今年4月20日星期日，阿爺苦心出手，推出大小非解禁新政策。令反映上海 A、B 股綜合走勢的滬綜指一度由低位 3,000 點彈番上嚟，等一眾內地 A 股股民以為三千點好有支持，鍚晒爺爺。不過世事往往未如人意，四川地震阿爺緊係寧願救災民緊要過救股民。今日滬綜指早盤曾喺 3,000 點關口失守，最低跌至 2,991 的最低點，最後收市險守 3,024 點。4月反彈上嚟的升幅即刻嚟個一筆勾銷！
今日香港算係牛皮 (或者係熊皮都得) 啦，收市跌咗 47 點，收市報 23,327。
內地市況唔就，美國個市就更差。啱啱寫呢篇 post 的時候 DOW 已經跌超過 160 點。不管美市午市有冇反彈，維京人由六月頭起已經好堅定不移咁話端午過後呢兩個禮拜一定會跌！太多太多數據喺呢兩個禮拜出喇，是但一個數據唔掂都係大家沽貨的好理由。更何況美國又傳加息，越南又爆煲，香港又有禽流感要殺雞！香港股票前路茫茫，暫時都睇唔到有乜曙光。
******
講番歐洲國家盃好過。尋晚睇俄羅斯對西班牙，結果西班牙 4:1 大勝，踢得唔錯。其實俄羅斯上半場都踢得幾好，不過今次希汀克佈個陣比較新鮮，似乎後防唔係好掂。
今晚第一場捷克對葡萄牙，兩隊我都好鐘意呀！如無意外緊係葡萄牙贏。不過我捧捷克捧咗咁多年，多多少少都有 D 情意結。既然係冷門，一於開場時如果表現唔係太差，小注買佢贏！
Cheers!
沒有留言:
發佈留言