終於送走跌盪嘅 2008年。「跌」係指跌市，「盪」係指震盪。(2008年年尾，恆指都有成四五千點嘅反彈，真係好震盪㗎。)2008年最後半個交易日，港股做好。恆指收報 14387點，升152點。但全年累計下跌 48.3%。噢，原來都未夠一半啫。呢個跌幅係 34年嚟表現最差嘅一年，跌幅僅次於 1974年嘅 60%。
雖則話經濟差，但話晒係踏入新一年嘅第一日，各國嘅煙花都特別靚。澳洲 Sydney 今年嘅煙花好 sharp，英國嘅 London Eye 都好型，煙花以摩天輪周邊轉一圈噴出嚟。香港嘅其實亦好睇，由 IFC2 領軍其餘九幢一齊發射煙火，時間長達四分多幾鐘。不過唔知點解維京人都係覺得上年靚 D，可能上年係第一年國金二期有煙火睇，比較有新鮮感。
由於以色列空襲加沙，部份中東同北非國家或城市，如埃及杜拜等，都取消咗有關嘅元旦慶祝活動。以色列喺各國出口炮轟之下仲未肯收手，而且據聞最少有七成嘅以色列居民其實係讚成襲擊加沙嘅，情況其實都幾令人擔心。除夕日美國原油急升超過一成。
恃強凌弱呢個道理一樣應用喺 2008年嘅金融市場上。大國不斷注資入金融體系，以輪出債項去其他國家。2008年亦係挑戰現代人類價值觀嘅一年。最穩陣嘅投資銀行可以執笠、最崇尚市場經濟自由主義嘅國家可以以最大嘅力度出手救市、銀行可以係老千、Nasdaq 交易所前任主席可以玩類似種金嘅騙局、奶粉可以飲死人、甚至阿嬌可以係唔純情淨係好天真好儍、玉女男友可以今日玩分手聽日玩結婚等等等等 ......
人類嘅貪婪自私，亦喺 2008年表露無遺。
展望 2009年，前景如何大家心裡有數。尤其係過咗一月份奧巴馬效應後，預計三月業績公布期嘅壞消息不斷。不過呢個世界冇股神有估神，所有分析員講嘅其實都係斷估。上年年頭有超過六成嘅人睇好後市，相信估到今日個市有咁嘅結果應該唔夠 1%。
喺 2008年最後一日嘅除夕日，溫總啟動 3G，有三間電訊商獲得發牌。睇嚟都係為咗刺激內需咁啦。鬼咩，家下美國唔掂，其餘各國亦縮皮，世界工廠仲邊有咁多訂單？唔靠人唯有靠自己，衰就衰在中國人貯埋貯埋 D 錢唔肯洗，刺激內需唔係一條容易行嘅路。2009年，內地可能進入長期低增長期。
雖然睇淡，世事卻永無絕對。上年年頭咁多人睇好個市，今年又有咁多人睇淡後市，可能市場永遠都係要同人嘅主觀意願相反？美國除夕日公布上周首次申領失業救濟人數大跌，美股做好，道指升咗 110點，玩下手聽日港股會開紅盤都未定。
睇運程書，維京人嘅生肖唔多老嚟喎，加上 2009年前景未明，暫時短炒有隻 put 輪。過埋年會採取多做多錯少做少錯，甚至唔做唔錯嘅策略吖。各位如需明燈，可考慮多 D 上嚟呢個 Blog，可能或許或多或少都搵到 D 方向㗎。嘿嘿 ...
雖然遲咗日，祝各位新年進步！
沒有留言:
發佈留言