虎落平陽被犬欺

估唔到上年九月十月咁上下嘅金融海嘯，餘威仲未散去，而且有越演越烈嘅趨勢㖭。歐美呢幾日開始展開第二輪大規模嘅拯救銀行業行動。除咗英國及愛爾蘭做咗嘢外，花旗國政府亦開始宣布巨額援助美國銀行，而且據聞出手力度係前所未有嘅。

Obama 下禮拜二上台，睇嚟短期都好難有咩「符 fit」 可以幫到手。佢要創造就業嘅方向係正確嘅，但派錢創就業嘅過程係咪咁順利，維京人就有 D 保留。　今日睇報紙話政府可能會設立 Bad Bank，以接收銀行嘅「有毒資產」。呢招都幾絕，banker 當日亂咁借錢出去嘅呆壞帳竟然政府會包底，睇嚟爆破一個泡沫第日又會有個更大嘅泡沫等住俾大家玩泡泡浴。

睇番香港。日前大摩先至唱淡匯控 (#00005) 可以去返 $52，點知高盛禮拜五又開口幫拖，仲將匯控目標價踩至 $49。HSBC 呢舖真係虎落平陽被犬欺。星期五匯控嘅沽空額仲猛增至 5.7億。呢次連環唱淡，前後原因卻有點不同。

大摩預測匯控需要籌錢集資，以增加資本充足比率及資金流量，仲話可能會減少一半股息㖭。高盛則從匯控基本生意談起，話佢嘅風險為總值 1340億美元嘅匯控融資次按業務，同埋 920億美元嘅美國匯豐銀行消費及商業物業貸款組合，所以預期今年可能將出現 15億美元嘅虧損。高盛仲徹底過大摩，甚至預測匯控可能唔會派息㖭。

最幣係匯控唔知係咪有 D 咩原因，暫時仲未有人出嚟講嘢。如果你問維京人咩價位買匯控，唉，家下真係答你唔到。淨係知道咁多股票好買，唔一定要買 HSBC 啩。例如內地嘅基建股可能仲有得升？股民大多有匯豐情意結，淨係見到佢跌到咁低就覺得抵買或應該要買，而唔係用基本分析去睇佢嘅業績。

農暦新年就得，今年歐羅平咗好多，相信都有好多人會到歐洲玩。點解咁講，因為呢幾日維京人托朋友換錢，好多銀行或者找換店都冇貨，有 D 仲話要落 deposit 先肯同你唱，似乎真係好搶手也。好彩維京人算係撈到 D 底咁啦，可以喺 1.31 左右唱咗浸。上次小弟仲醒，唔駛 10蚊港紙換 1蚊歐羅！

歐羅雖然回升，但 1.33 阻力亦好大。短期估計會喺 1.3000 - 1.3300 呢個位整固下先。

祝各位有個愉快嘅周末啦！

Cheers！