農暦新年，外圍風起雲湧時

送鼠迎牛。回顧鼠年，股市就唔似得老鼠仔咁精靈，而係暴瀉四成有多！今日係鼠年最後一個交易日，亦係報跌。港股收市報 12578點，跌 79.39點或 0.63%。假期氣氛濃厚，成交只有 337億元。

內地 A 貨喺連升七個交易日後，今日以跌市收爐。冇嘅，雖然有信心，但經濟一日未好好友都未敢大膽造次。上證指數又收喺 2000點以下，仲以全日最低位 1990點收市。似終見過鬼都怕黑，股民已經唔相信中國經濟可以與世界脫勾咯。明知農暦新年阿爺股市休足七日，但外圍股市就起碼玩多五日，好友仲唔鳴金收兵咩？

金融海嘯，越演越烈。近排公布親嘅公司業績亦唔好。內地部份證券公司由於過去一年 A 貨冇人玩，預計 2008年業績轉盈為虧。前兩日任總亦話前景睇唔清，似乎大家都要準備好過完年後迎接金融海嘯第二波！

港股下星期四先開市，當日係期指結算日。呢幾日外圍絕對唔會係風平浪靜。歐美今晚已開始全線下瀉，唔通恆指真係要初四裂口低開？

英國公布咗經濟數據，繼 Q3 GDP 下滑 0.6%之後，Q4 按季亦跌 1.5%，按年則下跌 1.8%。呢 D 數據亦宣告英國已正式陷入衰退，係 1991年以嚟首次。

令到今晚英磅下滑，而且下滑幅度驚人。尋日英磅兌美元仲做到 1.38 / 1.39 咁上下，今晚竟然曾低見 1.350！！！Wow！呢個係 24年低位呢！似乎真係如小弟較早前所講，佢想同歐羅睇齊，甚至鬥快同美元玩一算乎？

歐羅亦曾經去到 1.2763。頭先跌破 1.28時小弟快快手咁沽咗轉，執幾十點子算數。家下已經反彈返去 1.２834 左右。個人暫時睇仲有機會 touch 一下 1.2600。

寫呢篇 post 嘅時候道指下跌超過百點。

另外，下個禮拜三好似係聯儲局議息，又係炒家出動之時。

睇嚟下星期四年初四，真係會好波動？

唏，乜都好，過埋年先算！

******

維京人都好鐘意飲酒，但就絕對好憎人醉駕，覺得呢 D 係一種超級唔負責任嘅行為。今日朝早落馬洲附近發生車禍，貨車撞的士，結果釀成六人死亡。經酒精測試後，發覺輕傷嘅貨車司機酒精含量超出法例四倍！

就因為一 D 自私同懶係自信去揸車嘅人渣，咁就斷送咗六個家庭嘅經濟支柱，真係諗起都扯火！睇番政府罰醉駕嘅刑罰，好似最多只係判十年。其實飲酒駕駛絕無必要，俾醉貓開車喺條路亂嚟，咁同俾個殺手喺條好旺嘅街度亂咁開槍射人有咩分別？一於治亂世應該用重典，飲少少酒揸車應要坐監，如果死咗人應判終生監禁。再加上交通警要嚴格執行，咁相信醉駕嘅個案會大幅減少。

*****

喺度先預祝各位有個愉快嘅農暦新年！維京人聽日仲要做嘢，年三十晚出 trip 去玩！

Cheers！