港股關鍵時刻、A股升勢對勁

港股連升咗三日，今日終於頂唔住要抖抖。恆指一度跌超過 200點，但由於阿爺嗰便升勢唔錯，跌幅喺下午食完 lunch 後已經收窄。恆指最後收市報 15509點，跌 53點或 0.35%。

大家要小心成交哦，跌市成交升至 539億元。果然如維京人較早前所講，恆指重要阻力大概喺15780 / 15800左右。睇圖恆指做緊平頂三角，個條橫線就係喺 15800左右，如果升唔穿，咁個圖就唔係正式平頂三角，又要重新再度度。但如果升穿，其實 17000點就應冇走雞。家下恆指絕對係處於關鍵時刻。

睇番成交量再超千億元人仔，上證指數上漲 56點，收復 1900。市升成交增，對板吖。睇嚟股民信心開始慢慢返晒嚟。

維京人係喺深圳返工嘅，今日一日之內，竟然有三位內地同事同我講，叫我喺深圳買樓。唔知點解，佢哋同樣都話深圳樓市跌到咁上下，覺得已經跌夠喎，仲話半年內唔買樓日後會後悔。呢三位同事本身都已經上咗樓，亦買過股票，亦一樣見識過近嚟嘅跌市威力。大家同時間唱好，真係比較特別。似乎樂觀情緒受阿爺出手救市影響，信心返緊嚟。溫總真係講得好啱，信心比黃金貨幣更重要。

展望 2009年，相信係身手敏捷者先可以賺到錢嘅一年。2007年淨係買升、2008年淨係睇淡，其實好易賺到錢。維京人亦因為睇啱方向，個投機組合 (冇錯，係投機唔係投資) 算係略有表現咁。但今年，小弟真係覺得前景向上又得，向下又得，加上睇運程書話我流年不利，所以都係儘量唔沾手個市咯。

2009年嘅波動，會比你可以想像到嘅大。睇淡恆指有機會見 4位數，睇好亦已經有人講而亦覺得恆指會先抽上萬七至萬九點，甚至二萬點。嘩！範圍咁大，講晒啦！冇錯，今年嘅波動真係有咁嘅可能。

油價唔可以睇咁淡，家下有人睇三十零蚊。呢個唔係冇可能，不過開採石油嘅成本都要成四十幾蚊美金，如果油價去到三十幾，各石油產出國仲唔嘈到拆天？金價小弟則睇好，玩吓手今年 Q3 可能已經去到成千銀美元。小弟睇好金，理由係各國政府係咁放水，currency 已經唔值錢，金條先係最實際。

今日美元又升得好勁。好嘢！歐羅返番去 1.33！暫時睇美元可能仲有得升。過多兩三個月則唔敢包。淨係覺得美元同美國國庫債券升埋呢浸就玩完。話晒醜婦終需見家翁嘛。

Good luck！