大利淡形態

信報投資者日記由曹 Sir 換了畢老林執筆，原來一樣係咁堅。今日一句 "Get Out Now!"，個市即刻應聲下跌。睇市之準真係令人配服。恆指今日急跌，連 15000點都破埋，收市報插 522點，收報 14987點。成交大增至 900.2億，多得好緊要。其中一部份係因為建行批股所致。

維京人話呢幾日恆指面臨重要關鍵 15800，仲話呢個關口阻力重重。結果真係穿唔到，穿唔到就急瀉。今日跌市成交升，喺呢 D 高位形成穿頭破腳，係大利淡形態。

今日嘅好消息係阿爺嗰便決定發 3G 牌，呢個「好消息」等都等咗成 5年。熊市下壞消息固之然要出貨，好消息亦要出貨。各大電信股今日趁勢回吐，中移動 (#00941) 攞到國產 TD-SCDMA，收報 $78.45 跌 5.5%；中國電信 (#00728) 獲發 CDNA2000 牌照，收報 $3.03 亦跌 5%；聯通 (#00762) 攞到同香港一樣行緊嘅 WCDMA，消息越好出貨亦越狠，收報 $9.19，勁跌 10.6%。

除咗電信股，今日內銀股亦成為跌市原兇。前排中國銀行 (#03988) 俾人放貨，今日輪到建行 (#00939) 俾美國銀行沽貨套現。結果六行一條心一齊跌。攪到國企指數都俾佢哋拖累，收報 8244點，跌 399點或 4.63%。

傍晚國泰發盈警，對沖油價蝕 76億。

寫呢篇 post 嘅時候，美國啱啱出咗 Challenger 企業計劃裁員人數，上月為 16.6萬人。咦？比上個月少咗喎，少咗接近 8.4%。睇番 2008年成年，原來美國企業一共裁員 122萬人，係 2003年最多。個報告仲話情況會維持至今年上半年。道指開市冇耐已跌超過１00點。

果然大市當大家期待會向上衝時，又玩反高潮。經過過去一年，大家都唔會同你玩長線。睇恆指由低位萬一點左右抽上嚟萬五萬六點，仲唔割禾青沽貨咩？有食唔食，罪大惡極，食咗糊先算。今年醒目嘅投資投機者，短炒轉身要快手。

炒外匯就更加要快手。前兩日美元大升，尋晚美國聯儲局會議記錄顯示，利率可能長期維持喺低位，美元即應聲回落。今日美元頽勢擴大，兌日本紙同埋瑞郎等低息貨幣開始回落。奧巴馬今日又話救市要加碼。美國發咗達咩？係咁印銀紙，美元應有機會跌番落嚟。唉，今日諗住唱歐羅唱唔切，又要睇位。

Good luck！