順李生個勢而為

市場情緒變化之快又令人咋舌。年初大家對 2009年充滿憧憬，又期待奧巴馬上台會拯救世人。恆指一度由低位14387 炒到尋日高見 15763點（同維京人講嘅重要阻力位 15800點非常非常接近），估唔到呢兩日跌市，三爬兩撥又跌番落嚟。今日恆指收報 14415點，跌 571點，成交 555.2億。估唔到上個禮拜先係元旦，市場已經炒咗兩浸，一浸升一浸跌，家下又還原基本步。

大市下跌，除了受美股尋晚做得好差所影響外，主要係受內銀股俾人拋售。尋日中行（＃03988）俾李生放貨、建行 (#00939) 俾外資沽售套現，似乎過年前大家都好等錢用。其中要留意誠哥放貨。李生於 2007年年尾，當大家一遍看好時眾人皆醉佢獨醒，話叫大家小心，自己亦身體力行沽貨，令維京人家下都不得不留意佢嘅動向。李不動，我不動；李一動，我即動。著名Blog 友馬沙今日亦有喺 am730 講起呢件事，大家有興趣可以睇睇。

如果睇恆指走勢，雖然跌咗咁多，但都仲係喺上升軌，仲支持得住。下一個位睇 13800點左右，跌穿埋，又可以放心做淡。如果睇淡 D，可能做緊圓底都未定。大家小心。其實如果大家有時間睇住個市，可能玩期指好過玩 warrants。話晒 warrants 有溢價，引伸波幅又大，未必咁著數。反而期指只要設定止蝕，風險有限。唔知呢度有冇高手可以指教下咁呢？

有時 D 朋友都話，做乜小弟一時睇好，一時又睇淡，好似冇乜臘腸 (立場) 咁喎？咪玩啦，錢嚟㗎嘛，個市波動咁大，又點可以一成不變呢？其實你亦可以話呢個藉口嚟都得。啱啱玩咗小瓶子個 blog 嘅心理測驗，原來我係四仔，即係作風比較務實，難怪成日轉呔。哈哈！

今日小弟比較留意到嘅新聞係港珠澳大橋似係真係拍板，會於今年啟動有關嘅項目。珠三角要喺未來 12年，即係 2020年實行全面現代化，話要比其他地區早 30年。呢個粵港澳一體化嘅發展勢頭，已經係大勢所趨，只有融合或適應，冇得反對。反對者，自行移民去也。只是維京人唔係話大富大貴，貧賤不能移！

呢兩日天氣轉涼，大家記住著多件衫。

Cheers！