噢，加碼 ...... 杯水車薪呢 ......

維京人呢排公司真係比較忙，尋日禮拜日都要俾老細 call meeting 話要諗下 2009 年大計，今晚又要 telephone conference，咁攪法，唯有靠夜晚寫下 blog，順便 update 下自己啦。

唔駛多講，睇恆指先。13800果然係一個好重要嘅支持。今日恆指又跌，連瀉四日，低位就係 13895點，離 13800點只係爭 95點咁大把。今日收報 13971點，跌406點或 2.83%，全日成交唔係話太多，得嗰 463億元。

當支持支持唔住，沽！

內地 A貨方面，好神勇，亦好神奇吖。上證指數先低開，然後一度抽高去到 1924點，收市又跌番落嚟，收報 1900點，跌唔夠 4點。而深圳成份股指數仲微升㖭，不過真係好微。收報 6719點，升 0.03點，可以當佢冇升。內地 A 貨撐得住，全因為溫爺爺叫大家要有信心，仲身體力行走遍幾個省份以宣揚信心嘅重要。仲話三月份人大政協兩會之前會有新嘅刺激經濟措施㖭。

上個禮拜五美國公布就業數據，就業人口減少 260萬，係 1945年以嚟最勁嘅。受消息所刺激，美元反而勁升。點解？因為當美國經濟差，全世界就預期環球經濟亦會差，美元就成為避險貨幣啦。加上加沙局勢仲係有壓力，未解決，亦協助美元一把。

如果有睇開呢個 blog，都知道維京人過年會去歐洲玩。寫呢篇 post 嘅時候歐羅去到 1.3307，咦？聽日換番 D 歐羅先。另外，呢排亦留意緊俄羅斯唔供天然氣俾烏克蘭呢單嘢，希望快 D 攪掂啦，唔係凍死都未得天光。

今期繼續睇 Obama 噢加碼呢場戲啦，佢已經成為美國人嘅精神領袖。離上台日子越近可能會傳更多嘅加碼措施。雖然呢幾日都有議員質疑佢嘅方案，但冇所謂啦， Obama 一於玩親民食吓熱狗先！橫掂美國經濟已經人所共知點救都係杯水車薪，傷口未止血都幫你轉移視線覺得冇咁痛先嘛。