三個準繩

忙得要死，長話短說。

首先要認下叻先。日前維京人講過，話恆指跌破 13800點可以放心沽，第一個位睇 13300 先。尋日見匯控個勢唔掂，即微調話可以跌過 13000。結果恆指今日真係跌破 13000點，低見12904點。最後恆指收報 13242點，跌 461點或 3.37%。

後市點睇？

1) 下星期一美國假期休市
2) 下星期二奧巴馬就任
3) 玩埋下個禮拜就過農曆新年

小弟睇下個禮拜恆指繼續偏淡。但可能可以考慮下星期五小注吸納中資股。理由係內地 A 貨股民信心開始返嚟 (睇吓 A 股走勢就知道)，而農暦新年內地放足一個禮拜假，唔排除有可能地下直通車資金會走過嚟買 H 股，年初四開市可能開紅盤？

第二樣嘢要認叻嘅係匯控 (#00005)。喺 12月23日小弟喺度已經叫大家小心匯控，仲好實牙實齒咁話 HSBC 可以見到 $65，由於聖誕期間個市反彈，當其時好多報紙分析員都話可以看好。結果嘛，今日匯控真係見 $65.5，創近 10年新低。

Obama 成日講 Change，今時今日各大小股民嘅 mind 亦要 change。世界冇長揸嘅股票，匯控亦冇話唔可以跌番 10年前個價。

第三樣嘢要認叻嘅係歐羅。呢幾日講話歐洲央行會喺今日議息，歐羅會跌到今日。結果果然如預期減息 50點，攪到歐羅今日繼續跌到阿媽都唔認得。但小弟尋日亦講過，歐羅 $1.3000 會係仲要嘅支持。結果維京人嘅估計準到無倫。唔信？先睇 Reuters 個圖：



跌破 1.3100 即現強力反彈，寫呢篇 post 嘅時候市場又想試吓向下衝 1.3000，暫時見最低位都係 1.3028。

後向維京人仍偏向歐羅會反彈。理由係歐羅跌咁多日，央行亦已議息。雖然歐元區消費者信心降至有記錄低點，但對於利率前景，似乎歐洲央行立場仍比較穩定，表示經濟將於 2010 年復甦，通縮機會唔係咁大。暗示可以解讀為歐洲央行將暫停減息，歐羅可能會得到支持。

咁當然，個市分分鐘都會變，到最後係點只有 God knows。小弟暫時係咁睇先啦。

Good luck！