港股與美元新年開紅盤！

港股 2009年第一個交易日，開局開得唔錯。一月效應喺今年第一日已經發揮得淋漓盡致，而且仲係歴史上做得最好嘅全年第一個交易日。恆指由頭升到尾，收市報 15042點，升咗 655點，成交有 305億元。

阿爺嗰便仲休緊市，但國企股都照升。國企指數收報 8314點，升咗 422點或 5.35%。要留意阿爺嗰便喺 2008年最後七個交易日係做咗七年陰嘅，有可能今日喺 H 股呢度反彈咗先？

個市做得好嘅原因係，大家都相信 2008年係衰到貼地，而要爆嘅都爆到七七八八。而且股市又走喺經濟之先，所以 2009年就算唔大升，估個市亦應該喺上年 10月尾見咗底。維京人個人就唔係咁睇，成日形住仲有第二波金融衝擊。

維京人手頭仲揸緊 put 輪，暫時未駛輸。家下仲研究緊 2009年會玩乜東東。如果睇呢個 moment，恆指似係造緊頭肩底，又或者係平頂三角形，關鍵位為 15800點左右啦。如果升破，會即刻轉呔玩反手，就算唔做好都會平咗 put 輪先。

今日除咗股市做好，美元喺今年第一個交易日都做好。 攪到歐羅今日又跌番 1.38　呢個位，而美元兌日圓亦大幅上破獲 20天線，美元似係玩緊反攻。維京人 plan 咗農暦年去歐洲玩，已經好醒目咁喺歐羅 1.26 接近新低嘅時候換咗部份錢，點知喺 2008年年尾俾佢抽番起上嚟，曾去到 1.41/42 左右，激死。所以家下見到美元又強番都好開心。

今年輪到捷克任歐盟主席國，而佢亦會喺十一月使用歐羅。斯洛伐克尋日已正式加入咗歐元區。歐羅誕生咗十年，當初格老 Greenspan 仲預言歐羅唔掂㖭，睇嚟家下都可以不攻自破。歐羅嘅地位真係越嚟越重要。

Cable 今日訪問咗商品大王 Jim Rogers。Jim Rogers 上年教曉大家嘅關鍵字係「沽空」，結果上年環球股市一跌就跌咗十個月，到年底先反彈。今年佢俾大家嘅關鍵字係「商品」同埋「貨幣」，而亦叫大家學識「沽空」。咦？大家又點解讀佢老人家嘅說話呢？係咪即係話石油見底，美元仲有得跌？

一於喺呢個 weekend 研究下啦。

補番一句：啱啱美國公布咗 12月 ISM 制造業指數為 32.4，係 28年嚟最差。1980年六月當其時呢個指數係 30.3。

祝各位有個愉快嘅周末！

Cheers!