Where're the jobs? Where's Steve Jobs?

今日港股一如維京人尋日所講，反彈了。亦一如維京人所講，彈完又點吖？

今日港股高隨美股高開，八連跌嘅匯控終於可以抖抖。恆指一度都逼近 12900點關口，但今日試咗兩嘢，都係衝唔過。收市嘛，只係收報 12658點，今日大部份嘅升幅都喺收市跌番落嚟。睇圖表其實係樣衰格。

似乎有 D 春江鴨預知今晚美股唔老嚟。Nokia 傳第四季度盈利遜預期、美國新屋動工量創新低，以及最大鑊嘅係新申領失業人數升至 58.9萬，淨係上個禮拜花旗國已經多咗 6.2萬需要人救濟。市場 expect 最多升至 51.9萬咋。至於持續失業救濟人數為 460.7萬，亦多過市場預期 453.4萬喎。

睇嚟美國佬今期最關心嘅問題係：Where are the jobs? When can I get paid? 相信 Obama 亦一時間答你唔到，只係叫你做人應該要有責任囉。

美元亦告失守。美元兌日圓好似倒水咁倒，一下子跌過過百點子，去到 88 邊邊呢個位。寫呢篇 post 嘅時候做緊 88.76。

除咗美元跌，歐元英磅相對跌得仲勁。歐元區生產數據差過預期，歐羅兌美元由 1.3082，曾經跌到去 1.2907；而 英磅尋底，越尋越底，家下做緊 1.3872，但最低曾去過 1.3687！仲記得上年前年咁上下，英磅兌美元係做緊超過２算嘅！做唔到家下佢好似同歐羅鬥快想做１算呼？

近期個人比較關心嘅，除咗歐羅走勢外，就係 Apple 嘅股價。查實都係關心 Steve Jobs 啫。佢係 Apple 嘅靈魂，如果冇咗佢，唔知仲會唔會有 iPhone？家下嘅 Apple 會係點嘅樣？好難想像。睇嚟休五個月病假嘅 Steve Jobs 係時候諗定 succession plan，如果唔係 Apple 股價會繼續跌跌跌跌。

聽日係鼠年最後一個交易日，如無意外大家都有共識過完年後個市會差到不得了。咪見家下好似好多人買嘢咁呀，正所謂一旺淡三墟，真係好驚 Q2 前會有蕭條 feel。

聽日可以考慮小注買入國企中資股，以博佢初四開紅盤（博㗎咋）。不過就唔建議買匯控，因為 HSBC 喺 London 同埋 New York 都有上市，如果外圍不穩，初四返嚟玩下手玩裂口低開都唔定。

好！就嚟過年，放鬆心情等去旅行。

Cheers！