Yen 又升，股又跌，13800穿咗！

睇股市，睇日圓。傳日本有一半官方大戶自上個禮拜五以嚟持續有日元交叉盤，估計資金回流有關？今日日本紙升到阿媽都唔認得，美元兌日本紙跌穿 90，亦跌過 89，但去到 88.8 呢個咁好意頭個位有美元買盤，家下仍然守喺 89元附近，等緊再向下破關。

日本三月先玩年結，做乜咁早就納錢返家鄉？定係又玩拆倉？自上年年中開始，日圓拆完又拆，每拆一次股市就唔老嚟一次。日本紙係咁升，預期會影響日本出口，日股當然就唔好過啦。藉住尋晚美股大跌 125點，日股今日超做淡。日經平均指數收報 8413點，跌 423點或 4.79%。日本人通常都會用 25日及 75日移動平均線嚟度位嘅。近排嘅升市挑戰 75天線失敗，今日又跌穿埋條 25日線，前景陷濟。



港股嘛 ...... 朝早都想力挽狂瀾嘅，但收市阿爺嗰便都做得唔好，恆指今日終於穿咗維京人講咗幾日嘅關鍵位 13800點！如果大家喺佢一穿咗嗰下做淡，今日已經有得執。恆指六連陰，舊年九月以嚟最長嘅跌市。今日收報 13668點，跌 303點或 2.17%。暫時唔好咁貪心，睇 13300點先。話晒跌咗咁多日會有反彈。

禮拜四歐洲央行減息，估計星期三及星期四歐羅會試低位。今日已經到見咗1個月低位，對想換歐羅嘅朋友真開心！

今日收市後近黃昏時候，傳出 RBS 會喺過年前減持 108億股中行 (#03988) 套現，仲係比現股價折讓百份之九有多！唔係吓話？誠哥今次又咁準？佢前排先沽咗浸咋喎。呵呵呵，聽日個市好玩咯，睇路呀朋友。大家又要一路走好。

冇錯，喺熊市講股市的確係有 D 黑人憎，但個市係咁我都冇辦法。

Good luck！