升到奧巴馬上台

今日維京人又係忙到爆。忙，喺呢 D 咁嘅時勢，表面睇就好似好好咁，起碼公司唔會炒你嘛。實情都要睇下忙 D 咩先得。維京人間公司有貨出口到日本，大概佔三成生意。今日收到消息話受金融海嘯影響，客戶落單大跌，2009年 Q1到 Q2嘅 sales forecast 急跌六至七成，真係大鑊。忙嘅其中一個原因係老細要急急召開會議，以商量對策也。咁你話呢 D 忙又係咪「好事」呢？唉 ......

睇番個市，繼續做好。最難得係內地 A 貨市場。於 2008年最後七個交易日，全部都係跌嘅。今日係2009年第一個交易日，受美股做好帶動亞太區股市上升，A 股都升。內地嘅 A 貨股民可以鬆好氣咯。上證指數收報 1880點，升 59點或 3.29%，喜迎新年開門紅。

港股今日都好反覆㗎。恆指一開市已經做好約三百點左右，但中午臨收市錢只係升嗰百零點。維京人原本手頭持有恆指 put 輪，由於呢排比較忙嘅關係，都係唔玩短炒咯，鳴金收兵，沽貨平倉去也。好彩咋，因為下午恆指又升過，真係發神經。恆指最後收報 15563點，升 520點或 3.46%，離關鍵位 15800點又一步拉近。家下小弟都要玩轉呔，唔再估個市跌，起碼呢兩個禮拜可以睇升。睇嚟較早前講過嘅奧巴馬效應已經開始炒起。

美元唔知係咪都受奧巴馬上台所影響，今日又大升，澳元一度由 71.68美仙跌到 70.63 美仙。英磅傳減息，由2厘減到 1厘 25，又跌。歐羅去番 1.36水平。開心！

今日睇信報，曹仁超唔會再每一日喺信報登佢嘅投資者日記，而係變為投資者周記。曹 Sir 嘅分析呢排準到無倫，於十一月頭大家都睇淡時佢睇好，結果如何大家有目共睹。家下佢寫稿寫得冇咁密，做讀者嘅緊係覺得可惜。不過正如佢所講，2009年又未必需要每日睇住個市，以免見樹不見林呢。