user 慢吞吞仲有好多嘢未準備好，小弟一於同老細講話延遲 go live 一個月，即六月底先交貨。等維京人今個月可以唔駛執上線後的手尾，相對可以輕鬆 D。而且呢個周末開始歐洲國家盃開鑼，乘機可以舒舒服服通頂睇波！正！

如果睇成交，個市表面睇來好似水靜河飛咁。但實情上個禮拜的財經新聞真係精彩到暈！繼郭氏三兄弟內哄升級、然後有內地電信股大兜亂，再有老廉的探射燈行動捉 D 窩輪造市者去飲咖啡，仲有港交所加長「競價」時段的「勁假」收市價，真係股市乜都有，非常好玩。

信不信由你，呢個六月，維京人係睇淡的，而且有可能仲係幾淡嗰隻，個市可能會跌到你唔信。特別係要小心過咗端午節後既個零兩個禮拜，大市好有機會試試底位，一於喺奧運前嚟個大整古。

小弟絶對唔係危言聳聽。

自美國次按危機爆煲以嚟，都差唔多過咗一年有多。仲記得上年三月左右，係 HSBC 第一時間走出嚟叫人留意，同埋作出相對應的應變。其實次按攪到咁上下，減息都減咗咁多次，美元又跌到阿媽都唔認得，但係美國佬仲未有好大起色。美國已經公認係衰退！衰退還衰退，幣就幣在呢一年仲有通脹 ... 呢下先慘，通脹猛於虎，減息呢招未必萬試萬靈，仲可能攪到物價暴漲。家下做美國人好慘，供樓冇錢，周圍 D 嘢又貴，苦不堪言。2008年第一季美國銀行業賺 193億，比去年同期 356億大跌超過 45%。小弟估計下一浪應該會輪到信用卡或其他乜 loan 物 loan 爆煲，銀行又一輪撇帳，profit 又再減少，業績一浪差過一浪。

睇番美股，其實個市都冇乜點變，自低位萬零點咁上下彈番去萬三點，基本上都喺呢個 range 彈下彈下。好似好有支持咁。不過，醜婦終需見家翁，醜股終需見股東。其實2008年4月份已開始有信用卡公司 (好似係美國運通) 的撇脹率已達到差唔多 7%。嘩！咁即係借 100 蚊俾你，銀行即時 write off 7 蚊！而且撇脹率仲有上升趨勢。預期第二季業績好有機會會差過第一季。

另外，呢個禮拜五美國會公佈失業率，而禮拜六就會公佈消費信貸；過完龍舟節後會開始陸續仲有貿易收支、聯儲局褐皮書、CPI、消費者信心指數、房屋市場指數、領先指數等等，呢排大家都 expect 美國經濟最壞時間已過去，但只要其中一個數據唔符合 expectation，市場就可能乘機大沽特沽！

前排美股一開市大跌，中午好多時都俾 D 有心人買番上去。但呢幾日既美股好似已經開始乏力，連大戶都唔係好想托上去？

美國唔老嚟，又睇吓內地個市。家下中央重點脤災，應該冇時間照顧 A 市股民。更何況通脹亦預期會加劇，宏調未必會放鬆。

花旗同阿爺既然都唔就，再加上六月例淡，再加上歐洲國家盃開鑼基金經理情願睇波都唔睇股市，而且廉署探射燈射到大戶暫時都無心戀戰，香港個市最多俾佢好埋呢個禮拜。

今個六月，可能會下雪。都係專心睇波好過！

手頭的貨：
# 02823 A50 基金 - 暫蝕 1%
# 30007 恆指熊證 - 暫蝕 13%

其中 #30007 會 keep 多三個禮拜左右，暫不設止蝕。